Read Tangkhul Naga SHONGZĀ 29 Bible Online

SHONGZĀ 29 - Tangkhul Naga bible

SHONGZĀ 29

¹ “Ara nana athumli iwui pāngmon sāda otram ngatha̱ khavai hithāda tharchigatra. Achuk kapeiya mukkā akha kala yaovā khani khuilu;

²kala khawok makazang khamui, khawok makazanga thao eina khamanāt khamui, thao eina teiror kahai khawok makazang katheng khamui, hi nana khamanaka kehuwui mathir eina sāra.

³Nana chi luk akhali sanglaga khuirālu, kala mukkā eina yaovā khani chila khuirālu.”

⁴“Nana Aaron eina awui naomayarabingli kazip khavai kachonshim khāmongli khuirālu kala tara̱ eina ra̱vaimilu.

⁵Kala nana sāribing chi khuida Aaronli ephodwui katuma sāri chi ngavaimilu, ephodla, thikhomla shaksāmida themlāk eina rakkakhui ephodwui chonsā chieina neimilu;

⁶kala akuili kuitei chi teimida kathara kuihon chi kuiteili sangmilu.

⁷Kala nana neokhavai thao chi akuili heirorda ali neomilu.”

⁸“Chiwui thili anaomayarabingli khuirāda katuma phahon ngavaimilu,

⁹kala shānneira̱ neimida kuihonla ngahonmilu; chieina pāngmonwui ot hi athumwui shiyan ngasāchingra. Chithāda sāda nana Aaron eina anaomayarabingli tharchisinra.”

¹⁰“Chiwui thili mukkā chi kazip khavai kachonshim mangāli khuirāra. Aaron kala anaomayarabingna mukkawui kuitungli pāng parra,

¹¹kala nana PROHOwui mangāli kazip khavai kachonshim khāmongpheili mukkā chi taithatra,

¹²kala mukkawui ashee chi ngayarda khuida hanphutwui angacheeli napāng mareng eina neolu, kala ashee katai chi hanphutpheili heirorlu.

¹³Kala akharili khangathān athao katonga, amathinwui athao, amakei khani kala chili khangathān athao saikora chi hanphutli riktālu.

¹⁴Kha mukkā chiwui asā eina ahui kala apai, rāmrah ayarli kanshokta riktālu, chi suiham chigatna.”

¹⁵“Chiwui thili yaovā akha khuida Aaron eina anaomayarabingna yaovāwui akuitungli apāng parra,

¹⁶kala nana yaovā chi taithatra, kala awui ashee chi khuilaga hanphutli kuimareida heirorra.

¹⁷Chiwui thili nana yaovā chi malim sālaga, akhari eina akho pheokazaklaga amalimbing chili akui eina ngasoda sangrumlu,

¹⁸ Kala yaovā chi tongda hanphutli riktālu; hi PROHOwui vang rikkatā kachigatna, nganamkaphā otna, PROHOli mei eina kachigata otna.”

¹⁹“Nana yaovā akhapa chi khuilaga Aaron eina anaomayarabingna yaovāwui kuitungli pāng parra,

²⁰Kala nana yaovā chi taithatra, kala ashee ngayarda khuilaga Aaronwui nākor yāshongwui atonli, kala anaomayarabingwui nākor yāshongwui atonli, kala athumwui pangyungho yāshong kala pheiyungho yāshong neomiserlu; katai chi hanphut kuimareida heirorlu.

²¹Chiwui thili hanphutli khalei ashee chi ngayarkhuida tharchisin khavai thao eina ngasoda Aaronli kala awui sārili chairorlu; kala anaomayarabinglila, athumwui sārilila chairorlu; chieina ala, awui sārila, anaomayarabingla, athumwui sārila ali ngasoda tharmathenghaora.”

²²“Nana yao chiwui athao, khameithao, akharili kharoma athao, amathinli khangathāna athao, kala amakei khani eina chili khangathāna athao, kala yā khaishāng (kaja hi tharkachisinwui yaona) khuilu,

²³kala khamuitang akha, thao khangui khamuitang akha, thao makhangui khamuitang akha, khawok makazang PROHOwui mangāwui lukli kasang chiwui eina khuilaga;

²⁴Aaronwui kala anaomayarabingwui pāngli sangmida PROHOwui mangāli khayit kachigat sāda khayitra.

