Read Tangkhul Naga SHONGZĀ 25 Bible Online

SHONGZĀ 25 - Tangkhul Naga bible

SHONGZĀ 25

¹PROHOna Mosesli hānga,

² “Iwui vang kachigat akha khuikhavai Israelnaobingli hānglu; mi kachiva̱wui wuklung eina mikhangai kachigat chi nana iwui vang khuimilu.

³Kala athumwui eina kachigat samphangki kajibing chi hina: sinā, lupāsā kala pithrai,

⁴khamayinga kala hungrisi, hungshi kahai kala manakta hākakhui kazaira̱wui chonsā, meha,

⁵yaohui mathen kahai, mehui, acaciathing,

⁶thaomeiwui vang thaora̱, tharchisin khavai thao ayur-ayā kala nganamkaphā thao,

⁷onyx ngalung kala ephod eina thikhomli ruksang khavai ngalung.

⁸Kala ina athumwui alungli ngasopam khavai kathara shim akha sākhui ngasaklu.

⁹Tabernacle sākhavai kala chiwui thongthāng, hithāda saluda ina nali chithei kahai athishurda nana chithāda sāra.”

¹⁰ “Athumna acaciathing eina ningkhami oko akha sākhuira; khuining khani makhai kasāng, khuining akha makhai kapāk, kala khuining akha makhai kajui sākhuira.

¹¹Kala nathumna chi sinā kachanga eina heirorra, alung ayār heirorthathuiki kajina, akhamong kuimareida sinā eina heiungra.

¹²Kala sinā khui mati heikhuilaga aphei matili pānra, khani lākhavāk, khanina akhavāk da.

¹³Nathumna acaciathing eina thingphān sākhuida sinā heimitrorra.

¹⁴Kala nathumna ningkhami oko ngava̱ khavai thingphān khani chi sinākhui pānkhavai chili ruisangra.

¹⁵Thingphān chi okowui eina makhuishokla thāda haira.

¹⁶Kala nathumna ningkhami oko chili ina nali miki kaji tuingashit chi sanghaira.”

¹⁷ “Kala nathumna sinā kachanga eina kasā lukhamashanwui pamkhong akha sākhuilu; khuining khani tangkhai kasāng, kala khuining akha tangkhai pāk jira.

¹⁸Kala nathumna sinā eina cherubim khani sākhuira; shaokhuilaga lukhamashan pamkhongwui arāp khaninili haira.

¹⁹Cherub akhana lākhavāk, akhapāna akhavāk da, kala lukhamashan pamkhongli sānarra.

²⁰Cherubim khaniwui angachāng hārshokta lukhamashan pamkhong chi kahārphinra, kala akha eina akha ningkhami okovāk yangngasungra.

²¹Kala nathumna lukhamashan pamkhong chi ningkhami oko tungli haira, kala oko chiwui lungli ina nali miki kaji lungphek khani chi sanghaira.

²²Ina nali chili samphangra, lukhamashan pamkhong tungli, kala ningkhami oko tungli khalei cherub khani chiwui ngachai eina, Israelnaobingli ningmiki kaji saikora ina nali ngazekra.”

²³ “Kala nathumna acaciathing eina table akha, khuining khani sāng, khuiningkha pāk, kala khuining akha makhai juida sākhuira.

²⁴Nathumna chi sinā kachanga eina heirorra, kala kuimareida sinā eina heiungra.

²⁵Kala kuimareida akom pāngmayā rikha sangunglaga akom chi sinā eina heiungra.

²⁶Kala nathumna sinākhui mati sākhuilaga, sinākhui mati chi achikun mati kala aphei mati chili akharip pānra.

²⁷Thingphān chi sanglaga table chi ngava̱zatpai khavai akhui chi akomli nganaida pānra.

²⁸Nathumna acaciathing eina thingphān sinā heimitrorlaga sākhuida table chieina ngava̱ra,

²⁹kala chiwui khongphei khongpāng nganamkaphā thaowui vang, kala hanphut kharektā khavai koklui, khongkam sinā kachanga eina sākhuira.

³⁰ Kala nathumna Ngasokhamiwui khamui iwui mangāli tabletungli haichingphalungra.”

³¹ “Kala nana thaomeishong sinā kachanga eina sākhuilu. Rungkhavaila, thaomeishongwui athingla shaokhuira; thaomeishongwui akhongnao, athingnao kala awon khangamān chi sātkha sāra.

³²Kala arāp akhashong aphāng kathum lakhashong kathum da thaomeishong chili aphāng tharuk shokra,

³³athing eina awonwuili akhongnao ava̱va̱li almond thāda akharip akhashong kathum, lakhashong kathum da thaomeishongli tharuk sāsangra.

³⁴Kala thaomeishong chili almond thāda akhongnao mati athingbing eina awonbingli ngasoda kāra,

³⁵kala athing atang akha eina chiwui azingli thaomeishongwui eina aphāng tharuk chi khanini eina shokra.

³⁶Athingbing eina aphangbing chi asā akha sāra, kala katonga chi sinā kachanga eina shaokakhuiya asā akha sāra.

³⁷Kala nathumna thaomeishongwui vang thaomei shini sākhuilu kala kāparhaida china mangāshong horvāra.

³⁸Chiwui changjeebing kala sangkhavai akhongla sinā kachanga eina sāra.

³⁹Hiwui khorkhongbing kala ayur saikora hi kachanga sinā talent akha eina sāra.

⁴⁰ Phungreili nali chithei kahai chi horzakta sākhavai ningngasharlu.”