Read Tangkhul Naga SHONGZĀ 12 Bible Online

SHONGZĀ 12 - Tangkhul Naga bible

SHONGZĀ 12

¹ Egypt ngaleili PROHOna Moses eina Aaronli hānga,

²Aja kachāng hina nathumwui vang kum haokaphoka kachāng khare ngasāra.

³Israel katongali hānglu kaja kachāng hiwui katharāthang shimkhur kachiva̱ kala shimlak kachiva̱na yaonao akharip khuirāra.

⁴Shimkhur akha mi teonāhaida tongda mashokrarakha ashiwui khongnaishili mi chākyanglaga shaikashap athishurda ngafara.

⁵Yaonao nilala, me nilala, achuk kapeiya kumkhawui avānao khuira;

⁶kala chi kachāng hiwui tharāda khamatethang eina tangda hailaga, Israel kazip ashangva̱na chithang zimik atun ngasha̱da taithatra.

⁷Kala athumna zākhavaipamli ashee kateokha khuilaga khāmongthing khanganing khani eina khamakharli ashee kateokharip neora.

⁸Athumna chithang ngayā asā chi ruishaira, khawok makazang khamui kala khārisi kaje thingnā han eina ngasoda shaira.

⁹Kharing eina kala tara̱ eina hanglaga mashaialu, kha akuila, apheila akhari-akharāla meili ruishailu.

¹⁰Kala ngathorshong vāshungda mataihaipaimana; ngathor eina tangda katai leisālala meili riktāhaolu.

¹¹Nathumna hithāda shaira; nathumna kashān masa̱laga, pheihop sanglaga, kala napāngli khāmshui ngazunglaga katotlak eina shaiki kajina. Hi PROHOwui makānkhami phanitna.

¹²Kaja chithang ngayā ina Egypt ngalei makānda, Egypt ngaleili pharākhare saikora sāthatra; mila, sha̱keila; kala Egyptwui varebing saikorawuitungli ina mashun bichar sāra: I PROHOna.

¹³ Ashee china khudam sāda nathum khaleipam theikhuira, kala ashee chi ina theilaga nathumli makānmihaida, Egypt ngaleili sākathat tharan kazātkashi mimao nathumli maraza̱mara.

¹⁴ “Zimiksho hi nathumwui phaningung khavai atam ngasāra, kala PROHO mingli zātkhān sāda, thot kachida shiyan sāda mayonchingra.”

¹⁵“Shinithang khawok makazang khamui shaira, kharethang khawok saikora shimwui eina horserhaora, kala kharethang eina thuilaga kashinethang eina tangda khawok kazanga khamui kashai mi chili Israelwui eina katathaora.

¹⁶Kharethang nathumna kathara kazip khuira, kala kashinethang kathara kazip khuira; chiwui atamli ot masāpaimana; kha chithang zāki kaji chi nanina ngarānmira.

¹⁷Kala khawok makazang khamui phanit nathumna mayonra, kaja chithang nathum katongali ina Egypt ngaleiwui eina thānkashokna: Chiwui vang eina thot kachida nathumna zimiksho hi shiyan sāda mayonchingphalungra.

¹⁸Kachāng kharewui tharāda khamatethang ngazin eina thuida kachāng chiwui maga̱da kharethang ngazin eina tangda khawok makazang khamui shaira,

¹⁹khikhalajila shinithangwui vang nathumwui shimli khawok maleipaimara, kala khawok kazang kashai mi chi, ngasokharā kha̱miranu, ngalei chiwui miranu, Israel ashangva̱wui eina katathaora.

²⁰Nathum khawok kazang mashaipailakmana, nathumwui shim kachiva̱li khawok makazangmāng shaiki kajina.”

²¹Chiwui thili Mosesna Israel khararnao saikorali hokhuida hānga, “Kachichashi shimkhurwui athishurda yaonao kapangkhuida makānkhami sā taithatlu.

²²Maharnā sinkha khuida khongsaili kazang ashee chi rurkhuilu, kala khāmong thing khani kala khamakhāra chili khongsaiwui ashee chi neolu; kala kazing mathangranglakha eina tangda kachichāshi shimwui eina khipākha kayāng mashokpaimara.

²³ Khikhalajila PROHOna Egyptnaobingli shaothat khavai rāra, kala khāmongthing eina khamakhārli neokahai ashee chi theilaga khāmong chieina makānthuihaida nathumli sāthat khavai sākathata chili PROHOna nathumwui shimli makāngasakmara.

²⁴Ots hi shiyan sāda nana kala nawui naothot naothot eina tangda mayonchingki kajina.

