Read Tangkhul Naga SHONGZĀ 7 Bible Online

SHONGZĀ 7 - Tangkhul Naga bible

SHONGZĀ 7

¹PROHOna Mosesli hānga, “Yanglu, ina nali Pharaohwui Vare kathā sāngasakhaira, kala nachinā Aaronna nawui marān sāra.

²Ina nali kakaso saikora nana hāngra, kala nachinā Aaronna Pharaohli ngalei hiwui eina Israelnaobingli chiho khavai hāngra.

³ Kha ina Pharaohwui wuklung mararmihaora, kala ina iwui machut kala matakhak kahai khudam Egypt ngaleili mataisangra,

⁴Pharaohna nali makhuikasang tharan; Egyptwuitungli ipāng parra kala iwui mibing Israelwui naobingli Egypt ngaleiwui eina hakkhamahā mashun bichar eina thānshokra.

⁵Ipāng katingda Egyptwui eina Israelnaobingli thānkashok tharan athumna I Varena kaji theikhuira.”

⁶Moses eina Aaronna chithāda sai; PROHOna kakaso chi horzakta sai.

⁷Anina Pharaohli akhangazek atamli Moses zingkum hangchishat kāhairasai kala Aaron hangchishatta kathumhairasai.

⁸PROHOna Moses eina Aaronli hānga,

⁹“Pharaohna nanili, ‘Matakkhak kahai ot eina sachitheilu’ jiakha, nana Aaronli hānglu, ‘Nawui khāmshui chi phara̱ onkhavai Pharaohwui mangāli hortālu.’”

¹⁰Chieina PROHOna kakaso athishurda anina Pharaohwui mangāli vāsai; Pharaoh eina awui raobingwui mangāli Aaronna khāmshui chi hortāda phara̱ onngasaka.

¹¹Chieina Pharaohna awui kathemabing kala Egyptwui mitrang sākatheibingli hokhuida, athumnala athumwui khangathum mitrang eina chi tākam eina sai.

¹²Kaja athum ava̱va̱na horkatā khāmshui chi phara̱ sāthuiserhaowa. Kha Aaronwui khāmshuina athumwui khāmshui saikora mayuitāserhaowa.

¹³Chithālala Pharaohwui wuklung mararshaphai, kala PROHOna kahāng athishurda aniwui tui makhuisangthuwa.

¹⁴Chieina PROHOna Mosesli hānga, “Pharaohwui wuklung marar ngasakhaida, ana Israelnaobingli mathui ngasakmana.

¹⁵Ngathorshong kongpheili ali vangaraisālu, Pharaohna tara̱pamli rārāsāra; kala phara̱ onkahaia khāmshui chi khuiphunglu.

¹⁶Kala hithāda hānglu, PROHO Hebrewnaobingwui Varena nali hi hāngkhavai ili kachihona, ‘Iwui mibingli chihohaolu, chithāda sāda athumna ili lamhāngli khorumra; kha nana arui rāshungda manganāsangmana.

¹⁷ Hithāda PROHOna hānga, “Hi eina I PROHOna kaji nana theira.” Yanglu, ipāngli kasing khāmshui hi eina ina Nile kongwui tara̱li ngaphitra, kala chi ashee sāthuihaora,

¹⁸Nile kongwui khai thihaida nganamshira, chieina Egyptnaobingna Nile kongwui tara̱ mamangpaimara.’”

¹⁹Kala PROHOna Mosesli hānga, “Aaronli hānglu, ‘Nawui khāmshui khuida ashee onkhavai Egyptwui tara̱tungli, kongli, ra̱shongli, ra̱khongli, tara̱ khonkahai chili napāng katinglu; chieina Egypt ngalei saikorali khalei ngalung hamla, thingwui khorkhong saikorawuila tara̱ ashee onserhaora.’”

²⁰PROHOna kakaso athishurda Moses eina Aaronna sai; Pharaoh kala araobingwui miktāli khāmshui chi khāngkāda Nile kongwui tara̱li ngaphita, kala Nilewui tara̱ katonga ashee sāthuihaowa.

²¹Kongwui khai thiserhaowa kala Nile kong nganamshihaowa, Egyptnaobingna Nilewui tara̱ chi mamangpaithumana, kala Egypt ngalei hupta asheemānghaowa.

²²Kha Egyptwui mitrang kathembing chinala, athumwui khangathum mitrang eina chithāda sai, chiwui vang eina Pharaohwui wuklung marar ngasakshona, kala PROHOna hāngkahai thāda aniwui tui chi makhuisangthuwa.

²³Pharaohna awui shimli latungda ningli shik majilakmana.

²⁴Kala mangkhavai tara̱wui vang Egyptnaobingna Nile kong ngalengda ra̱khong khonkhui; kaja kongwui tara̱ chi mamangpaithuwa.

²⁵Nile kongli PROHOna ngaphitta shinithang kāshunghaowa.