Read Tangkhul Naga SHONGZĀ 2 Bible Online

SHONGZĀ 2 - Tangkhul Naga bible

SHONGZĀ 2

¹Chitharan Levi shimkhurwui mayarnao akhana Levi sha̱nao akhali ngakuma.

² Preiva̱ chi nao vaida mayarnao akha pharai. Ana nao chi yanglaga mathālakhaoda kachāng kathum thumhai.

³Kha mathumrarchingthuda chihirthing eina luk akha sākhuida bitumen eina khe neokazazaklaga nao chi chili sanglaga kongpheili, titi ngachai vāhaihaowa.

⁴Achonva̱na khi shoknikhala da khalāda ngashānpama.

⁵ Atam chichangli Pharaohwui naongalava̱ kongli ra̱vaikida awui rao sha̱naobingli ngasoda kongpheili vai; kala titi zingli luknao chi kathei eina raopava̱li vākhui ngasaka.

⁶Ana phutkhayang eina nao zangsai; kala yanglu nao chi chapsai. Ana nao chili lumashanhaowa, kala “Hi Hebrewnaowui naolakra” da hānga.

⁷Chieina Pharaohwui naongalava̱li nao chiwui achonva̱ china hānga, “Nao hi nganaomi khavai Hebrew preinao akha ahomirala?”

⁸Pharaohwui naongalava̱na hānga, “Ahokhuilu.” Chieina ngalava̱ china naowui ava̱va̱li unghokhui.

⁹Kala Pharaohwui naongalava̱na hānga, “Nao hi iwui vang ungnganaomilu, ina chiwui aman mira.” Chieina preiva̱ china nao chi khuida ungnganaokhui.

¹⁰ Kala nao chi raruda Pharaohwui naongalāva̱li khuivāmi, kala awui nao sāhaowa; kala ana ali Moses da phokmi, kaja ana hānga, “Ali ina tara̱wui eina khuikashokna.”

¹¹ Mosesna raruda, thangzimikshokha awui mibingli yaovāda athumwui kharita ot kasā chi thei; awui mi, Hebrew akhali Egyptnao akhana shaokasā athei.

¹² Ana kapeiung kapeivāda mi maleikasā eina Egyptnaopā chili sāthatlaga situilungli yātphumhaowa.

¹³Akhama kathā khavā tharan, Hebrewnao khani ngama̱sai. Chieina ana khayonpa chili hānga, “Khisāda nasotali shaokhala?”

¹⁴ Ana ngahānkai, “Ithumwuitungli bichar sākhavai nali khipāna wungnao kala mashunwo sāngasakkhala? Egyptnaoli shaokathat thāda ilila shaothatki kajila?” Chiwui vang Mosesna ngacheehaida phaninga, “Kachangkhat eina otsak hi theihaira.”

¹⁵ Pharaohna chi kashā eina, ali sāthat khavai phai. Kha Mosesna Pharaohwui eina yāmhaida Midian ngaleili vāpamhaowa; kala ana ra̱khongphei akhali apamzanga.

¹⁶Chitharan Midian pāngmonwui naongalava̱ shini leisai, athumna avāva̱wui yaoshangli tara̱ shiman khavai reija̱ chipemkida tara̱ sokkhavai rārāsai.

¹⁷Yaokahom kachikathābingna rāda athumli kashama; kha Mosesna nganingkāda athumli ngachonmi, kala athumwui yaoshangli tara̱ shimana.

¹⁸Athumna avāva̱ Reuelwuili khaung eina, ana ngahāna, “Aja hiyākha thākta khaung hi kathāhaokhala?”

¹⁹Athumna ngahānkai, “Egyptnao akhana yaokahomabingwui eina ngachonmida ithumli tara̱ eina tangda ana sokmi, kala yaoshanglila shimana.”

²⁰Ana anao ngalāva̱bingli hānga, “A kali leili? Khisāda ali nathumna nothāhao? Ahokhuilu, ungphazākhuiranu.”

²¹Kala Mosesna ashiwuili pamkhavai mayāhaowa, kala ana Mosesli anaongalava̱ Zipporahli miya.

²²Ana mayarnao akha pharāda Gershom hoi, kaja Mosesna hānga, “I mi kateiwui ngaleili kapāna kha̱mi ngasāsai.”

²³Atam kasāngkhawui thili Egyptwui awunga thihaowa. Kala Israelnaobingna raopamwui lungli khanangda ringkhangā khangahui, kala ngachonmi khavai khangakao chi Varewuili shākai.

²⁴ Kala Varena athumwui ringkhangā chi shāda, Abraham, Isaac, kala Jacobli tuingashit kasā chi phaningunga.

²⁵Kala Varena Israelnaobingli yanglaga athumwui kashok-kazang chi theimi.