²⁵Kala ngashit kahai athishurda PROHOna nathumli miki kaji ngalei chili vākashung chitharan shiyan hi mayonchingphalungra.

²⁶Kala nanao ngarāna ‘Hi khiwui vangkhala?’ jiakha,

²⁷‘Hi PROHOna makānkhamiwui pha̱kaphayāna, kaja Egypt ngaleili leilakha Egyptnaobingli shaokathat tharan ana Israelnaobingwui shimli makānthuihaowa, kala ithumwui shim makānkhamiwui vangna’ da hāngra.” Chieina mibingna kui mashunzangda khoruma.

²⁸Chiwui thili Moses eina Aaronli PROHOna kakaso chithāda Israelnaobingna sai.

²⁹ Ngayā sailung Egypt ngaleili khalei pharākhare saikora PROHOna wungpamkhongli kapama Pharaohwui naochizai eina thuilaga, narshimli narhaida khalei raonaobingwui naochizai eina tangda, kala sha̱kei anao pharākhare saikorala zangda shaothathaowa.

³⁰Pharaoh, kala awui otshinabingla, Egyptnao saikorala ngayā ngaunlop eina thuichapa, kaja shim kachiva̱li makathi maleisamana.

³¹Chieina ngayāshong Moses eina Aaronli hokhuida hānga, “Ngakarthuilu, ithumwui eina thui-ulu; nanila kala Israelnaobing, kala nanina kahāng thāda nathumwui PROHOli otram angatha̱ulu,

³²Mebing kala yaobingla nanina kahāng thāda khuithuiserulu, kala ilila somilu!”

³³Egyptnaobingna Israelnaobingli thāklak eina thuikhavai poi, kaja athumna hānga, “Ithum thingakanki jihaira.”

³⁴Chieina athumna khamui khanailila khawok masangphāmada, naikhavai akhongli phonda romlaga phungkhuiya.

³⁵ Mosesna kakaso athishurda athumna sāhairasai; kaja Egyptnaobingwui eina lupāsā kala sināwui chara̱-chāsān kala kashankachon kathā pokhuiserhairasai;

³⁶kala Egyptnaobingna athumli ngahanngai khavai PROHOna sangmihaisāda, athumna kapopo chi mihairasai. Chithāda athumna Egyptnaobingwui eina ngaponkhui.

³⁷Kala Israelnaobingna Rameseswui eina zatlaga Succothli vāshunga, prei-naosan mashānla phei eina kazat mayarnaomāng mi thing shātharuk sha̱khana.

³⁸Chili lāngda miyur kachungkha manātta athumli ngasoshoka kala seila, yaobingla, kala mebingla zanga.

³⁹Kala athumna Egyptwui eina khuikaphung khawok makazang khamui chi sākhui, kaja thaklāk eina kasham kahaiwui vang mangaraiphathuda kashakazā khikha khangarān masaphāthuwa.

⁴⁰ Israelnaobingna Egypt ngaleili kapam atam kum shāmati thumrāna.

⁴¹Kala kum shāmati thumra kāpeithang, chithang ngalāngda PROHOwui mi saikora Egypt ngaleiwui eina shoka.

⁴²Egypt ngaleiwui eina athumli thānkashok ngayā chi PROHOna mayonkhame ngayāna; chiwui vang eina thot-thot kachida Israelnaobingna ngayā chi rinsit eina PROHO wui vang mayonchinga.

⁴³Kala PROHOna Moses eina Aaronli hānga, “Hi makānkhamiwui shiyana; yur kateibingna mashaipaimara;

⁴⁴kha pheisā eina lokakhui raonaoli ahui rimshokmi kahaiwui thili mishaipaira.

⁴⁵Ramkazat mi kala ngalang kaphei mina mashaipaimana.

⁴⁶ Chi shim akhali shaira, shimwui eina asā chi makhuishokpaimana; kala ara̱kui akhala masātekpaimana.

⁴⁷Israel ashangva̱na mayonphalungra.

⁴⁸Nathumli kha̱mi ngasokhara leida makānkhami phanit PROHOli mayonrumga jiakha mayarnaobingli ahui rimshokmihailaga rāmayonpaira; ala ramnao akha thāhaora. Kha ahui marimkashoka mina mashaipaimana.

⁴⁹ Ramnaobingwui vangla kala nathumli ngasokharā kha̱miwui vangla ain akhamāngmara.”

⁵⁰Moses eina Aaronli PROHOna kahāng athishurda Israelnaobingna sai.

⁵¹Kala chithang ngalāngda Egypt ngaleiwui eina PROHOna Israel katongali thānshokmi.