Read Tangkhul Naga SHONGZĀ 40 Bible Online

SHONGZĀ 40 - Tangkhul Naga bible

SHONGZĀ 40

¹PROHOna Mosesli hānga,

²“Kachāng kharewui zimiksho kharethang kazip khavai kachonshimwui tabernacle chi khaningkālu.

³Kala ningkhami oko chi chili sanglu, kala chi chonrān mairār eina sākhamhaolu.

⁴Kala table chi khuizangda apam chālak eina hailu; thaomeishong chila khuizangra, kala thaomeibingla runghailu.

⁵Kala sināwui nganamkaphā rikkhavai hanphut chi ningkhami oko mangāli haida tabernaclewui khāmong kachon rāntālu.

⁶Nana rikkatā kachigatwui hanphut chi kazip khavai kachonshimwui tabernacle chiwui khāmong mangāli haira;

⁷kala khongsai chi kazip khavai kachonshim eina hanphut ngachaili haida tara̱ runghailu.

⁸Kala nana yāngkhup kuimareida sākālaga chiwui ngaveili chonrān hokthānglu.

⁹“Chiwui thili nana neokhavai thao chi khuilaga taberbacle chiwui alungli khalei saikorali neomida tharchigatlu. Kala tabernacle eina chiwui alungli khalei thongthāng saikora chi kathara ot ngasāra.

¹⁰Nana rikkatā kachigatwui hanphutlila, kala chiwui khorkhongbing saikoralila neora, kala hanphut tharchigatlu; chieina hanphut chi tharmathenglakhaora.

¹¹Nana khongsai kala chiwui rungkhavai apheilila neomida tharchigatlu.

¹²“Chiwui thili nana Aaron eina anaomayarabingli kazip khavai kachonshimwui khāmongpheili khuirāra kala athumli tara̱ eina ra̱vaimathāmilu,

¹³kala Aaronli kathara sāribing chi ngavaimilu, kala pāngmon sāda otram ngatha̱mi khavai ali thao neomida tharchigatmilu,

¹⁴nana anaomayarabingla khuirāda athumli coat ngavaimilu,

¹⁵kala athum pāngmon sāda ili otram ngatha̱mi khavai avāva̱li neokhami thāda athumlila thao neomilu, kala athumli thao neokhami china athumli khuisangda thot-thot peida mathāhaila pāngmon savāshumra.”

¹⁶Chithāda Mosesna sai; PROHOna ali kakaso athishurda, chithāda ana sai.

¹⁷Kala zingkum kakhanewui kachāng kharewui kharethang tabernacle chi sakāhaowa.

¹⁸Mosesna tabernacle chi khaningkai; ana khaning khavai apheibing chi shuna, kala akom eina kasā arāp sakai, kala pākra̱bing chi shunkāsera,

¹⁹kala ana tabernacle chili kachon chi harvāya, PROHOna Mosesli kakaso chi tākam eina kachonshimli fakhama.

²⁰Kala ana ningkhami chi khuida okoli sanga, kala thingphān oko ruisanglaga lukhamashan pamkhong chi okotungli kāhai,

²¹kala ana oko chi tabernaclewui alungli khuirai, kala mairār chi rānhai, kala PROHOna Mosesli kakaso chithāda oko chili rānphinhai.

²²Kala ana table chi kazip khavai kachonshimwui alungli, mairārwui ayar atungshong runghai;

²³ kala PROHOna Mosesli kakaso athishurda khamui tabletungli mathang mathang eina PROHOwui mangāli haiya.

²⁴Kala ana thaomeishong chi kazip khavai kachonshim azingshongwui tabernacle tableli mai ngareingasungda hai,

²⁵kala PROHOna Mosesli kakaso chi tākam eina thaomeila PROHOwui mangāli runghai.

²⁶Kala ana sinā eina kasā hanphut chila kazip khavai kachonshimli mairārwui mangāshong haida,

²⁷PROHOna Mosesli kakaso athishurda chiwuitungli nganamkaphā otyur riktai.

²⁸Kala ana tabernaclewui chonrān chi khāmongli rānhai.

²⁹Kala ana tabernaclewui kazip khavai kachonshim khāmongpheili rikkatā kachigatwui hanphut chi haiya; kala chiwuitungli rikkatā kachigatwui hanphut eina tharāzāt kachigat chi PROHOna Mosesli kakaso athishurda pha̱ya.

³⁰ Kala khongsai chi kazip khavai kachonshim eina hanphutwui ngachaili haida pheokhavai tara̱ runghai,

³¹kala chili Moses eina Aaron, kala Aaronwui naomayarabingna phei-pāng pheowa;

³²PROHOna Mosesli kakaso athishurda kazip khavai kachonshimli kazang tharan kala hanphut ngalemli khavā tharan athumna chili pheokhui.

³³Kala ana tabernacle eina hanphutpam kuimareida yāngkhup sāsanga; kala yāngkhupwui ngavei chonrānla sāsanga. Chithāda Mosesna ot chi sākuphaowa.

³⁴ Chiwui thili kazip khavai kachonshim chi muiyāna ngapuikhamhaowa, kala tabernacle chi PROHOwui tekhamateina pemhaowa.

³⁵Kala Moses kazip khavai kachonshimli mazangrarthuwa, kaja muiyāna ngapuirorhaida PROHOwui tekhamateina tabernacle chi pemhaowa.

³⁶Athumwui shongzā peida tabernaclewui eina muiyā lānkahai chitharan Israelnaobingna zatphokchinga,

³⁷kha muiyā chi malānakha, athumna muiyā chi malānranglakha eina tangda mazatmana.

³⁸Kaja shongzā peida Israel shimkhur saikorawui mikli ngashun kachida PROHOwui muiyā kala ngayāshong mei tabernaclewuitungli khalei chi thei.