Read Tangkhul Naga SHONGZĀ 15 Bible Online

SHONGZĀ 15 - Tangkhul Naga bible

SHONGZĀ 15

¹ Chiwui thili Moses eina Israelnaobingna PROHOli laa hithāda sai, “PROHO mingli ina laa sāra, kaja ana tekmateilak eina yuimihaira; sigui katongala, ana ngayili horsangmihaira.”

² PROHO hi iwui yāng kala pangshapna, kala a iwui huikhame ngasāhaira; hi iwui Varena, kala ali ina masot chigatra, ishāvāwui Vare, ali ina sochikatra.

³PROHO sāshapa raimi akhana; PROHO hi awui mingna.

⁴“Pharaohwui siguigaribing kala awui ashangva̱ ana ngayili horsanga; kala ana hākakhui otva̱bing katonga Red Seali ngaphumhaira;

⁵Tara̱ khangaphaona athumli kuinamhaowa; lunggui thāda athumna kathukli ngaphumhaowa.”

⁶“O PROHO! nawui yāpang, matakhak kahai pangshapna, nawui yāpangna, O PROHO, yangkashebingli sākazamhaira.

⁷Nawui khangam-kharei khayā eina nana nawui yangkasheli mai shingasaka; nawui malungkhavāt nana chihovāda athum lanji thāda chuitāhaowa.

⁸Na nātāngkhurwui kakathangna, tara̱ kapungkai; ra̱phong kapungkāda phākho sāmiya; shamadru alungli kathuka china atang ngasakhaowa.

⁹Yangkashena, ‘Ina kharomvāra; ina angaphankhuira’ da hānga. Ngaponkakhui chi ngayarkhuida iwui ningyāngkhaung sākhuira; Iwui raighai sutkhuida ipāng eina athumli sāshimānra.

¹⁰Nana nawui masi phanda, ngayina athumli farora; mari thāda athumna kapanga tara̱lungli ngaphumhaowa.”

¹¹Varebingwui ngachaili na kathā khipa leili, O PROHO? Tharkhamatheng katharwui khayākakā tekhamatei otsak hakkhamahā, matakhak kahai ot kasā na kathā khipa lei?

¹²Nawui yāpāng katingshokta, ngaleina athumli mayuitāhaowa.

¹³“Nana ngatangkhui kahai athumli khangachei makhalei leikashi eina nana thānmi, nawui pangshap eina athumli nawui katharpamli thānvai.”

¹⁴Mibingna shāhaira, athum kathirra; Philistiali khaleibing khanangshunhaira.

¹⁵Ara Edomwui akhokabing khananghaira; Moabwui kathānabing kathirhaira; Canaanli khaleibing pangshap shimānhaira.

¹⁶Athumwuitungli khangachee-khangachā tāshunga, kaja napāngwui reikhamatai china athum lunggui thāda mangatha̱thukmana, nana ngatangkhui kahaibing nawui mibing, makanshokranglakha eina tangda, O PROHO.

¹⁷O PROHO, nawui pam sākahai chili, kathara shim, O PROHO, napāng eina sākahai chili, athumli nana thānvāda, nawui phungreili haimira.

¹⁸Mashimānla PROHOna mungra.

¹⁹Kaja Pharaohwui siguibing, siguigari eina ngasoda sigui kathaobingla ngayili kazang chitharan, PROHOna ngayiwui tara̱ athumwuitungli hanung ngasakta ngaphum ngasaka; kha Israelnaobingna ngayi lungli ngalei katheng tungli zata.

²⁰Chiwui thili marānva̱ Mariam, Aaronwui azarva̱na timbrel singda, kala preinao katonga phung singlaga ali pheichak eina ngasoda shurshoka.

²¹Kala Mariamna athumli laa sāchithei: “PROHOli laa sālu, kaja ana tekmateilak eina yuihaira; siguila, kala katongala ana ngayili horsangmihaira.”

²²Chiwui thili Mosesna Israelnaobingli Red Seawui eina thānda mangāshong Shurwui lamhāngli vai; athumna lamhāngli kathumthang zatlaga tara̱ masamphangthuwa.

²³Athumna Marahli vākashung tharan Marahwui tara̱ khāhaida mamangpaithuwa; chiwui vang Marah kaphokna.

²⁴Kala mibingna Mosesli kharopta hānga, “Ithum khi mangrakhala?”

²⁵Kala ana PROHOli ngakaowa; kala PROHOna ali thing akha chithei, kala anah chi tara̱li horsanga, chieina tara̱ chi shimhaowa. Apam chili PROHOna shiyan-chikan kala hukhum milaga athumwui ning yangda,

²⁶hānga, “Nathumna ningasharlak eina PROHO nathumwui Varewui akhon nganaakha, kala awui mikyanli khamashung ot chi saakha, kala awui ningkhami, kala shiyan chikan saikora mayonakha, ina Egyptnaobingli khami kazāt katha chi nathumwuitungli akhala marāngasakmara; kaja nathumli raikhame PROHO chi ina.”

²⁷Chiwui thili athumna Elimli vai, chili ura̱ tharāda khani kala khaneirong hangshini leisai; kala athumna tara̱ chiwui ngalemli angasāmkhui.