Read Tangkhul Naga SHONGZĀ 16 Bible Online

SHONGZĀ 16 - Tangkhul Naga bible

SHONGZĀ 16

¹Israelwui ashangva̱ katonga Elimwui eina zatphokta Sinwui lamhāngli vāshunga, chi Elim eina Sinai ngachaili lei; kala Egyptwui eina shokta kachāng khaniwui zimiksho tharāda kaphangā thangna.

²Lamhāngli leilakha Israelwui ashangva̱ katongana Moses eina Aaronli kharopta hānga,

³ “Egypt ngaleili khaih, sāmāng shaida kashakazā mavātlakla thoting eina pamda PROHOwui pāngli thihaisasi kaje phāra; khikhala jila mi hiyākha lamhāngli kathai eina thikhavai nanina ithumli thānkashokna.”

⁴ Chieina PROHOna Mosesli hānga, “Ina nathumwui vang kazingram eina zāt rotāmira, kala mibingna thangthangwui sharuk akhuiserra; chithāda athumna iwui hāngkachithei athi shurnika mashurnikhala ina athumli chāng yangra.

⁵Katharukathanga athumna ngathānthang ngamui kakhuili khani shida chungmeida ngamuikhuilaga khangarān sāra.”

⁶Chieina Moses eina Aaronna Israel saikorali hānga, “Ngazinshong nathumna theira kaja Egyptwui eina thānkashoka chi PROHOna,

⁷kala ngathorshong nathumna PROHOwui tekhamatei chi theira, kaja nathumna PROHOli kharopta khamatui ana shāhaira. Kaja ini khinida nathumna iniwuitungli kharopkhala?”

⁸Kala Mosesna hānga, “Nathumli ngazin sā mikashai, ngathor zāt thoting eina mikazā tharan hi PROHOna kaji nathumna theira, kaja ali kharopta khamatui PROHOna shāhaira—ini khida? Nathumwui kharopta khamatui chi inili maningmana, kha PROHOlina.”

⁹Kala Mosesna Aaronli hānga, “Israelwui ashangva̱li hānglu, ‘PROHOwui ngalemli rānganaimeilu, kaja ana nathumwui kharopta khamatui shāhaira.’”

¹⁰Kala Israel ashangva̱li kazipkhuida Aaronna kahāng atamli athumna lamhāngshong yangvai, kala yanglu, PROHOwui tekhamatei muiyālungli rāchithei.

¹¹Kala PROHOna Mosesli hānga,

¹²“Israelnaobingna kharopta khamatui chi ina shāhaira; athumli hānglu, ‘Ngazin nathumna sā shaira, kala ngathor khamui eina thotinghaora, chieina I PROHO nathumwui Vare china kaji nathumna theira,’”

¹³Ngazinshong kongkui yongrāda athumwui rāmrah pema, kala ngathor rāmrah kuimareida ikra̱ tai.

¹⁴Kala ikra̱ thengkahai eina lamhāngwui ngaleitungli manaktak kahai akha phāmkok thāda tāngpat eina ngachinga.

¹⁵ Israelnaobingna chi theilaga, “Hi khikhala?” da athum ngahān ngaroka. Kaja athumna chi khikhalada matheimana. Chieina Mosesna hānga, “Nathumna zākhavai PROHOna khami khamui chi hina.

¹⁶PROHOna hithāda hanghai: ‘Mi kachiva̱ kachichāwui zāshap ngamuikhuilu. Shimkhurli khalei mi mashing athishurda horsaikharip khuilu.’”

¹⁷Israelnaobingna angamuikhui, kaikhana chungmeida khui, kaikhana teomeida khui.

¹⁸ Kha horsai eina onkhayang chitharan kachungkha kakhui mila mataimana, kateokha kakhui mila mavātmana; kachichāwui zāshap khuisera.

¹⁹Kala Mosesna athumli hānga, “Khipākha ngathorshongwui vang mataipaimana.”

²⁰Kha athumna Moseswui tui makhuila kaikhana ngathorshongwui vang taikahai eina yunghaida mathan zanghairasai, kala Mosesna athumli malungvāthaowa.

²¹Ngathor kachida kachichāwui zāshap athumna akhuichinga, kha kazingkasā eina menghaowa

²²Katharukathang athumna khangachāwui chiyāyā sharuk khani kaja horsai khanirip khui, kala yaruiwui kathānabing china Mosesli vāda kahāng eina Mosesna hānga,

²³ “PROHOna hithāda kaso kahaina: akhama chingri eina ngasāmkakhui zimikshona, PROHOwui kathara sabbathna, khamui sāki kaji sāhaolu, hangki kaji hanghaolu, kala kataibing chi akhamawui vang haisālu.”

²⁴Mosesna kahāng chi tākam eina athumna akhamawui vang taihaiya; chiya khayungla mayungmana, kala mathanla mazangmana.

²⁵Kala Mosesna hānga, “Hi aja zālu, kaja PROHOwui sabbathna, hi aja luili masamphangluimara.

²⁶Tharukthang nathumna ngamuikhuira, kha kashinethang kaja PROHOwui sabbaththang masamphangmara.”

²⁷Kashinethang mi kaikhana angamui khavai vai, kha maleisāthuwa.

²⁸Kala PROHOna Mosesli hānga, “Karankha eina tangda nathumna iwui ningkhami kala ain manganāmarakhala?

²⁹Yanglu! PROHOna nathumli sabbath mihaira, chieina katharukathang khanithangwui zākhavai mihaira; mi kachiva̱ kachichāwui shimli pamda kashinethang khipākha maraaranu.”

³⁰Chithāda sāda mibingna kashinethang ngasāmkhui.

³¹ Kala Israel shimkhurna chiwui aming manna hoi; sachikomtha thai, charshihai kala khuira̱ eina kasā khamanaka khamui kashai thai.

³²Kala Mosesna hānga, “PROHOna hithāda hāngkahaina: ‘Egypt ngaleiwui eina thānshokta lamhāngli leilakha nathumli ina hi mizai kaji theikhavai thot kachida manna horsaikha haichinglu’ ji.”

³³ Kala Mosesna Aaronli hānga, “Ham akhali manna horsaikha sanglu, kala nawui thot peida PROHOwui ngalemli hailu.”

³⁴PROHOna Mosesli kahāng thāda Aaronna chi Ningkhami Oko mangāli runghai.

³⁵ Israelnaobingna athum pamkapai apam mavāshungranglakha eina tangda kum hangmati manna zai; Canaan ngalei thari mavāshungranglakha eina tangda manna zai.

³⁶(Horsaikha hi khuilui akhawui akhum tharāwui akhum akhali ngaraichai).