Read Tangkhul Naga SHONGZĀ 35 Bible Online

SHONGZĀ 35 - Tangkhul Naga bible

SHONGZĀ 35

¹Mosesna Israelwui mibing katonga kazipkhui, kala athumli hānga “Nathumna otbing hi sākhavai PROHOna kasohaira.

² Tharukthang ot sāra, kha kashinethang chi nathumna PROHOli kathara sabbath chingri eina ngasāmkhuira; chithang ot kasāpali shaothatra;

³sabbaththang nathumwui mi khaleipamli khipākha mei masa̱paimana.”

⁴ Israelnaowui kazip ashangva̱li Mosesna hānga, “PROHOna kaso kahaibing chi hina.

⁵Nathum ngachaiwui eina PROHOli kachikathāna chigatkhangai, mingairareo kahai mi china sinā, lupāsā, kala pithrai,

⁶khamayinga, hungrisi kala hungshi kahai kala manakta hākakhui kazaira̱ eina kasā chonsā; meha,

⁷yaohui mathen kahai, mehuibing, acaciathing,

⁸shārkhavai thaora̱, neokhavai thaoyur, kala nganamkaphā riktā khavai thaoyur,

⁹onyx ngalungbing kala ephod eina thikhomli ruksangkapai ngalung yur khuirāranu.

¹⁰“Kala nathumwui ngachaili kashapa kachiva̱na rāda PROHOna kakaso chi rasālu: chiya, tabernacle,

¹¹kala chiwui kachonshim eina fakham khavai, hokkhui khavai kala akom, pākra̱, phākashut, kala chiwui aphei;

¹²hanphut chi thingphānli ngasoda; lukhamashan pamkhong kala rānkhavai mairār;

¹³table eina thingphān kala khorkhongbing saikora, kala Ngasokhamiwui khamui;

¹⁴thaomeishong kala chiwui thaomeila, kala chiwui khorkhongbingla, kala thaomeibingwui shārkhavai thaola;

¹⁵kala nganamkaphāwui hanphut kala chiwui thingphān, neokhavai thao kala nganamkaphā thao, kala khāmongwui chonrān, tabernaclewui khāmongli rānkhavai;

¹⁶rikkatā kachigatwui hanphut kala chiwui pithraiwui yākrei, thingphānbing, kala khorkhongbing saikora; khongsai kala rungkhavai aphei;

¹⁷yāngkhupli rānkhavai, pākra̱bing kala apheibing kala yāngkhup ngaveiwui chonrānla;

¹⁸tabernacle kala yāngkhupwui thingpar eina chiwui khara̱bing;

¹⁹katharapamli otram khangatha̱li sangkhavai manaklak eina sākakhui sāri, Aaron pāngmonwui kathara sāri, kala pāngmon sāda anaomayarabingna sangkhavai sāri rāsemlu.”

²⁰Chiwui thili Israel ashangva̱ Moseswui eina thuihaowa.

²¹Kala mi kachiva̱wui ningli kakasat khalei kala saza̱da khangatha̱ kachiva̱na, kazip khavai kachonshimwui shichin khavai PROHOwui kachigat, kala chiwui otram ngatha̱ khavai saikorawui vang kala kathara sāriwui vang khuirāmi.

²²Chithāda sāda mayarnaola, sha̱naola; ningli mingairereo kahaibingna brooch kala unra̱, kala khutop, hārbingla, sināwui ot ayur ayāyāva̱, mi saikorana sināwui ot PROHOli chigata.

²³Kala mi kachiva̱na khamayinga lah hungrisi lah hungshi kahai lah khamanaka chonsā lah meha lah mathen kahai yaohui lah mehui athumwui khalalei khuirāsera.

²⁴Mi kachiva̱na mikashap chi pithraisā, lah lupāsā eina PROHOli kachigat khuirāmi; kala mi kachiva̱ acaciathing leikasābingna ot kasāli shichinkapai chi khuirai.

²⁵Kala sak sākathei sha̱naobingna athum pāng eina rakkakhui ot khamayinga, hungrisi, hungshi kahai kala manakta hākakhui kazaira̱ chonsā khuirai;

²⁶ningli rāza̱da khangatha̱ samkaphang sha̱nao saikorana mesam raka.

²⁷Kala kathānabingna onyx ngalung kala ephod eina thikhomli sangkapai ngalung yur khuirai,

²⁸kala thaomei shārkhavai thaoyur, kala neomi khavai thao, kala nganamkaphā riktā khavaiwui thaoyur khuirai,

²⁹Israelwui mibing saikorana, mayarnaola, sha̱naola, ningli rāza̱da khangatha̱ samkaphang mi kachiva̱na, Mosesli PROHOna kaso kahai ot chi sākhavai mi kachiva̱na mingairareo lemmet eina PROHOli rāchigatsera.

³⁰ Kala Mosesna Israelnaobingli hānga, “Yanglu, Judah shangwui Hurwui nao, Uriwui nao aming Bezalel hoda PROHOna hokhuihaira;

³¹kala ali Varewui Manglā chipemmihaida ningla, sākashapla, awor kathemla, ot sākatheila,

³²sinā, lupāsā, pithrai pāngthemwui otsak,

³³ngalung kashanla, kala thingli chankasang them saikora mihaira.

³⁴Kala Dan shangwui eina Ahisamachwui naomayara Oholiab ani khaninina khangateili tamchithei khavai kasatmihaira.

³⁵Them kathem mina sākathei kachiva̱ anili chipemmihaira, kongti-kongnā yekkathei, kala khamaying, hungreoseo, hungshi kahai chonsā eina sākakhui kala manakta hākakhui kazaira̱ eina kharak lah them kathem otsak saikora sāshap khavai sangmihaira.