Read Tangkhul Naga SHONGZĀ 24 Bible Online

SHONGZĀ 24 - Tangkhul Naga bible

SHONGZĀ 24

¹Kala ana Mosesli hānga, “Na eina Aaron, Nadab eina Abihu, kala Israelwui ararnaobing hangshini PROHOwuili kālu, kala khalāda khorumlu.

²Mosesmāngna PROHOli nganaira; kha khangateibing marānganaipaimara; kala mibingna ali ngasoda makāpaimara.”

³Mosesna rāda PROHOwui tui saikora kala shiyan saikora mibingli hānga; kala mibing saikorana khokkha sāda akhon akha eina, “PROHOna hāngkahai saikora chi ithumna sāra” da hānga.

⁴Kala Mosesna PROHOwui tui saikora chi kapikhuiya. Kala ana ngathorthāk thuilaga phungreipheili hanphut akha sākhui, kala Israel shang tharāda khaniwui athishurda pākra̱ tharāda khani sakai.

⁵Kala ana Israelwui yaronnaobingli chihoda rikkatā kachigat eina ningyatchigatwui vang mukkā kachungkha PROHOli apha̱ ngasaka.

⁶Kala Mosesna ashee tangkhai khuilaga khongsaili sanghai, kala ashee tangkhai hanphutli horrora.

⁷Chiwui thili ana tuingashitwui lairik chi khuida mi katongana shākhavai pai, kala athumna, “PROHOna hāngkahai saikora chi ithum sāra, kala kahāng nganāra” da hānga.

⁸ Chieina Mosesna ashee chi khuilaga mibingli horrorda hānga, “Yanglu, tuingashit ashee tui saikora hiwui athishurda PROHOna nathumli khangashit kasāna.”

⁹Hiwui thili Moses eina Aaron, Nadab eina Abihu, kala Israelwui ararnaobing hangshini china kai,

¹⁰kala athumna Israelwui Vareli thei; kala awui pheizingli aman kasaka sapphire ngalung eina hamkahai thāda kala kazingramwui khamathing thāda thei.

¹¹Israelwui akhokabingwuitungli ana pāng maparmana; athumna Vareli thei kala phāshak phāzai.

¹² PROHOna Mosesli hānga, “Phungreitungli ili kāda kāngaraisālu; kala athumli tamchithei khavai ina kapi kahai iwui ain kala ningkhami kapisangmi kahai lungphek chi mira.”

¹³Chieina Mosesna awui rao Joshuali ngasoda Varewui phungreili kai.

¹⁴Kala kathānabing chili ana hānga, “Ini malatungranglakha eina tangda hili ngaraisālu, kala yanglu, Aaron eina Hur leili, kachikathāna hāngkhangai apong leiakha anili hānglu.”

¹⁵Chiwui thili Mosesna phungreili kai, kala phungrei chi muiyāna khaluiphinhaowa.

¹⁶PROHOwui tekhamatei chi Sinai Kaphungli tāpama, kala tharukthang muiyāna khaluiphinhaowa; kala kashinethang muiyālungwui eina ana Mosesli hoi.

¹⁷PROHOwui tekhamatei azak chi Israelnaobingwui miktāli phungreiton chili mei kachui thai.

¹⁸ Kala Mosesna muiyālungli zangda phungreili kai. Kala Moses ngashun hangmati kala ngayā hangmati da phungrei tungli kāpama.