Read Tangkhul Naga SHONGZĀ 4 Bible Online

SHONGZĀ 4 - Tangkhul Naga bible

SHONGZĀ 4

¹Chieina Mosesna ngahānkai, “Kha kalikhada athumna iwui tui makhuila lah mashitsangla, athumna; ‘PROHOna nali machitheimimana’ jiakha kathāra.”

²PROHOna ali hānga, “Napāngli kasing chi khikhala?” Ana hānga, “Lijeina.”

³Chieina ana hānga, “Ngaleili hortālu,” chieina ana lijei chi ngaleili hortai kala chi phara̱ ngasāthuihaowa; kala Mosesna sa̱na̱unga.

⁴Chieina PROHOna Mosesli hānga, “Napāng katingda akhameili yonkhuilu,” chieina ana apāng katingda akhameili yonkhui kala apāngli kakā eina lijei ngasāhaowa —

⁵“Chi athumna PROHO avāva̱ ngarāwui Vare, Abrahamwui Vare, Isaacwui Vare, kala Jacobwui Varena nali rāchitheihaira da shitsang khavaina.”

⁶PROHOna ali hānglui, “Napāng nawui phahonlungli thara̱zanglu.” Ana apāng phahonlungli thara̱zanglaga khuishokkhayang tharan, apāng phārreina horam thāda charshi eina leisai.

⁷Chiwui thili Varena hānga, “Napāng nawui pha̱honlungli thara̱zangluilu.” Chieina ana apāng phahonlungli thara̱zanglui; kala ana khuishokta khayang eina awui phasā khangachā thāda raihairasai.

⁸“Athumna nali mashitsangakha, lah khare khudam chili mahengsangakha, khudam kakhanepā chili shitsangra.

⁹Athumna khudam khaninili mashitsangakha, lah nawui tuili mahengsangakha, Nile kongwui tara̱ kateokha khuilaga ngalei katheng tungli heirorlu; Nile tara̱ chi ngalei katheng tungli ashee ngasāhaora.”

¹⁰Kha Mosesna PROHOli hānga, “O iwui PROHO, iya tuila mamatuitheimana, kharelila kala arui eina tangdala naraoli rākahāng atam hieina tangdala; iva tuimatuila mathākmana chukhamajala huilaka.”

¹¹Chieina PROHOna ali hānga, “Miwui tuimatui khipāna mikhala? Khangasha̱la, khangakhokla, katheila, khangapeola khipāna sāmikhala? Chi, PROHO ina maningmala?

¹²Chieina ara vālu, ina nakhamorli ngasomira, kala khi matuirakhala kaji chi tamchitheira.”

¹³Kha ana hānga, “O iwui PROHO, lumashanmida mi khangatei akhali kachihovāhaolu.”

¹⁴Chiwui vang PROHOna Mosesli malungvāthaoda hānga, “Nachinā Aaron, Levipa maleimala? A matuitheilaka kaji ina thei; arui ana nali samphang khavai rārādalei, kala ana nali rākathei tharan awui ning ringphālakhaora.

¹⁵Nana ali ngazekta tui saikora ali hāngngasaklu; kala ina nakhamorlila, a khamorlila ngasomira, kala nanina khi sārakhala kajila tamchitheira.

¹⁶Nawui vang ana mili hāngmira; kala a nawui khamor ngasāra, kala nana awui vang Vare kathā sāra.

¹⁷Kala khudam sāchithei khavai lijei hi nana khuiphungra.”

¹⁸Mosesna awova̱ Jethrowuili latungda hānga, “Egyptli khalei ichināngarā ringchingda leika kathakhala ungyang khavai ili lumashanmida khaung ngasakmilu.” Jethrona Mosesli hānga, “Chingri eina ungulu.”

¹⁹ Kala Midianli leilakha PROHOna Mosesli hānga, “Egyptli latunglu, kaja nali sāthatkida khangarānbing ara thiserhaira.”

²⁰Chieina Mosesna apreiva̱, kala naomayarabing gadhāli tongngasakta Egypt ngaleili hanunga; kala Mosesna apāngli Varewui lijei chi singphunga.

²¹Kala PROHOna Mosesli hānga, “Na Egyptli ungkashung tharan ina nali mikahai mina masākharar pangshap chi Pharaohwui mangāli sacheitheilu; kha chithālala ina awui ning makang ngasakra, kala ana mibingli machihomara.

²²Chieina nana Pharaohli hāngra, ‘PROHOna kahāngna, Israel hi iwui naochizaina.

²³ Ina nali kahāngna, ‘Ili otram ngatha̱ khavai inaomayarali chihohaolu”; kalikhada nana mamayāsākha, ina nawui naochizai sāthathaora.’ ”

²⁴Athumna zatlakha, athumna ngayā ngasām khavai apam akhali PROHOna ali samphanga kala ali sāthat khavai ngarāna.

²⁵Kha Zipporahna lungkainao akha khuida anaomayarawui ahui rimshokmilaga Moseswui pheili sāza̱da hānga, “Kachangkhat eina na iwui ashee khangaruma gaharana!”

²⁶Chieina ana ali khikha mathathuwa. Hi preiva̱na, “Ahui rimkashok mangā eina ashee khangaruma gaharana” da kahāngwui vangna.”

²⁷PROHOna Aaronli hānga, “Vāda Mosesli lamhāngli asamphanglu.” Chieina ana vai, kala ana ali Varewui phungreili samphanga kala ali maya̱khuiya.

²⁸Mosesna Aaronli PROHOwui tui saikora, ali kachihowui apong, kala ana sāki kaji kakaso khudam saikora hāngsera.

²⁹Chieina Moses eina Aaronna vāda Israelwui ararbing saikorali kazipkhui.

³⁰Kala Mosesli Varena hāngkahai saikora chi Aaronna hāngchithei kala mibingwui miktāli khudambing sāchithei.

³¹Mibingna shitsanghaowa; kala PROHOna Israelnaobingwui kachotkachāng theimihaira kaji shālaga athumna mashunzanga kala khoruma.