Read Tangkhul Naga ESTHER 8 Bible Online

ESTHER 8 - Tangkhul Naga bible

ESTHER 8

¹Chithang zimik, Awunga Ahasu-erusna Jehudili yangkashe Hamanwui shimlui Awungva̱ Estherli mihaowa. Kala Mordecaina awungawui mangāli vai, kaja Mordecai ani khishokkhala kaji Estherna hānghaowa;

²kala Hamanwui eina khuikahai mahor namkhavai khutop chi awungana khuishokta Mordecaili mi. Kala Estherna Mordecaili Hamanwui shimlui akhavā sāngasakhaowa.

³Chiwui thili Estherna awungali hāngluishita; kala Agagwui Hamanna Jehudibingli zakshilāk eina sākhavai khangarān chi ngacheimi khavai, apheili singda chapsasui poi.

⁴Kala Awungana awui sinā khānthing Estherli tāngkhami eina,

⁵Estherna ngakarthuida awungawui mangāli nganinga. Kala “Kalikha hina awungali ningyāng ungngasakta, kala awungawui mikyanli ili ngahanngaimiakha, kala otsak hi awungawui mangāli mashungakha, kala ina awui mikyanli ningyāng ungngasakakha, awungawui ngalei saikorali khalei Jehudibingli sāthat khavai Hammedathawui nao Agagwui Hamanna kapi kahai chi khuishokmi khavai kakaso akha kapimilu.

⁶Kaja iwui mibingli kalāshāt rāki kaji chi ina kararan eina khāngpamrakhala? Maningakha iwui mibing sākashimān chi ina kathāda yangrarrakhala?” da ana hānga.

⁷Chieina awunga Ahasu-erusna, Awungva̱ Esther eina Jehudipa Mordecaili hānga, “Yanglu, Hamanwui shimlui ina Estherli mihaira, kala Hamanna Jehudibingli pāng parra jihaoda, ali athumna phāshi sāhaira.

⁸Ara nanina Jehudibingwui vang kapi khangai chi awungawui ming eina kapilaga shoi khutop eina mahor nampaira; kaja awungawui ming eina kapi kahai kala awungawui khutop eina mahor namkahai chi mangacheiluipaimana.”

⁹Atam chili kachāng kakathuma, Kharam kachāng, zimiksho maga̱da kakathumathang, awungawui kapimebingli hokhui; kala Jehudiwui pongli Mordecaina kakaso athishurda lairik akha kapida satrapbing, rammungabing, kala India eina thuilaga Ethiopia vāshungda khalei ngalei apamwui wungnaobing, ngalei shākha maga̱da shinili kachichāramtui kala mayek eina, kala Jehudibinglila athumwui tui kala mayek eina kapilaga chiphunvāsera.

¹⁰Lairik chi Ahasu-erus awungawui ming eina kapida awungawui khutop eina mahor namlaga, wungnao siguili shaksāda kala awungawui otsakli katonga kathathāka sigui tonglaga kaphungabingli chihovāserhaowa.

¹¹Chili, keinung kachiva̱li khalei Jehudinaobingna kazipkhuida athumwui mirin kankhavai, kachikathā yurwui maningakha ngaleiwui raimina athumli kala athumwui preinaosanli rāngararda thongthāng ngapon khavai kharā tharān ngarar khavai, sāshimān khavai, sāthat khavai awungana khamayā mi,

¹²hibing hi Awunga Ahasu-eruswui ngaleili thangkhawui vang kachāng tharāda kakhane, Marun kachāngli sākhavaina.

¹³Kapi kahai hukhum hi ngalei kachiva̱li ava̱va̱ miki kajina, kala yur saikorali chishāta, kala Jehudibingna athumwui yangkashebingli athut khuikhavai chithang khangarān sāki kajina.

¹⁴Chiwui vang eina pao phungmebingna awungawui otsakli katonga kathathāka sigui tonglaga awungawui hukhum athishurda thāklak eina apam kachida ngayaovai, kala Susa keinunglila hukhum mihaowa.

¹⁵Chiwui thili Susa keinung ringphāda mathānda ngavaoda leilakha, Mordecaina wungnao sāri khamayinga kala kachara sāri ngavaida, sinā kuihon kahakva̱ ngahonlaga tāwon kachon khamanaka hungreoseo sāri shaksāda awungawui eina shoka.

¹⁶Jehudibingna ringphāda mathanlakhaowa kala maiyāronghaowa.

¹⁷Kala ngalei kachida, keinung kachida, awungawui tui kala kakaso vākashung pamli Jehudibingna ringkaphā khamathān eina ngasoda zāt khānglaga lumlaopama. Kala ngalei chiwui yur kachungkhana athumla Jehudina da vaoshoka; kaja athumna Jehudinaobingli khangachee leihaowa.