Read Tangkhul Naga SHONGZĀ 11 Bible Online

SHONGZĀ 11 - Tangkhul Naga bible

SHONGZĀ 11

¹PROHOna Mosesli hānga, “Pharaoh eina Egyptwuitungli kazāt akha shida rāngasakfara; chiwui thili ana nathumli chihonaora; kala ana kachiho tharan, nathum katongali chihora.

²Mi saikorana shākhavai hānglu kaja mayarnao kala preinao kachiva̱na kachichāshi khongnainaoli sināwui, lupāsāwui chara̱-chasān pokhui ngasaklu.”

³Kaja Egyptnaobingna athumli ngahānngai khavai PROHOna yangmida lei. Chili lāngda Egypt ngaleili, Pharaohwui otshinabing kala mibingwui miktāli Moses hi kahaka mi akha ngasāsai.

⁴Kala Mosesna hānga, “PROHOna hithāda hānga: ngayā sailung ina Egypt ngaleili vāra;

⁵kala Egypt ngaleili pharākhare katonga thira, wungpamkhongli kapama Pharaohwui naochizai eina thuida mā kharungva̱ rao sha̱naowui naochizai, kala sha̱kei pharākhare eina tangda katonga thira.

⁶Kala Egypt ngalei katongali chapkhangachā hāngkhavai maleimara; chikathā mashoklakranga, kala kashokla mashokluimara.

⁷Israelnaobingli nilala, mibingli nilala, sāyurbingli nichilala fa akha eina tangda makhongmara. Chithāda sāda Prohona Egypt eina Israelli ngakheikhang eina sai kaji nana theira.

⁸Kala nawui otshinabing hina ili rāda ngakhumshāmda, ‘Thuiulu, nawui thi kashurbingla thuiserulu’ da hāngra, chiwui thili I thuihaora.” Kala ana malungvātta thurshi Pharaohwui eina thuihaowa.

⁹Chiwui thili PROHOna Mosesli hānga, “Pharaohna nali manganāsangmara; kaja Egypt ngaleili iwui matakhak kahai ot chungmeida chithei khavaina.”

¹⁰Moses eina Aaronna Pharaohwui mangāli matakhak kahai ot saikora hi sai, kala PROHOna Pharaohwui wuklung mararmihaida Israelnaobingli awui ngaleiwui eina mathuingasakthuwa.