Read Tangkhul Naga SHONGZĀ 33 Bible Online

SHONGZĀ 33 - Tangkhul Naga bible

SHONGZĀ 33

¹ PROHOna Mosesli hānga, “Na kala nana Egypt ngaleiwui eina thānshok kahai mi saikora, ina Abrahamli, Isaacli, kala Jacobli ngashitta, ‘Ina nawui naotunbingli mira’ kaji apam chiwui vang zatphokulu.

²Kala ina nathumwui mangāli kazingrao akha chihorāda, ina Canaannaobing, Amorbing, Hitnaobing, Periznaobing, Hivnaobing kala Jebusbingli kashamshokmihaora.

³ Seina̱ kala khuira̱ khalong ngalei chili vālu; kha ina nathumli mangasoshangmara, maningakha nathum hāngla makakhui mi sathuihaoda ina nathumli shimān ngasakpaishina.”

⁴Mibingna makaphā pao chi shālaga, athumna chapngachai; kala athum khipākha athumwui sāri-khongnāngbing mashaksāthuwa.

⁵Kaja PROHOna Mosesli hanghairasai, Israelnaobingli hānglu, “Athum hāngla makakhui mimānga; ina nathumli hunkha ngasoshangsi kaja, ina nathumli mutmihaipai. Chiwui vang eina nathumwui sāri khuishokhaida ina khi sāra kaji theikhuipaira.”

⁶Chiwui vang eina Israelnaobingna Horeb phungreiwui eina thuida sāri-khongnāngbing khuishokserhaowa.

⁷Kachonshim chi Mosesna phungzatchinga, kala rāmrahwui eina tāmeida ayārli sakāchinga, kala ana chili kazip khavai kachonshim hoi. PROHOli kaphā mi kachiva̱na rāmrahwui ayārli khalei kazip khavai kachonshim chili vai.

⁸Mosesna chili khavā chitharan mi saikora thuinganingda ichichāwui kachonshim khāmongpheili nganingda Mosesna kachonshim chili mavāzangranglakha eina tangda ali yangchinga.

⁹Mosesna kachonshimlungli kazang eina muiyawui pākra̱ khāmongpheili nganingda PROHOna Mosesli chan ngazeka.

¹⁰Kala mibingna muiyawui pākra̱ chi kachonshim khāmongpheili khanganing chi kathei chitharan, mi saikorana thuinganingda kachichāshi khāmongpheili khoruma.

¹¹ Chithāda sāda mina ngasotnaoli chān khangazek thāda PROHOna Mosesli mai eina mai ngasungda chān ngazeka. Mosesna rāmrahli latkhaung tharan, awui rao Joshua Nunwui naomayara yarona china, kachonshimwui eina mathuilakmana.

¹²Mosesna PROHOli hānga, “Yanglu, mibing hili thānshoklu, da nana kahāngna; kha nana ili khipāli ngasorākhala kaji machitheimimana, chithālala nana ‘Ina nali aming eina theiya, kala ina nali ngahānngai’ da hānga.

¹³Chiwui vang eina ara, ina nali seihā sāli, kalikhada nawui mikyanli ili nana lumashanmiakha, ara nawui apong ili kachitheimilu, chithāda ina nali theira kala nawui maiyanli lumashankhangai samphangra. Yur hila nawui mibingna da kakhuisangmilu.”

¹⁴Kala ana hānga, “Iwui ngasokhamina nali ngayurzatra, kala ina nali ngasāmkhui ngasakra.”

¹⁵Kala ana ali hānga, “Kalikhada nana ili mangasomimara jiakha ithumli hiwui eina mathānshangalu.

¹⁶Maningakha I kala nawui mibing nawui mangāli lumashankhami samphanghairada ina kathāda theirakhala? Nana ngasokhamiwui vang, okathuili khalei miyur saikorawui ngachaili I kala nawui mibing ngakheikhang kahai maningmala?”

¹⁷Kala PROHOna Mosesli hānga, “Aja na iwui mikyanli ngahānkhangaiwui vang kala nali ina aming eina katheiwui vang; nana hāngkahai tui hi tāzakta ina sāra.”

¹⁸Mosesna hānga, “Ina nali seihā sāda kapona, ili nawui tekhamatei chitheimilu.”

¹⁹ Kala ana hānga, “Iwui kaphā saikora nali tāshungmira, kala iwui ming ‘PROHOna’ kaji phongmira; ina ngahānkhangai mi chili ngahānra, kala ina lumashankhangai mi chili lumashanra.

²⁰Kha,” ana hānga, “nana imai matheipaimara; kaja mina ili theilaga maringpaimana.”

²¹Kala PROHOna hānga, “Yanglu, iwui ngalemli apam akha lei, chiwui lunghārtungli nana nganingra;

²²kala iwui tekhamatei rākakān tharan ina nali lunghengtungli haira, kala I mathuiranglakha eina tangda ipāng eina nali kafamira.

²³Chiwui thili ina ipāng khuithuihaora, kala nana ikhanuk theira; kha imaiva matheimara.”