Read Tangkhul Naga SHONGZĀ 28 Bible Online

SHONGZĀ 28 - Tangkhul Naga bible

SHONGZĀ 28

¹“Chiwui thili nachinā Aaron, kala anaomayarabing ali ngasoda Israelnaobingwui eina pāngmon sāda ili sheba sākhavai — Aaron eina Aaronwui naomayarabing, Nadab eina Abihu, kala Eleazer eina Ithamar nawui ngalemli khuirālu.

²Kala nathumna nachinā Aaronwui vang tekmatei khavai kala mathā khavai kathara sāribing sākhuira.

³Kala ina ningthem mihaida sākatheiabing saikorali nana hānglaga, Aaronna iwui pāngmon sākhavai tharkachigatwui ngavai khavai sāribing khopngasaklu.

⁴Athumna sāri chi hithāda sāra: thikom akha, ephod akha, katuma phahon khānkhanānga coat akha, kuitei akha, kala shanneira̱ akha sāra; athumna nachinā Aaron kala naongarā pāngmon sāda ili otram ngatha̱mi khavai kathara sāri sākhuira.

⁵Athumna sinā, khamayinga, hungrisi, hungshi kahai kala manakta hākakhui kazaira̱ eina kasā chonsā samphangra.

⁶ Athumna sinā, khamayinga, hungrisi, hungshi kahai kala manakta hākakhui kazaira̱ eina kasā chonsāwui eina ephod mathālak kahai sākhuira.

⁷Chiwui amarei akatanga khanili ngasunkhuilaga yārtuipar khani kāra.

⁸Kala themlāk eina rakkakhui apeng hokthāng khavai chila sinā, khamayinga, hungrisi, kala hungshi kahai kala manakta hākakhui kazaira̱ eina kasā chonsā eina sāra.

⁹Kala nana onyx ngalung khani khuilaga chiwuitungli Israelwui naomayarabingwui aming ruksangra,

¹⁰ngalung akhali tharukwui ming, kala akhapāli katei tharukwui aming, kharar khangano athishurda ruksangra.

¹¹Sinā lupā kasaana khutopli mahor sākasang thāda lunggui khani chili nana Israelwui naomayarabingwui aming ruksangra; chibingli sināwui akhara̱ eina khayeka chieina katimshānra.

¹²Kala nana ngalung khani chi ephodwui yārtuiparli sāsangda Israelwui naomayarabingli phaningung khavai sāra; kala Aaronna athumwui mingbing chi PROHOwui mangāli yartuili phungkhuida phaningung khavaiwui vangna.

¹³Kala nana sināwui akhara̱ eina rukkasang sākhuira,

¹⁴kala sinā kachanga peng khani, seipeng thāda shirei kahai kala shirei kahai peng chi rukkasang chili hoksangra.”

¹⁵ “Kala bicharwui thikhom akha themlāk eina ephod kasā thāda nana sākhuira; sināwui khamayinga, hungrisi hungshi kahai kala manakta hākakhui kazaira̱wui chonsā eina sāra.

¹⁶Asān aret ngaraichada khani shida ngaphora, aret pangmayākha, asān pangmayākhara.

¹⁷Nana chili ngalung ngaher mati sāsangra, khare apengli sardius, topaz, carbuncle,

¹⁸kakhane apengli emerald, sapphire, kala hirā;

¹⁹kakathuma apengli jacinth, agate, kala amethyst;

²⁰khamate apengli beryl, onyx kala jasper; saikora hi sinā khara̱ eina ruksangserra.

²¹Israelwui naomayarabingwui aming eina ngasoda ngalung tharāda khani leira; mahor namkhavai thāda shang tharāda khaniwui aming ruksangserra.

²²Kala nana thikhomwui vang sinā kachanga seipeng thāda hākakhui apeng sākhuira.

²³kala nana thikhomwui vang sināwui akhui khani sākhuida chi thikhomwui achikun khanili sāshānra.

