Read Tangkhul Naga SHONGZĀ 27 Bible Online

SHONGZĀ 27 - Tangkhul Naga bible

SHONGZĀ 27

¹“Nathumna acaciathing eina hanphut akha sākhuira, asān-aret ngaraichāda khuining phangāngāra, kala khuining kathum juira.

²Kala nana achithek mati chili angaji akharip thingsā eina sāshānda pithrai heirorra.

³Hotla mayākhui khavai ham, belcha, khongsai, marik-kapei kala meikhong sāsangra; khorkhong saikora pithrai eina sāserra.

⁴Kala chiwui vang nana ngayāng khavai thāda pithrai eina sākhuira; kala ngayāng khavaiwuitungli pithrai eina achikun matitili akhui akharip sāsanglu.

⁵Kala nana chi hanphutkhongwui azingli sangda ngayāng khavai china hanphutwui ngahunshingli tāza̱ra.

⁶Kala nathumna hanphutwui vang thingphān acaciathing eina sākhuida pithrai heirorra.

⁷Kala thingphān chi akhui chieina thara̱sangra, chithāda thingphān chi ngava̱kazat tharan hanphutwui lākharipta pithraikhuili shongkhuipaira.

⁸Phungreitungli nali chithei kahai chithāda hanphut chi chikhai eina akhur utlaga sākhuira.”

⁹ “Nathumna tabernaclewui yāngkhup sākhuira. Azingshongwui yāngkhupli hokthāng khavai, manakta hākakhui kazaira̱ chonsāwui chonrān khuining shākha sangda arāp akhashong sāsangra;

¹⁰chiwui pākra̱ maga̱ wui aphei maga̱ pithrai eina sāra, kha pākra̱li hokkhui khavai eina masa̱khui khavai lupāsā eina sāra.

¹¹Chi tākam eina atungshongwui asānli hokthāng khavai khuining shākha kasāng, pithrai eina kasā chiwui pākra̱ maga̱, kala aphei maga̱, kha pākra̱li hokkhui khavai eina masa̱khui khavai chiya lupāsā eina sāra.

¹²Kala zingtungshongwui yāngkhup aretwui vang hokthāng khavai khuining hangphangā, pākra̱ tharā kala aphei tharāra.

¹³Mangāshong kaja zingshoshongwui yāngkhup aret khuining hangphangāra.

¹⁴Ngavei chiwui arāp akhawui hokthāng khavai khuining tharāda phangā, pākra̱ kathum kala aphei kathumra.

¹⁵Arap khangatei akhavākwui hokthāng khavai khuining tharāda phangā, pākra̱ kathum kala aphei kathumra.”

¹⁶“Ngavei chiwui chonrān khuining maga̱ sāngra, chi khamayinga, hungrisi kala hungshi kahai kala manakta hākakhui kazaira̱ eina kasā chonsā kala kapim eina yekkasang chonsā eina sāra; chiwui pākra̱ matiwui aphei mati kāra.

¹⁷Yāngkhup kuimareidawui pākra̱bing, chiwui hokkhui khavaibing lupāsā eina masa̱khuiserra, kala apheibing pithraisā eina sāra.

¹⁸Yāngkhup chiwui asān khuining shākha, aret hangphangā, kala kajui khuining phangā, hokthāng khavai manakta hākakhui kazaira̱wui chonsā kala pithraisāwui aphei eina sāra.

¹⁹Tabernaclewui shikachin khorkhongbing saikora, shunkhavai saikora, kala yāngkhupwui shunkhavai saikora pithraisā eina sāserra.”

²⁰“Kala Israelwui mibingli khamathinga olive thao shireikakhuiya chi thaomeiwui vang khuirāmi khavai kasora, chithāda mangasāmlakla thaomei shārhaipam khavaina.

²¹Ningkhami oko haikhavai mairār kānshokta kazip khavai kachonshimwui alungli Aaron eina anaomayarabingna ngazin eina thuilaga ngathor eina tangda PROHOwui mangāli mayonra. Hi Israelwui mibingna thot kachida mamalaila mayonkhavaiwui shiyanna.”