Read Tangkhul Naga SHONGZĀ 8 Bible Online

SHONGZĀ 8 - Tangkhul Naga bible

SHONGZĀ 8

¹Chiwui thili PROHOna Mosesli hānga, “Pharaohli vāda ahānglu, PROHOna hithāda hānga; ‘Ili otram ngatha̱ khavai iwui mibingli chihohaolu.

²Kha kalikhada nana athumli machihoakha, ina awui ngalei apam saikorali khaifa shokngasakta chotngasakra;

³Nile kong khaifa pemhaora nawui konungli, petkāli kala petlila, kala nawui otshinabingwui shimlila, mibingwui shimlila, kala nawui hampamla, khamui naikhavai akhongbingla,

⁴nawuitunglila, mibingwuitunglila, kala otshinabingwuitunglila khaifabingna ngawokrorra.’ ”

⁵Kala PROHOna Mosesli hānga, “Aaronli hānglu; napāngwui khāmshui chi kongtungli, ra̱shongtungli kala ra̱khongtungli khangkāda Egypt ngaleili khaifa shokta pemngasaklu.”

⁶Chieina Aaronna Egyptwui tara̱tungli apāng katingvai; kala khaifa kachungkha shokta Egypt ngalei pemhaowa.

⁷Kha mitrang kathembing chinala khangathuma mitrang eina chi tākam eina satheida Egypt ngaleili khaifa shokngasaka.

⁸Chiwui thili Pharaohna Moses eina Aaronli hokhuida hānga, “Iwui eina kala iwui mibingwui eina khaifabing khuithuimi khavai PROHOli pomilu, chieina ina PROHOli apha̱phayā khavai nathumwui mibingli chihomira.”

⁹Mosesna Pharaohli hānga, “Nawui kala nawui otsinabingwui eina kala nawui mibingwui eina khaifabing shimānmihaida na kala nawui shimli maleila Nile kongmāngli leingasaklu kaji hi katharan pomilu jikhala?”

¹⁰Ana hānga, “Akhama.” Mosesna hānga, “Nawui kahāng chi shokranu, chieina PROHO ithumwui Vare kathā khangatei maleimana kaji nana theikhuira.

¹¹Nawui kala nawui shimwui eina kala nawui otshinabing kala mibingwui eina khaifabing hi thuiserhaida Nile kongmāngli leimara.”

¹²Chithāda Moses eina Aaronna Pharaohwui eina thuihaowa, kala Mosesna PROHOli khaifabingwui pongli Pharaohli mayāngarok kahai chiwui vang ngakaowa.

¹³Kala Mosesna kapo chi PROHOna shāmida; shimli khalei, kayāngli khalei, luili khalei khaifa katonga thiserhaowa.

¹⁴Kala athumna akhum akhum eina kazipkhuida aram chi nganamshiruthaowa.

¹⁵Kha vikasang kathei eina Pharaohwui wuklung mararluishithaowa, kala PROHOwui kahāng athishurda aniwui tui makhuithuwa.

¹⁶Chiwui thili PROHOna Mosesli hānga, “Aaronli hānglu, ‘Nawui lijei khāngkāda chifali ngaphitta china tumit onda Egypt ngalei ungpei-vāpei ngasaklu.’”

¹⁷Kala anina chithāda sai; Aaronna pāng katingda awui khāmshui eina ngaphita, chifa-chihā saikora tumit sathuiserhaida mila matei, sāla matei, aram katongali tumitmānghaowa.

¹⁸Mitrang kathembingna tumit sāshok khavai athumwui khangathuma mitrang eina sālala mararthuwa.

¹⁹ Kala mitrang kathembing china Pharaohli hānga, “Hi Varewui pāng eina kashokna!” Kha Pharaohwui wuklungva mararshāphaoda, PROHOna hāngkahai thāda athumwui tui makhuimana.

²⁰Chiwui thili PROHOna Mosesli hānga, “Ngathorthakva thuilaga Pharaohna tara̱pamli kharā angaraisālu, kala ali hānglu, ‘PROHOna hithāda hānga, “Ili otram ngatha̱ khavai iwui mibingli chihohaolu.

²¹Kalikhada, iwui mibingli nana machihoakha, yanglu, ina hāchāng asum-sum eina chihoda nali, nawui otshinabingli, nawui mibingli, nawui shimli, Egypt katongawui shim hāchāng eina pemngasakra; kala athumna nganing khavaipamlila pemngasakra.

²²Kha chithangva Goshenwui lam, ina iwui mibing pamkhavai pam chi ngatei ngasakra, kaja chili hāchāng malei ngasakmara, chieina ngalei hili I PROHOna kaji nana theikhuira.

²³Chithāda sāda iwui mi eina nawui mili ina ngateingasakra. Khudam hi akhama shokra.’”

²⁴PROHOna chithāda sai, hāchāng asum-sum eina rāda Pharaohwui shimli, otshinabingwui shimli, Egypt ngalei katonga hāchāngna pemtinghaoda khikha masāpaithuwa.

²⁵Chieina Pharaohna Moses eina Aaronli hokhuida hānga, “Vāda ngalei hili nathumwui Vareli apha̱phayālu.”

²⁶Kha Mosesna hānga, “Hi kasā mamashungmara, kaja ithumwui PROHO Vareli ithumna pha̱kaphayā hi Egyptnaobingwui vanga mayangkhangai otna, Egyptnaobingna mayangkhangai ot chi athumwui miktāli pha̱phayakha, athumna ithumli ngalung mathamarala?

²⁷Ithumna kathumthangzatwui vāng lamhāng akhali vāda PROHO Vareli awui kakaso athishurda apha̱phayāki kajina.”

²⁸Chieina Pharaohna hānga, “Ina nawui PROHO Vareli lamhāngli apha̱phayā khavai vāngasakra, kha matānā vālu. Iwui vang pomilu.”

²⁹Chieina Mosesna hānga, “Yanglu, ina nawui eina shokta PROHOli Pharaohwui eina, naraobingwui eina kala Egypt katongawui eina akhama hāchāng yāmser khavai seihā sāmira, kha PROHOli pha̱phayā khavai mibingli machihomara da Pharaohna maminamluiaranu.”

³⁰Kala Mosesna Pharaohwui eina shokta PROHOli seihā sai;

³¹Kala Mosesna kahāng thāda PROHOna sai: ana asum-sum eina khalei hāchāngbing Pharaohwui eina, awui otshinabingwui eina kala mi katongawui eina khuithuiserhaida akhala mashākmana.

³²Kha chieina tangda Pharaohwui wuklung mararhaida athumli machiholuithuwa.