Read Tangkhul Naga SHONGZĀ 31 Bible Online

SHONGZĀ 31 - Tangkhul Naga bible

SHONGZĀ 31

¹ PROHOna Mosesli hānga,

²“Yanglu, Judah shangwui Uriwui naomayara, Hurwui ara̱ Bezalelli ina hokhuihaira:

³kala ina Varewui Manglā chipemmihaira, ningla, aworkathemla, ot sākatheila —

⁴sinā, lupāsā, pithrai pāngthemwui otsak,

⁵ngalung kashānla, kala thingli chankasang, kaja them saikora mihaira.

⁶Kala yanglu, ali ngasoda Dan shangwui Oholiab, Ahisamachwui naomayarali kapangkhuihaira; kala chili langda ina sākashapa mi kachungkhali sākathei mihaira; kaja ina nali kaso kahai thāda athumna sāra:

⁷kazip khavai kachonshim, kala ningkhami oko, kala chiwuitungli kahai lukhamashan pamkhong, kala kachonshim chiwui shim sāri saikora,

⁸table kala chiwui khorkhongbing, kala kathara thaomeishong eina chiwui thongthāng saikora, nganamkaphā thaowui hanphut,

⁹kala rikkatā kachigat hanphutwui khorkhongbing, kala khongsai kala chiwui rungkhavai aphei,

¹⁰kala manaklak eina sākahai sāribing, Aaron pāngmonwui kathara sāri, kala anaomayarabingwui sāri, chila pāngmon sāda ngavai khavai,

¹¹kala neomi khavai thao, kala katharapamwui nganamkaphā thao; ina nali hāngkahai saikora chiwui athishurda sāki kajina.”

¹² Kala PROHOna Mosesli hānga,

¹³Israelnaobingli hānglu, “Nathumna iwui sabbathbing mayonphalungra, kaja I eina nathumwui ngachaili naothot peida hina khudam sāra, kaja nathumli PROHO ina tharmathengmi.

¹⁴Nathumna sabbath mayonra, kaja hi nathumwui vang katharana; hi makhao khangasakapa chi sāthatra; chithang ot kasāpā chili awui mibingwui eina katathaora.

¹⁵ Tharukthang ot sāra, kha kashinethang chingri eina ngasāmkakhui sabbathna, kala PROHOwui katharana; kachikathāna ot saakha chithitra.

¹⁶Chiwui vang mayonching kaji kala katang makhavai tuingashit athumwui naothot kachida mayonvāda Israelnaobingna sabbath mayonra.

¹⁷ Hina I eina Israelnaobingwui ngachaili, PROHOna kazingram eina okathui tharukthangwui alungli sai kala kashinethang pamda ngasāmkhui, kajiwui katang makhavai khudamna.”

¹⁸Kala Sinai Kaphungtungli ngazekkup kahaiwui thili Varewui pāngmareng eina kapisang kahai, tuingashitwui lungphek khani chi Mosesli mihaowa.