Read Tangkhul Naga SHONGZĀ 6 Bible Online

SHONGZĀ 6 - Tangkhul Naga bible

SHONGZĀ 6

¹ Chieina PROHOna Mosesli hānga, “Ara ina Pharaohli khi sārakhala kaji nana theira; kaja pangshapa pāng eina ana athumli chihora; pangshapa pāng eina ana athumli awui ngalei eina kashamshokra.”

²Kala Varena Mosesli hānga; “PROHO chi ina.

³Ina Abrahamli, Isaacli, Jacobli sāshapa Varena da chithei, kha athumli PROHO kaji iwui aming eina machitheimana.

⁴Athumli ina iwui tuingashit sai, chiya athumna lam phāda kha̱mi thāda pānda khalei Cannan ngalei chi mirada.

⁵Chili lāngda Egyptnaobingna narhaida khalei Israelnaobingna ringkhangā chi ina shāda iwui tuingashit chi phaningunga.

⁶Chiwui vang eina Israelnaobingli hānglu, ‘PROHO chi ina, kala Egyptnaobingwui kachotkachāng otphunwui eina ina nathumli thānshokra, kala nathumna narkahaiwui eina shokra; kala ipāng katingda mashun bichar sāda nathumli ngatangkhuira.

⁷Iwui mi sākhavai ina nathumli khuira, kala I nathumwui Vare sāra, kala Egyptnaobingwui kachotkachāng eina thānkashoka PROHO Varena da nathumna theikhuira.

⁸Kala Abrahamli, Isaacli, Jacobli mirada ngashit kahai lam chili ina thānungra; chi nathumwui ngasā khavai ina mira. PROHO chi ina.’ ”

⁹Mosesna athumli chi tākam eina hānga, kha athumna manganāmimana, kaja athumli sāshida narhaoda manglā yurhaowa.

¹⁰Chieina PROHOna Mosesli hānga,

¹¹“Vālu, kala Egypt awunga Pharaohli, awui ngaleiwui eina Israelnaobing thuikhavai ahānglu.”

¹²Kha Mosesna PROHOli hānga, “Israelnaobingna ili mashitsangmana, chithakha morchai makathara mi, I kathali Pharaohna kathāda shitsangra?”

¹³Kha PROHOna Moses eina Aaronli Israel yurli Egypt ngaleiwui eina thānshok khavai Israelnaolila kala Egyptwui awunga Pharaohlila ahāng khavai kasoi.

¹⁴ Hibing hina athum avāva̱ ngarāwui shimkhur akuibingna: Israelwui naochizai, Reubenwui naomayarabing: Hanok, Pallu, Hezron kala Carmi; hibing hi Reubenwui shimkhurbingna.

¹⁵Simeonwui naomayarabing: Jemuel, Jamin, Ohad, Jachin, Zohar, kala Shaul Canaanpāva̱na kapharāna; hi Simeonwui shimkhurbingna.

¹⁶ Athumwui naotunbingwui athishurda Leviwui naomayarabing: Gershon, Kohath kala Merari, kala Leviwui okthot zingkum shākha thumrāda shinina.

¹⁷Gershonwui naomayarabing: Libni eina Shime-i shimkhur khani.

¹⁸Kohathwui naomayarabing: Amram, Izhar, Hebron kala Uzziel, kala Kohathna zingkum shakha thumrāda kathum okthuiya.

¹⁹Merariwui naomayarabing: Mahli eina Mushi. Athum naotunbingwui athishurda hi Levishi shimkhurna.

²⁰Amramna avāva̱wui azara Joshebedli khui, kala ana Aaron eina Mosesli pharai, Amaramna zingkum shākha thumrāda shini okthui.

²¹Izharwui naomayarabing: Corah Nepheg kala Zichri.

²²Uzzielwui naomayarabing: Maishel, Elzaphan kala Sithrina.

²³Aaronna Amminadabwui naongalava̱ Nashonshi azara Elishebali ngakuma; ana Nadab, Abihu, Eleazar kala Ithamar athumli pharai.

²⁴Corahwui naomayarabing: Assir, Elkanah kala Abisaph; hi Corahshina.

²⁵Eleazar Aaronwui naomayarana Puti-elshi ngalānao akhali khuida Phinehasli pharai. Hi Levi shimkurwui athishurda awo-ayi shim-shimwui akuibingna.

²⁶Hi PROHOna “Egypt ngaleiwui eina Israelnaoli thānshoklu” da kahānga Aaron eina Moses china.

²⁷Egypt ngaleiwui eina Israelnaobingli khuishok khavai Pharaohli akhangazeka khani chi Moses eina Aaronna.

²⁸Egypt ngaleili PROHOna Mosesli rāhāngthang,

²⁹ana ali “I PROHO china; Egyptwui awunga Pharaohli tui saikora hi ahānglu” da hānga.

³⁰Kha Mosesna PROHOwui mangāli hānga, “Yanglu, iva morchai makathara mina, Pharaohna ili kathāda shitsangrakhala?”