Read Tangkhul Naga SHONGZĀ 13 Bible Online

SHONGZĀ 13 - Tangkhul Naga bible

SHONGZĀ 13

¹PROHOna Mosesli hānga,

² “Pharākhare saikora ili tharchigatlu, mi nilala, sha̱kei nilala, awukwui eina shokkhare chi iwuisera.”

³Kala Mosesna mibingli hānga, “Aja zimiksho hi phaningunglu, Egyptli narkahaiwui eina, PROHO pāngwui pangshap china nathumli apam hiwui eina thānshokmihaira; khawok kazang mashaipaimara.

⁴Abib kachāngwui aja zimiksho nathumna zatphokki kajina.

⁵Kala PROHOna navā ngarāli mira da ngashit kahai Canaannaobing, Hivnaobing, Hitnaobing, Amornaobing, kala Jebusnaobingwui ngalei seina̱ eina khuira̱ khalong ngaleili thānkazang chitharan otsak hi kachāng hiwui alungli mayonchingki kajina.

⁶Shinithang khawok makazang khamui shaira, kala kashinethang PROHOwui zātkhān sāki kajina.

⁷Khawok makazang shinithang shaira; khawok kazang khamui nathumwui ngachaili matheipaimara, khawok kazang nathum khaleipam kachida matheipaimara.

⁸Chithang nana nanaongarāli hāngra, ‘Kaja ina Egyptwui eina kashok chitharan PROHOna ili khi samikhala kajiwui vangna.’

⁹Kala hi machutkhui khavai nathumwui pāngli kala phaningung khavai nathumwui khaveili leichingra, chithāda sāda PROHOwui tamkachithei nathumwui morchaili leikhavaina; kaja PROHOna pāngthei kharei eina nali Egyptwui eina khuishokmi.

¹⁰Chiwui vang eina kum kachida hi atam chāda nathumwui shiyan sāda mayonchingphalungra.

¹¹“PROHOna nathumli kala navā ngarāli ngashit kahai Canaan ngaleili nathumli thānzangda chi nathumli mikahai tharan,

¹² awukwui eina shokkhare chi PROHOwui vang phaishokmiphalungra. Nathumwui avānao pharākhare chi PROHOwui sāra.

¹³Gadha anao pharākhare chi nathumna yaonao akha eina ngatangkhuira; kalikha nathumna chi mangatangkhuiakha, akahung sātekhaolu. Nathumwui ngachaili pharākhare naochizai mayara chi nathumna ngatangkhuira.

¹⁴Kala naoda rāki kaji atamli, nanao ngarāna ‘Hi khiwui kakhalatkhala?’ da ngahānakha, nathumna ngahānkāra ‘Pāngwui pangshap eina PROHOna ithumli Egypt raopamwui eina thānshokmi.

¹⁵Kaja Pharaohna ngakaishilak eina ithumli mathui khangasakwui vang, PROHOna Egypt ngaleili pharākhare naomayara, mikumowui pharākhare eina thuida sāyurbingwui pharākhare eina tangda sāthatserhaowa. Chiwui vang awukwui eina shokkhare mayarnao katonga PROHOli kachigatna, kha iwui ara-azāwui naochizai saikora ina ngatangkhui’ da hāngra.

¹⁶Hina nawui pāngli kala nakhaveili khudam sāda chiya, pāngwui pangshap eina PROHOna ithumli Egyptwui eina khuishokmi kaji theikhui khavaina.”

¹⁷Pharaohna mibingli chiho kahai tharan, shongfa naimeilala, Varena athumli Philistine ngaleivāk mathānvāmana, kaja Varena phaninga, “Kalikha mibingna rai khangarar theilaga athumwui ning ngacheihaida Egyptvāk hanungluihaipai.”

¹⁸Kha Varena athumli Red Seavāk lamhāngli kuilaga thānzata. Kala Israelnaobingna raisāri peiphungda Egyptwui eina shoka.

¹⁹ Mosesna Josephwui ara̱kui khuiphunga, kaja, “Varena nathumli rāhokhuira, chitharan iwui ara̱kui hiwui eina khuiungki kajina” da saklak eina hānghaisai.

²⁰Kala athumna Succothwui eina zatlaga lamhāngwui ayar Ethamli rāmrah vasāpama.

²¹Ngashunshongla ngayashongla zatpai khavai, PROHOna athumwui mangāli muiyawui pākra̱ eina rizatmi, kala ngayāshong mik theipai khavai meiwui pākra̱ eina athumwui shongzā thānmi;

²²ngashun muiyawui pākra̱, ngayā meiwui pākra̱ mibingwui eina mapākthuilakmana.