Read Tangkhul Naga SHONGZĀ 37 Bible Online

SHONGZĀ 37 - Tangkhul Naga bible

SHONGZĀ 37

¹ Bezalelna oko chi acaciathing eina, asān khuining khani tangkhai; aretna khuining akha tangkhai, kala kajui khuining akha tangkhai da sākhui.

²Kala ana chiwui alung ayar sinā kachanga eina heirora kala sinā kachanga eina heikhuida kuimareida akhamong sāsanga.

³Kala ana achithek matili sināwui akhui mati heikhuida, arāp akhashong khani kala lakhashong khani da sāsangkhui.

⁴Kala ana acaciathing eina thingphān sākhuilaga sinā eina rommithai,

⁵kala ngava̱ khavai thingphān chi ningkhami okowui arāp lakharipta akhui chili ruisanghai.

⁶Kala ana lukhamashan pamkhong chi sinā kachanga eina sākhui; khuining khani tangkhai sānga, kala khuining akha tangkhai pāka,

⁷kala ana sinā eina shaokhuilaga cherubim khani sākhuida lukhamashan pamkhongwui ayar lakharipli hai,

⁸cherub akhana ayar akatangli, kala cherub akhapāna ayar lakhavākwui akatangli hai; kala lukhamashan pamkhongli asā akha sāda sāshāna, cherubimbing chi asā akha sāda sāshāna.

⁹Cherubim khani chiwui angachāng hārkālaga lukhamashan pamkhongli kāhārkhamda mai ngareingasuna; kala lukhamashan pamkhongshong cherubimwui mai ngareivai.

¹⁰ Ana tablela acaciathing eina sākhui, asān khuining khani, aretna khuiningkha, kala kajui khuining akha tangkhai;

¹¹kala ana chi kashenga sinā kachanga eina rommithai, kala akhamong sinā kachanga eina heikhuida sāsanga.

¹²Kala ana kuimareida akom pangmayā rikha sāsanga, kala chi sinā eina heikhuida akomli kuimareida khuisanga.

¹³Ana sinā eina akhui mati heikhuilaga aphei mati achithek matili sāshāna.

¹⁴Thingphān ruisangda table chi ngava̱ khavai akhuibing chi akom ngalemchangli pānshana.

¹⁵Ana ngava̱ khavai thingphān chi acaciathing eina sālaga sinā rommithai.

¹⁶Kala ana tabletungli haiki kaji khorkhongbing nganamkaphā yur sangkhavai kala khongphei khongphāngbing, kala ra̱shakshirei heikhavai khokthi khorām ana sinā kachanga eina sākhuisera.

¹⁷ Kala thaomeishongla sinā kachanga eina sākhui. Rungkhavai apheila, athingla shaokhanārlaga sākhui; chiwui tengkotla, athingla, kala awonla asā akha sāngasaka.

¹⁸Kala chiwui aphāng tharuk thaomeishongwui eina lākhashong kathum, kala lākhashong kathumda shoka;

¹⁹athingla, awonla kālaga almond thāda tengkot kathum aphāng akhali kai, kala athingla awonla kālaga almond thāda tengkot kathum aphāng akhali kai, chithāda thaomeishongwui eina aphāng tharuk shokngasaka.

²⁰Thaomeishong chili almond thāda tengkot mati semkhui, chiwui athingla awonla saikora kai,

²¹aphāng tharuk chi angawor kathum sāda angawor kachiva̱wui eina athing ava̱va̱ shokngasaka.

²²Chiwui athingbing kala chiwui aphāngbing asā akha sāngasakta sinā kachanga eina shaokhuida sākhui.

²³Kala ana thaomeishong chili tengkotnao thāda thaomei shini kala khanit khavai eina akhongla sinā kachanga eina sākhui.

²⁴Ana khorkhongbing saikora sinā talent akha eina sākhui.

²⁵ Ana nganamkaphā riktā khavai acaciathing eina hanphut sākhui; chiwui asān-aret khuiningkharipa, kala asān khuining khanina; kala chiwui angacheebing akha sāda sāshana.

²⁶Ana chiwui atung, arāpbing kuimareida kala angacheebinglila sinā eina rommithai kala kuimareida sinā heiunga.

²⁷Kala sinākhui khanini heikhuida arāp khaniwui akom azingli hanphut ngava̱ khavai thingphān ruisangda mai ngareingasungda semsanga.

²⁸Kala ana thingphānla acaciathing eina sālaga chili sinā rommithai.

²⁹ Ana kathara neokhavai thaola semkhui, kala khangachā kasema mina kasā thāda mathingrik nganamkaphā semkhui.