Read Tangkhul Naga SHONGZĀ 17 Bible Online

SHONGZĀ 17 - Tangkhul Naga bible

SHONGZĀ 17

¹PROHOna kakaso athishurda Israelwui ashangva̱na Sin lamhāngwui eina mathang mathang zata, kala Rephidimli apisanga; kha chili mibingna mangkhavai tara̱ masamphangthuwa.

²Chiwui vang eina mibingna Mosesli khayon phāda hānga, “Ithumli tara̱ mangkhavai milu.” Mosesna athumli hānga, “Ili khisāda khangui phenkhala? Khisāda PROHOli chāng yangkhala?”

³ Kha mibingna ra̱changnā kahaiwui vang Mosesli kharopta hānga, “Ithumla, naongarāla, sha̱keila ra̱kachang eina thikhavai khisāda Egyptwui eina thānshoksākhala?”

⁴Chieina Mosesna PROHOli ngakaoda hānga, “Mibing hili ina khisāurakhala? Athumna ili lunggui eina horthatki jihaira.”

⁵Kala PROHOna Mosesli hānga, “Nile kongli nana ngaphit khavai khāmshui chi khuiphungda, Israel ararbing kaikhali thānlaga mangāshong vālu.

⁶Yanglu, Horeb lunggui pamli ina nawui mangāli nganingra; lunghār chili ngaphitlu, chiwui eina mangkhavai tara̱ shokrāsāra.” Israel ararbingwui mangāli Mosesna chithāda sai.

⁷Ana apam chili Massah kala Meribah hoi, kaja Israelnaobingna khayon phāngarokta kala PROHOli chāng yangda “PROHOna ithumli ngasolika mangasomakhala?” da kahāngwui vangna.

⁸Rephidimli leilakha Israelnaobingli Amaleknaona rai rātai.

⁹Kala Mosesna Joshuali hānga, “Ithumwui vang mi kapangkhuida Amaleknaobingli angararlu, akhama ina Varewui khāmshui singlaga kaphungtonli kānganingra.”

¹⁰Mosesna kahāng athishurda Joshuana Amaleknaobingli angarara; kala Moses, Aaron, Hur athumna kaphungtonli kai.

¹¹Mosesna apāng katinglakha eina tangda Israelnaona yui, kala apāng haizangkhaleoda Amaleknaobingna yui.

¹²Kha Moseswui pāng chothaoda, lunggui akha khuilaga ana chili pama, Aaron eina Hurna apāng lākharipta singlaga khāngngachona; chithāda zimik matunranglakha eina tangda zungpama,

¹³kala Joshuana Amaleknaoli kala awui mibingli raighai eina ngararda yuikhui.

¹⁴ Kala PROHOna Mosesli hānga, “Hi mamalai khavai lairik akhali kapisanglu, kala chi Joshuawui khanākhurli hāngsanglu kaja okathuili Amaleknaobingli maphaningunglak khavai ina shimitmichaohaora.”

¹⁵Mosesna hanphut akha sākhui kala chiwui aming, PROHO iwui philānna da phokmida,

¹⁶hānga, “PROHOwui philāntungli pāng akha! Thot kachida Amaleknaoli PROHOna rai ngararchingra.” da hānga.