Read Tangkhul Naga SHONGZĀ 34 Bible Online

SHONGZĀ 34 - Tangkhul Naga bible

SHONGZĀ 34

¹PROHOna Mosesli hānga, “Lungphek khani kharewui tākam eina sākhuilu; kala nana sakhai kahai lungphekli kapi kahai tui chi ina kapimiluishitra.

²Ngathor ngarānhaisalu, kala ngathorshong Sinai Kaphungli kālu, kala phungreitonli ili kāsamphanglu.

³Mi khipākha nali mangasokāpaimara, kala phungrei chili khipākha maraaranu, seila, yaola chiwui ngalemli mahompamaranu.”

⁴Chieina PROHOna kakaso athishurda Mosesna lungphek khani kharewui thāda sākhui, kala ngathorthāk ngakarthuida apāngli lungphek khani chi singphungda Sinai Kaphungli kai.

⁵Kala PROHOna muiyālungli tai kala ali ngasoda chili rānganinga, kala PROHOwui ming phongshoka.

⁶ PROHOna awui mangāli rākāda, “PROHO, PROHO, lumashan leishikatha Vare, kala malungmavatkazāra, kala makhangachei leikashi eina ningkatongna pemting kahaia,

⁷phaningmida mi thingthingwui vang makhangachei leishikhame, morei, makaphā makhayā, khayonkhamāng pheokhamena; kha khayonkhamāngli avāva̱ ngarāwui moreiwui vāng naongarāwui naongarā, kakathuma kala khamate thot eina tangda tandi mi” da rāphongshoka.

⁸Kala Mosesna katotsisi ngaleili akui mashunzanga kala khoruma.

⁹Kala ana hānga, “Ara ili nana nawui mikyanli lumashanmiakha, O PROHO, ina nali seihā sāli, ithumli khangasozatmilu, miyurbing hi hāngda makhuilala PROHOna ithumwui khalāng morei pheomihaida nawui shimlui miki kaji chili kathānvāmilu.”

¹⁰Kala ana hānga, “Yanglu, ina tuingashit akha sai. Nawui mibing saikorawui mangāli yur akhawui alunglila, lah okathui huptawui alunglila masālākrang kaji matakhak kahai ot sāra; kala nana ngasopamda khalei mibing china PROHOwui otsak chi theira; kaja ina nathumli sāki kaji hi khangachee khangachā otna.

¹¹Ina aja kakaso hi yangkhuilu. Yanglu, Amornao, Canaannao, Hitnao, Periznao, Hivnao, kala Jebusnaobingli ina nathumwui miktāli kashamshokra.

¹²Nathum khalatta ningngasharlu, chi maningakha nathumna khavāvā pamli ngalei chili kapamabingli tuingashit akha sāda nathumwui alungli chi khalen kathā ngasāra.

¹³ Nathumna athumwui hanphutbing sākhaitālu, kala athumwui pākra̱bing sāteklu, kala athumwui Asherim sātekserhaolu.”

¹⁴ “Kaja nathumna vare khangateili makhorumpaimana, kaja mikpaishikatha PROHO Vare awui ming Zikhamarena,

¹⁵maningakha nana apam chiwui mibingli tuingashit sāda kala athumna athumwui vareli pha̱phayāda khayorva̱wui otsak eina ngasoda athumwui varebingli kapha̱ chili nathumli khangahot eina kapha̱ sā chi shaihaipai,

¹⁶kala nana nawui naomayarabingwui vang aramwui naongalava̱bing khuimida athumwui varewui acham sāda khayorva̱wui otsak chili nanaomayarabing zangpaishina.”

¹⁷ “Nathumna khalattawui vang meoma̱ pāng eina maheikhuipaimana.”

¹⁸ “Khawok makazang khamui phanit nathumna mayonra. Ina kakaso thāda shinithang khawok makazang khamui shaira; hi hāngkahai thāda Abib kachāngwui atamli sāchingra; kaja Abib kachāng hili nathumna Egyptwui eina shoka.”

¹⁹ “Sha̱kei avā saikora seimuk eina yaonao; sha̱kei pharākhare saikora iwuisera,

²⁰ gadhānao pharākhare chi yaonao eina ngatangkhuira; kalikhada nana mangatangkhuingaiakha anao chi akahung shireishatmihaolu. Nathumwui naochizai saikora ngatangkhuiphalungra. “Kala iwui mangāli khipākha khamasai eina marāpaimana.”

²¹ “Tharukthang nathumna ot sāra, kha kashinethang ngasāmkhuira; luisao nilala, māhā nilala ngasāmkhuira.”

²² “Kala haptābingwui phanit nathumna mayonlu, kehu hātkakhui kala kumpei dharreo phanit hi mayonlu.”

²³“Kumkhawui alungli nathumwui mayarnao saikora Israelwui Vare, PROHO Varewui mangāli kathum shida rānganingphalungra.

²⁴Khikhalajila ina miyurbing kashamhaida nathumwui thari haksangmira; nathumwui lam khipānakha mangapaimara, nathumna kumkhali PROHOwui mangāli samphang khavai kathumshida kakā chitharan.”

²⁵ “Ili pha̱khavaiwui asheeli khawok sanglaga nathumna chigat shāra; makānkhami phanitwui pha̱kaphayā nilala akhamawui vang mataipaimana.”

²⁶ “Nawui ngaleiwui athei-arai matheikharewui khare chi nawui PROHO Varewui shimli khuirāphalungra.” “Nathumna yaonaosā ava̱wui na̱ eina mahangpaimana.”

²⁷Kala PROHOna Mosesli hānga, “Tuibing hi kapihailu; tui hiwui athishurda nali kala Israelli ina tuingashit sākahaina.”

²⁸Kala ana PROHOli ngasoda chili ngashun hangmati kala ngayā hangmatithang pama; kazāla mazāmana lah khamangla mamangmana. Kala ana lungphektungli tuingashitbing, ningkhami tharā chi kapisanga.

²⁹ Mosesna ningkhamiwui lungphek khani chi apāng eina singlaga Sinai Kaphungwui eina katā chitharan, ana PROHOli chān khangazekwui vang eina awui mai horchamri kahai chi ana matheisāmana.

³⁰Aaron kala Israelnaobingna Mosesli kathei tharan, yanglu, awui mai horchāmri kahai chi kathei eina athumna awui ngalemli nganaikida ngacheehaowa.

³¹Kha Mosesna athumli kaho eina Aaron kala Israel ashangva̱wui kathānabingna ali hanungda Mosesna athumli ngasoda chān ngazeka.

³²Kala chiwui thili Israelnao saikorana anganaiya; kala ana Sinai Kaphungli PROHOna hāngkahai ningkhami saikora chi athumli mi.

³³Kala Mosesna athumli ngazekkhui kahaiwui thili ana amaili mairār akha farora;

³⁴kha Mosesna PROHOli zangngazek kachida ana mahanshokranglakha eina tangda mairār khuishokhai; kala ana hankashok eina khi kasomameikhala kaji Israelnaobingli hānga.

³⁵Israelwui mibingna Moseswui amai horra kaji theiya kala Mosesna ali mazang ngazekranglakha eina tangda amaili mairār farorpama.