Read Tangkhul Naga SHONGZĀ 38 Bible Online

SHONGZĀ 38 - Tangkhul Naga bible

SHONGZĀ 38

¹ Ana rikkatā kachigatwui hanphutla acaciathing eina sākhui, asān-aret khuining phangāripa, asān-aret ngaraichai, kachuina khuining kathumna.

²Ana achithek matili angachi mati sāsanga, chithāda sāda hanphut eina angachibing chi asā akha ngasai, kala pithrai eina rommithai.

³Kala ana hanphut chiwui khorkhongbing saikora hamnao, meiyaikhong, khongsai, marikkapei, kala khāng saikora pithrai eina ana sākhuisera.

⁴Kala ana hanphut chiwui komkhavai yākrei, pithrai khānta thāda sālaga chi hanphut akhamong eina thuilaga ngahunshingli tāshung ngasaka.

⁵Komkhavai pithrai yākrei chili, thingphān sangkhavai akhui mati achithek matili sāsanga.

⁶Thingphān chi acaciathing eina sālaga pithrai eina rommithai.

⁷Kala ana hanphutwui arāp khaninili sākasang akhui chili thingphān thara̱sangda ngava̱ khavai sai; hanphut chi chikhai eina sāda alung masai ngasaka.

⁸ Kala ana Pithraiwui khongsai eina aphei, khāmongpheili otram khangatha̱ sha̱naobingwui kalāra̱ngayot eina sākhui.

⁹ Kala ana yāngkhupla sākhui; manakta hākakhui kazaira̱ eina kasā chonsā azingshongwui khuining shākha eina chonrān sai;

¹⁰chiwui pākra̱bing maga̱, khaning khavai (aphei) maga̱ da pithrai eina sai; kha chili hokkhui khavai pākra̱wui khānghui eina masa̱ khavaibing chi lupāsā eina sai.

¹¹Kala atungshongwui chonrān khuining shākha, chiwui pākra̱ maga̱, kala khaning khavai aphei maga̱ pithrai eina sai, kha chili hokkhui khavai pākra̱wui khānghui eina masa̱ khavaibing chi lupāsā eina sai.

¹²Kala zingtunshongwui chonrān khuining hangphangā, chiwui pākra̱ tharā kala aphei tharā da sākhui; pākra̱wui hokkhui khavai khānghui eina masa̱khui khavai chiya lupāsā eina sai.

¹³Kala mangāwui zingshoshong chonrān khuining hangphangāna.

¹⁴Ngavei arāp akhavāk rānkhavai khuining tharāda phangā kala pākra̱ kathum, kala chiwui aphei kathumna.

¹⁵Chi tākam eina lākhashongla sākhui; yāngkhup ngaveiwui uishong yāshong rānkhavai khuining tharāda phangā, pākra̱ kathumrip kala aphei kathumrip lei.

¹⁶Yāngkhup kuimareida rānkhavai manakta hākakhui kazaira̱ chonsā eina sāsera.

¹⁷Kala pākra̱ apheibing chi pithrai eina sai, kha hokkhui khavai khānghui eina masa̱ khavaibing chi lupāsā eina sai; athingbingli romkhavai chila lupāsāna, kala yāngkhupwui pākra̱li masa̱khui khavai saikora lupāsā eina sāsera.

¹⁸Kala yāngkhupwui ngaveili rānkhavai kachon chiya khamayinga, hungrisi, hungshi kahai kala manakta hākakhui kazaira̱ chonsā eina sālaga kapim eina aphor mathālak eina yeksanga; chi khuining maga̱ sānga kala khuining phangā chuiya, yāngkhupwui rānkhavaili ngarithisera.

¹⁹Kala chiwui pākra̱ matina; kala aphei mati da pithrai eina sai, hokkhui khavai khānghui lupāsāna; kala athingbing lupāsāna rommithai, masa̱khui khavai khara̱ lupāsā eina sāsera.

²⁰Kala tabernaclewuila, yāngkhupwuila thingshun saikora pithrai eina sāsera.

²¹Ithamar, pāngmon, Aaronwui naomayarana thānda Mosesna Levi shangli kasoda shākhangasak tuingashitwui tabernacle kasāli kazang otyur mashing chi hina,

²²Judah shangwui Uriwui naomayara Bezalel, Hurwui ara̱na, Mosesli PROHOna kakaso chi tākam eina sākhui;

²³kala ali Dan shangwui Ahisamachwui naomayara Oholiab, khamayinga, hungrisi, kala hungshi kahai kala manakta hākakhui kazaira̱ eina kasā chonsāli pāngthem kasinga, them kathema, kala aphor yekasangana ngasoi.

²⁴Kathara shim kasā otsak chili shikachin sināsa saikora kathara shimwui shekel aman athishurda, sinā kachigatwui eina talent maga̱da chiko kala shekel shāshini thumrāna.

²⁵ Kala yarui ashangva̱wui eina samkaphang, kathara shimwui shekel aman athishurda lupāsā shākha, talent shākha kala shekel thingkha shāshini kala hangshinida phangā:

²⁶ mipha̱li beka akharip (shekel tangkhai, kathara shimwui shekel aman athishurda), kum maga̱ eina thuilaga khararnao mishānli zangkahai athum shātharuk kala thing kathum, shāphangā kala hangphangāwuina.

²⁷Lupāsā talent shākha katharapamwui aphei eina mairār phei haikhavaili zanghaowa, aphei ava̱va̱li talent ava̱va̱ zangda aphei shākhawuina.

²⁸Kala shekel thingkha shāshini hangshinida phangā hi ana pākra̱wui hokkhui khavai sema, kala athing eina khalap khavaili romkhavai savai.

²⁹Kala ngashaikakhui pithrai chi talent hangshini, kala shakel thingkhani shāmatina;

³⁰pithrai chieina ana kazip khavai kachonshimwui khāmongphei, pithrai hanphut, yākrei kala khorkhongbing saikora sāvai.

³¹Kala yāngkhup pheithing, ngavei pheithingla, kala tabernaclewuila, yāngkhupwui thingshun katonga romvai.