²⁵Chiwui thili nana athumwui pāng eina khuira, kala rikkatā pha̱kaphayā chiwuitungli hanphutli riktālu, PROHOwui mangāli nganamkaphā otna, hi PROHOwui vang mei eina rikkatā kachigatna.”

²⁶“Aaronwui tharchisin khavai yaowui asuk chi khuilaga PROHOwui mangāli kakhayitwui kachigat sāda khayitlu, kala chi nawui sharuk sāra.”

²⁷“Nana khayitchigatwui asuk chi tharchigatra, kala pāngmonwui yar khaishāng chi nana tharchigatlu, chila khayit kahaiya, kala chi tharchisinwui yaovāwui eina kachigatna, chi Aaron eina anaomayarabingwuina.

²⁸Chi Aaron kala anaomayarabingli Israelnaobingna miphalungki kaji ngasāchingra, kaja Israelnaobingwui ningyatchigatwui eina pāngmonna samphangki kaji yarna; hi athumna PROHOli kachigatna.”

²⁹“Aaron thikahaiwui thili awui sāribing chi, anaongarāli thao neomilaga tharchigathaida athumwui ngasāra.

³⁰Anaomayara awui mahut pāngmon kasāpā china kazip khavai kachonshimwui katharapamli otram ngatha̱ khavai kazang tharan shinithang ngavaira.”

³¹“Nana tharkachisinwui yao chi khuira, kala chiwui asā chi katharapamli hangra;

³²kala kazip khavai kachonshimwui khāmongpheili Aaron eina anaomayarabingna yaosā eina lukli kazang khamui chi shaira.

³³Pheokhami sā saikora chi athumna shaira, kaja tharchigatta tharchisin kahaina; kha ayarwui mina mashaipaimana, kaja hi katharana.

³⁴Kala tharkachigatwui sā nilala, khamui nilala ngathorshong taisakha chi meili riktāhaora; chi mashailuipaimana khikhala jila chi katharana.”

³⁵“Chithāda ina nali kaso kahai chiwui athishurda Aaron eina awui naomayarabingli shinithangwui alungli tharkachisin ot sāmira.

³⁶Kala nana thangkachida suiham chigatwui vang pheomi khavai mukkā akha taithatchingra. Kala hanphutwui vang nana suiham chigat akha pha̱phayāra, pheokhami ot kasā tharan thao neomida tharchigatra.

³⁷Hanphut pam chiwui vang pheokhami sāda nana shinithang tharchigatra, kala hanphut chi tharmathengmeikaphaora; chili sākaza̱ saikora kathara ngasāhaora.”

³⁸ “Hanphuttungli chigatki kaji chi hina: thang-thang machatlakla kumkha kākahaiwui yaonao khaninira.

³⁹Yaonao akha nana ngathorshong chigatra, kala yao akha chi ngazinshong chigatra.

⁴⁰Yao khare chili ngasoda khamanaka mathir tharāwui akhali olive thao lengkhor akha kala drakhāra̱ lengkhor akha da manātra.

⁴¹Kala yaonao akhapā chi khamui kala tharāzat kachigat eina ngasoda ngazinshong chigatra, ngathor kasā thāda; hi ningyāngkhaung nganamkaphā PROHOli mei eina kachigat otna.

⁴²Nathumwui mithot kachida kazip khavai kachonshimwui khāmongpheili PROHOwui mangāli machatlakla rikkatā kachigat hi sāchingra, chili ina nali samphangda nali chan ngazekra.

⁴³Chili ina Israelnaobingli samphangda iwui tekhamateina chi tharngasakra.

⁴⁴Kazip khavai kachonshim eina hanphut chi ina tharchigatra; Aaron kala anaomayarabinglila, pāngmon sāda ili otram ngatha̱ khavai ina tharchigatmira.

⁴⁵Kala Israelnaobingli ngasopamda I athumwui Vare sāra.

⁴⁶Kala ina athumwui ngachaili ngasopam khavai thānshokkhame Vare chi ina da athumna theikhuira; I athumwui PROHO Varena.”