Read Tangkhul Naga SHONGZĀ 21 Bible Online

SHONGZĀ 21 - Tangkhul Naga bible

SHONGZĀ 21

¹“Mibingli nana hāngchitheiki kaji shiyanbing chi hina:

² Nathumna raonao sākhavai Hebrewnao lokhuiakha, ana kum tharuk otram ngatha̱mira, kashine kum awui eina khikha makhuila khalem eina chihohaora.

³Amāng raakha amāng shokra; apreiva̱ khuiraakha apreiva̱la ali ngasoshokra.

⁴Shimva̱na ngalā khuisangmida naola pharākha, preiva̱ eina naomayara chi shimva̱wui sāra, amāng thuimara.

⁵Kha raonao china iwui akhavāli, ipreiva̱li, inaongarāli leishiya I mathuimara jiakha,

⁶shimva̱ china Varewui mangāli khuivāra, kala khāmongpheili, lah pākra̱pheili nganing ngasakta shimva̱na borā kapim eina khanā sa̱mira; kala mirin peida ali otram ngatha̱ra.

⁷“Mi akhana anaongalava̱li raonao sākhavai yorakha, mayarnaoli kachiho thāda ali khalem eina machithotpaimara.

⁸Ali kapangkakhuia awui shimva̱li apreiva̱ sāda ningyāng maung ngasakrarakha, ali ngatangkhui ngasakpai, yur khangatei mili mayorsangpaimana; kaja ana ning katong maleila sāmi kahaiwui vangna.

⁹Anaomayarawui vang khuisangmiakha, anaongalava̱li kasā thāda sāki kajina.

¹⁰Ana ngalā khangatei khuiakha kharepava̱li awui kashakazā, kashankachon kala preiva̱wui yarla mavātmipaimana.

¹¹Ana ot kathum hi awui vang masāmiakha, raopava̱ china leiman maphungla, pheisā mashānla thuipaira.

¹²“Kachikathāna mi akhali shaolaga thihaiakha alila shaothatra.

¹³ Kha ana shongrimda kasā maningla Varena shokkhangasaka otshot ngasasakha, ina nathumwui ayāmsang khavai nathumwui vang apam akha ngaranmira chili yāmvāda mathimara.

¹⁴Kha kachikathāna malungvātta mi akhali sāthatphalungkida shaoakha, nathumna ale iwui hanphutwui eina khuilaga shaothatra.

¹⁵“Kachikathāna avāva̱li nilala, ava̱va̱li nilala shaoakha chipāli shaothatra.

¹⁶ “Mi khaleeali, yorlapai awuili haisalapai, ali shaothatra.

¹⁷ “Kachikathāna avāva̱li nilala, lah ava̱va̱li nilala khonshiakha mi chipāli shaothatra.

¹⁸“Ngama̱ ngaroklaga akhana akhapāli ngalung eina nilala, lah pāng ngashumda shaoda mathilala kazāda petli piakha,

¹⁹chiwui thili kakazāpa chi khāmshui singda yaothuishapakha kashaopali kashong malāngmara, kha awui ngalangman kala maraichangranglakha eina tangda yangmira.

²⁰“Raonaowui akhavāna awui rao mayarnao nilala, sha̱nao nilala, lijei eina ngaphitta thihaiakha mipa chili kashong lāngra.

²¹Kha thangkha, khanithanglala ringakha, kashong malāngmara, kaja raonao chi awui lanna.

²²“Kalikha mi khangama̱li nao khavai sha̱naoli saza̱da nao tāhailala, kalākashi maleiakha, ali sakaza̱pa chili agaharawui ningkachāng athishurda kashong lāngra; kala bichar mashunwobingna retkhami athishurda miphalungra.

²³ Kalikhada kalākashi shokakha, manglāwui vang manglā,

²⁴ mikwui vang mik, hā wui vang hā, pāngwui vang pāng, pheiwui vang phei,

²⁵mei eina kasa̱wui vang mei eina kasa̱, khamāwui vang khamā, kashirwui vang kashir runra.

²⁶“Mi akhana awui raonao, mayarnaolapai, sha̱naolapai amikli shaoza̱da saphātmihaiakha, amik chiwui vang ningkhān ngasakhaora.

²⁷Kalikha ana, awui raonao mayarnao lah sha̱naoli ahā shirtāmihaiakha, ahāwui vang ningkhān ngasakhaora.

²⁸“Mukkāna mayarnaoli nilala, sha̱naoli nilala thothaiakha sei chi lunggui eina horthathaora, asā mashaipaimara; kha sei akhavāwui khayon maleimara,

²⁹kha ridala thotching kaje, akhavāli hānglaga ana manarhaimada mayarnaoli nilala, sha̱naoli nilala thotkahaina jiakha, sei chi lunggui eina horthatra, kala akhavālila shaothatra.

³⁰Mipa chili ngatangkhuira jiakha, amanglāwui vang hiyākha khuira kaji chi ana miphalungra.

³¹Miwui naomayaraliranu, naongalava̱liranu, thotakha akhavāpa chi hiwui shiyan hi zatphalungra.

³²Mukkāna rao sha̱naoliranu, rao mayarnaoliranu thothaiakha, akhavā china rao chiwui akhavāpali lupāsā thumra mira kala mukkā chi lunggui eina horthathaora.

³³“Mi akhana chom kotta maphinhaimada mukkā nilala, gadhā nilala chili tazanghaiakha,

³⁴chom kachuiapa china lupā eina runra, kala kathi sā chi awui sāra.

³⁵Mi akhawui mukkāna khangateiwui mukkā thotthathaiakha, makathe sei chi yorlaga ani ngayarpakra, kala kathi sā chila ani ngalākra.

³⁶Chi maningakha rida mukkā chi thotza̱ra kaji thatheilaga akhavāna manar kahaiwui vangakha, mukkāwui vang mukkā runra, kala kathi sā chi awui sāra.