Read Tangkhul Naga SHONGZĀ 5 Bible Online

SHONGZĀ 5 - Tangkhul Naga bible

SHONGZĀ 5

¹Chiwui thili Moses eina Aaronna Pharaohli vāda hānga, “Israelwui PROHO Varena kahāngna, ‘Iwui mibingli zatngasaklu; chieina athumna lamhāngli ili zātkhān sāpaira.’ ”

²Kha Pharaohna hānga, “Israelnaobingli zatngasak khavai ina kahāng nganāki kaji PROHO chi khipākhala? PROHO chi I matheimana, Israelnaobingli mathui ngasakmara.”

³Chieina anina hānga, “Hebrewnaobingwui Vare inili samphanghaira, chieina kathumthangzat lamhāngli vāda PROHO ithumwui Vareli pha̱phayā khavai kha-vā ngasakmiluda kapona, chi maningakha ana ithumwuitungli kazātkashi maningakha raighai eina chithithaipai.”

⁴Kha Egypt awungana anili hānga, “Moses eina Aaron, kachiwui vang eina mibingli ot masā ngasakla khuithuiki kajikhala! Nathum otpamli vaulu.”

⁵Kala Pharaohna hānga, “Ara ngalei hiwui mili athumna chungmeikharhaira, laga athumli otpamwui eina ngasām ngasaki kajila!”

⁶Chithang ngalāngda Pharaohna mibingli kashinabing kala khayangabingli hānga,

⁷“Khareli athumli chek semkhavai lanji khami thāda mamiluipaimara, athum khalattana aphākhuiranu.

⁸Kha athumna kharewui kasā thāda chek mashinga masuitāpaimana, kaja athum ngachāng makāmada chi eina athumna chapta, ‘ithumwui Vareli apha̱phayā khavai chihomilu’ kajina.

⁹Athumli ot ritmeida milu; thakha ot sāthuihaida mikhanamtui khamatui maphaningluimara.”

¹⁰Chieina kashinabing kala khayangabing china athumli hānga, “Pharaohna kahāngna, ‘Ina nathumli lanji mamiluimara.

¹¹Lanji khalaleipamli kachichāna aphākhuilu, kha nathumwui ot kasāva masuitāpaimara.’ ”

¹²Chiwui vang athumna Egypt ngalei kachiva̱li vāda lanji pongzata.

¹³Kashinabing china mangasāmlakla hānga, “Thakta sālu, lanji milakhawui ot kasā thāda thangthangwui ot kuphalungra.”

¹⁴Kala Israelnaobingwuitungli yangkhame sangkahaibing chili akhavābingna shaomamanda hānga, “Kachiwui vang eina thang-thangwui sāki kaji chek kharewui kasā thāda makup kajikhala?”

¹⁵Chieina Israelnaobingwui ngachaili yangkhamebing china Pharaohli chapta rāhānga, “Naraobingli kathāda hithāda kasākhala?

¹⁶Naraobingli lanji mamimana, laga athumna ithumli ‘Chek sālu!’ ji. Yanglu nawui raobingli kathāda shaomikhala; nava nawui mibingli malumashanmana.”

¹⁷Kha ana hānga, “Nathum chāngshiya; kala nathum ot masāngaimana, chiwui vang eina ‘PROHOli apha̱phayāra’ da nathumna ili khamayā kapona.

¹⁸Ungulu, ot asaulu; kaja lanji mamiluimara, kha nathum chek mashing khangachā chi sāchingphalungra.”

¹⁹“Nathum thangthangwui chek mashing masuitāpaimara” kaji shālaga, kalākashi ot rāhaira da Israelnaobingwui yangkhamebingna thei.

²⁰Pharaohwui eina kashok eina, athumli samphang khavai ngaraikasā Moses eina Aaronli samphanga.

²¹Athumna anili hānga, “PROHOna naniwuitungli bichar sāranu! Pharaoh kala awui otshinabingbingna ithumli yangkharing khavai sāmihaira kala ithumli sāthat khavai athumwui pāngli raighai chisinmihaira.”

²²Chieina Mosesna PROHOli seihā sāda hānga, “O PROHO, khisāda mibing hili sāshida sāhaokhala? Ili khisāda shirātkharākhala?

²³Khikhalajila Pharaohli nawui ming singda ina vāhāngkhare eina thuida ana mibingli sāshida sāhaira, kala nana mibingli ngatangkhui khavai khikha masāmana.”