Read Tangkhul Naga SHONGZĀ 9 Bible Online

SHONGZĀ 9 - Tangkhul Naga bible

SHONGZĀ 9

¹Chieina PROHOna Mosesli hānga, “Pharaohli vāda hānglu, Hebrewwui PROHO Varena kahāngna, ‘Ili otram ngatha̱ khavai iwui mibingli chiholu.’

²Kaja nana mamayāmada athumli machihola haichingakha,

³PROHOwui pāng eina zakkashi seimao rāda luili khalei siguibing, gadhābing, utbing, seibing, yaobing kala mebing saikorawuitungli tāra.

⁴Kha PROHOna Israelwui sha̱kei eina Egyptwui sha̱kei ngatei ngasakra, chithāda sāda Israelwui akha eina tangda mathimara.”

⁵Kala PROHOna atam akha kakta hānga, “Lam hili akhama PROHOna otshotbing hi shokngasakra.”

⁶Kala akhama kathā PROHOna hi shokngasakta Egyptwui sha̱kei katonga thingasakhaowa; kha Israelwui akhala mathimana.

⁷Pharaohna ayang ngasakta, Israelnaobingwui sha̱kei akhala mathisāmana, kha Pharaohwui wuklung marartithaida mibingli machihothuwa.

⁸Kala PROHOna Moses eina Aaronli hānga, “Meiphungwui eina hotla ngashumkha khuilu, kala Pharaohwui mangāli chi Mosesna kazingramli horkāranu.

⁹Chieina Egypt katongali khamanaka chifa thāda ngapuivāra kala chi moksā shokngasakta Egypt ngaleili khalalei mila sha̱keila ngatorserra.”

¹⁰ Chieina anina meiphungwui hotla khuida Pharaohwui mangāli anganinga, kala Mosesna kazingramshong horkakā eina moksā sathuihaida mila sha̱keila ngatorserhaowa.

¹¹Mitrang kathemabing chi Moseswui mangāli manganingrarthuwa, kaja athumla, Egyptwui mi katongala moksā shokserhaowa.

¹²Kha PROHOna Pharaohwui wuklung mararngasakhaowa, kala PROHOna Mosesli hāngkahai thāda, aniwui tui makhuithuwa.

¹³Chiwui thili PROHOna Mosesli hānga, “Ngathorthakva̱ thuida Pharaohwui mangāli anganinglu” kala hithāda hānglu, Hebrewwui PROHOna hānga, “Ili otram ngatha̱ khavai iwui mibingli chiholu.

¹⁴Ajawui hile I kathā okathuili maleimana kaji theikhavai, nali, nawui otshinabingli kala mi saikorawuitungli kachotkachāng rāngasakra.

¹⁵Kaja ina ipāng katingshokta nali kala nawui mibingli kazātkashi eina ngaphitta ara okathuiwui eina shimānhairara;

¹⁶ kha hiwui vang ina nathumli ringkhangasakna, iwui pangshap nathumli chitheida, okathui katongali iwui ming ngayaovāra.

¹⁷Arui eina tangda nakhalatta langsoda iwui mibingli sāshida lei, kala athumli machihomana.

¹⁸Yanglu, akhama hitharan Egypt leikaphok eina thuida aja rāshungda hithāda mashoklakrang kaji thei panglāk eina tāngasakra,

¹⁹Chiwui vang eina nathumwui sha̱kei kala luili khalei saikora ngayin khavaipamli haiserhaolu; khikhalajila shimli makhuikhaunga mi, sha̱kei kachiva̱ theina athumli tākrorda thiserhaora.”

²⁰Chieina PROHOwui tuili khangachee Pharaohwui mibing china athumwui raonaobing kala sha̱kei saikora shimli houngsera;

²¹PROHOwui tui makhuikasangabingna athumwui raonaobing kala sha̱keibing luili haisera.

²²Kala PROHOna Mosesli hānga, “Napāng kazingramli katingkālu; chieina Egypt ngalei katongali, miwuitunglila, sha̱keitunglila kala luiyamwui thingnā-ra̱hātunglila, Egypt ngalei katongawuitungli thei tāranu.”

²³Chieina Mosesna awui khāmshui singda kazingramli apāng katingkai; kala PROHOna kazing khangashum eina thei, kala mei okathuili rotā ngasaka. Kala PROHOna Egypt ngaleili thei rotā ngasaka;

²⁴ thei marda katā eina ngasoda mei phikphik ngasheivā ngasakta Egyptna yur akha khangasāwui eina thuida thei chiyakha katā maleilakrangsai.

²⁵Egypt ngaleiwui luili khalei ot kachiva̱, mila, sha̱keila theina tākthatserhaowa; kala lui vāsang kahai theishirai kachiva̱, kala thingrong eina tangda tākkazammiserhaowa.

²⁶Israelnaona pamkhavai Goshen ngalei apammāngli thei matāmana.

²⁷Chieina Pharaohna Moses eina Aaronli ahokhui ngasakta hānga, “Ajawui hili ina morei sāhaira, PROHO mashunga, ila iwui mibingla nguihaira.

²⁸PROHOwui kazing khangashum thei katā shaphaira, PROHOli kahāngmilu; ina nathumli chihohaora; nathum hili mapamluimara.”

²⁹Mosesna ali hānga, “Ina Keinungwui eina shokkhaleoda PROHOli ipāng katingkāda kazing khangashum vānhaora, thei matāluimara, chieina okathui hi PROHOwuina da nana theikhuira.

³⁰Kha nala nawui raobingla PROHO Vareli mangacheeranga kaji ina thei.”

³¹(Tawon eina yaoyi kānhaowa, kaja yaoyi akhor maraohairasai, tāwon wonphok hairasai.

³²Kha kehu eina nāpai mashokrangsāda mashimānmana).

³³Chieina Mosesna keinungwui eina kala Pharaohwui eina shokta PROHOli apāng katingkakā eina kazing khangashumla, thei katāla vānhaowa, kala kazing maroluithuwa.

³⁴Kha kazing khangashumla, thei katāla, zingrotla vānkahai chi theilaga Pharaohna morei sāluishita, ala, awui raobingla wuklung mararungluishita.

³⁵Kala Mosesli PROHOna hāngkahai thāda Pharaohwui wuklung marartithaida Israelnaobingli machiholuithuwa.