Read Tangkhul Naga SHONGZĀ 39 Bible Online

SHONGZĀ 39 - Tangkhul Naga bible

SHONGZĀ 39

¹Katharapamli otram ngatha̱ khavai, khamaying, hungrisi, kala hungshi kahai eina manaktak kahaiya sāri sākhui; athumna kathara sāri chi Aaronwui vang sākhui; kala chi PROHOna Mosesli kakaso athishurda sākhui.

² Kala ana sinā khamaying, hungrisi, kala hungshi kahai kala manakta hākakhui kazaira̱ eina ephod sākhui.

³Khamayinga, hungrisi, hungshi kahai kala manakta hākakhui kazaira̱ eina kasā chili yeksang khavai sinā aphek shaokhanārlaga kazaira̱ thāda mathālak eina sākhui.

⁴Ephod chi yārtuili thāngkhavai khara̱ khani sākhui, kala khani chi ephodli pānkhui.

⁵Kala chi khalapshān khavai chonsā rakkakhui chila kala chiwui kasā themsak ngaraichāda sākhui, kaja sinā eina kasā khamaying, hungrisi, hungshi kahai kala manakta hākakhui kazaira̱ eina kasā chonsāna; chi PROHOna Mosesli kaso kahai chithāda sākhui.

⁶Onyx ngalung sākhariklaga sinā eina rukshāna, kala khutopli rukkasang thāda Israelwui naomayarabingwui amingbing chili ruksangsera.

⁷Kala ana chi ephodwui yārtuiparli hai, kaja PROHOna Mosesli kaso kahai athishurda Israel naomayarabingli phaningung khavaiwui ngalungna.

⁸ Ana thikhomla, sinā eina khamayinga, hungrisi, hungshi kahai kala manakta hākakhui kazaira̱ eina ephod kasā thāda sākhui.

⁹Chi asān-aret ngarithi, kala thikhom khanishi ngaphoda sākhui, ngaphohaiakha, asān pangmayākha, aret pangmayākha ji.

¹⁰Chiwuitungli apeng mati ruksanga. Khare apengli sardius, topaz, kala carbuncle;

¹¹pengkakhaneli, emerald, sapphire, kala hirā;

¹²kakathuma apengli, jacinth, agate, kala amethyst;

¹³kala khamate apengli, beryl, onyx, jasper; saikora chi sinā eina rukshānsera.

¹⁴Ngalung tharāda khani chili Israelwui naomayarabingwui aming athishurda yeksangsera; mahor namkhavai khutop thāda yeksangsera.

¹⁵Kala thikhomwuitungli khara̱ kashirei hokkhui khamaron thāda sinā khamathinga eina sāsanga;

¹⁶kala rukshān khavai sinā apeng khani, akhui khani sākhuida akhui khani chi thikhomwui akhana khanili pānshāna;

¹⁷kala athumna thikhom mareiwui akhui khani chili sinā peng khani chi hokkhui.

¹⁸Amarei khani china sinā rukshān kahai chili pānkhui; chithāda sāda athumna ephodwui yārtuiparli mangāshong hokthānga.

¹⁹Chiwui thili athumna sinā akhui khani sākhuida thikhomwui achithek khaniwui alungshong ephod ngalemli sāshāna.

²⁰Kala athumna sinākhui khani sākhuida yārtuiparwui azing mangāshong sāshānda thāngkhavai ephodwui themlāk eina rakkakhui chonsāwui atunglila sāshāna.

²¹Kala athumna thikhom akhui eina ephod akhui ngasun khavai khamayinga khara̱ eina khalapkhui, chithāda sāda ephodwuitungli napshānda thikhom mangacho khavai PROHOna Mosesli kakaso chi tākam eina sai.

²² Ana ephodwui phahonla khamayingamāng eina rakkhui;

²³kala chiwui sākaphut akhur chi makāk khavai phahonwui sākaphut thāda shangshung tāshungda katimsangsera.

²⁴Katuma phahon amareili khamaying, hungrisi, hungshi kahai kala manakta hākakhui kazaira̱ yurwui chonsā eina kabothei yeksanga.

²⁵Kala athumna sinā kachanga eina kantā semkhui, kala katuma phahon amarei kuimareida kabothei sāsang kahai chiwui angachai-chaili sinā kachanga eina kasā kantā ava̱va̱ hokthānga;

²⁶kantā akha, kabothei akha, kantā akha, kabothei akha da, PROHOna Mosesli kakaso chi tākam eina otram khangatha̱li ngavai khavai katumma phahon chili peida sāsanga.

²⁷ Athumna Aaronwui kala anaomayarabingwui vangla khamanaka chonsā eina coat sāmi,

²⁸kala kuiteila, kuihonla khamanaka chonsā eina sāmi, malaola, shanneira̱la;

²⁹manakta hākakhui kazaira̱ kala khamayinga, hungrisi, hungshi kahai chonsā kala kapim eina aphor phorsanglaga, PROHOna Mosesli kakaso tākam eina sāmi.

³⁰ Kala athumna kathara kuihon sinā kachanga eina sai, kala khutopli rukkasang thāda, “PROHOli Tharmathengranu” da kapisanga.

³¹Kala PROHOna Mosesli kakaso athishurda chi kuiteili khalapshān khavai khamayinga khara̱ akha shipshāna.

³²Chithāda sāda kazip khavai kachonshimwui tabernacle chi sākhuihaowa; kala PROHOna Mosesli kakaso athishurda Israelnaobingna chi tākam eina sākhui.

³³Kala athumna Mosesli tabernacle chi khuirāmi, kachonshim kala chiwui khorkhongbing, chiwui hokkhui khavaibing, chiwui akombing, chiwui khamakhara thingbing, chiwui pākra̱bingla, kala chiwui apheila,

³⁴faror khavai mathen kahai yaohui, mehui, kala mairār chonrānla,

³⁵ningkhami oko eina chiwui thingphānla, kala lukhamashan pamkhongla;

³⁶ table eina chiwui khorkhongbing kala ngasokhamiwui khamuila;

³⁷sinā kachanga eina kasā thaomeishong kala chiwui thaomeibing, kala chiwui khorkhongbing saikora; kala shārkhavai thaola;

³⁸sinā eina kasā hanphut, neokhavai thao, kala nganamkaphā thao kala kachonshim khāmongli rānkhavai chonrānla;

³⁹pithrai eina kasā hanphutla, chili sākasang pithraiwui yākrei thingphān, kala khorkhongbing saikora, khongsaila, kala chiwui apheila;

⁴⁰yāngkhupli rānkhavai kachon, pākra̱bing kala apheibing, yāngkhup ngaveiwui chonrān, thingshunbing, kazip khavai kachonshim, kala tabernacleli shichinki kaji khorkhong saikora;

⁴¹katharapamli otram ngatha̱ khavai themlāk eina sākakhui pāngmon Aaronwui kathara sāribing, kala anaomayarabingwui sāribing.

⁴²PROHOna Mosesli kakaso saikora chi, Israelnaobingna katonga sākupa.

⁴³Kala Mosesna ot saikora chi thei, kala yanglu, PROHOna kakaso thāda athumna chi tākam eina sai. Athumna chithāda sākakhuiwui vang Mosesna athumli somi.