²⁴Kala nana thikhomwui achikunli kakā akhui khani chili sināwui apeng khani chi ruisangra;

²⁵apeng khani chiwui amarei khani chi sinā ruksanglaga chili pānkhuira, laga ephodwui mangāshong yārtuiparli hokshānkhuira.

²⁶Kala nana sināwui akhui khani sākhuida thikhomwui akatanga amarei khaniwui alungshong ephod ngalemli haira.

²⁷Kala nana sināwui akhui khani sālaga ephodwui yārtuipar khaniwui azingpamwui mangāshong phonda themlāk eina raksang kahai apeng chili ngasun ngasaklu.

²⁸Kala nathumna thikhomwui akhui eina ephodwui akhui chi khamaying khara̱ eina khalapshānra, kaja themlāk eina raksang kahai ephodwui apeng chili ngashikta thikhom chi ephodwui eina mangachoshok khavaina.”

²⁹“Chithāda sāda Israelwui naomayarabingwui aming saikora bicharwui thikhom eina Aaronna wuklungli phungzatra, kala katharapamli kazang chitharan PROHOwui mangāli phaningungshon khavai sāra.

³⁰ Kala bicharwui thikhomli Urim eina Thummim kāsangra, kala ana PROHOwui mangāli kazang tharan chi awui wuklungli leira chithāda sāda PROHOwui mangāli Aaronna Israelnaobingwui bichar chi awui wuklungli haichingra.”

³¹ “Kala nana ephodwui katuma phahon saikora khamayinga eina sāserra.

³²Phahon chiwui alungthungli akui zangkhavai akhur akha utra, kala chi makāk khavai akhur chi kuimareida rakkakhuiya chonsā eina katim-ungra.

³³Awui katuma phahonli khamaying, hungrisi kala hungshi kahai eina kabothei sāsangra, kala katuma phahon kuimareida sināwui kantā amataktakli sāsangra,

³⁴sinā kantā akha kala kabothei akha, sinā kantā akha kala kabothei akhada katuma phahon kuimareida sāsangra.

³⁵Kala otram khangatha̱ tharan Aaronna ngavaira, kala katharapamli, PROHOwui mangāli kazang tharan kala kashok tharan akhon chi shāra, maningakha a thihaipai.”

³⁶ “Kala sinā kachanga eina khongphei akha sākhuida khutopli rukkasang thāda, ‘PROHOli Tharmathengranu’ da ruksangra.

³⁷Kala chi nathumna khamayinga khara̱ eina kuiteili pānshānra; chi kuiteiwui mangāli sangki kajina.

³⁸Chi Aaronwui khaveili hokthāngra, kala Israelnaobingna tharkhavai tharkachigat pha̱kaphayāwui khayonkhamāng chi Aaronna phungra; hi awui khaveili haichingra kaja PROHOwui mangāli khuisangpai khavaina.”

³⁹“Kala coat chi akhān khānshang khānkatā khamanaka chonsā eina nana rakkhuira, kuiteila khamanaka kazaira̱ chonsā eina sākhuira, kala shānneira̱ kapim eina aphor phorsangra.”

⁴⁰“Kala Aaronwui naomayarawui vang coat, shānneira̱ kala kuihon sākhuilu, chi tekmatei khavai kala mathā khavaina.

⁴¹Kala nana nachinā Aaronli kala awui naomayarabingli ngavaimida, thao neomira, kala tharchisinmira kala tharchigatta ili otram ngatha̱da iwui pāngmon sāra.

⁴²Kala athumwui phasā fakham khavai khamanaka chonsā eina malao, kashān eina thuilaga khaishāng tāfakhuida sāmilu;

⁴³kala Aaron eina anaomayarabingna kazip khavai kachonshimli, lah katharapamli otram ngatha̱ khavai hanphut ngalemli kazang chitharan chi ngavaichingra; maningakha athum khalattawuitungli khayon khuirāda thipai. Hi awui vangla kala awui thiwui naothotwui vangla leichingki kaji shiyan-chikan ngasāra.”