Read Tangkhul Naga JOB 11 Bible Online

JOB 11 - Tangkhul Naga bible

JOB 11

¹Chiwui thili Naamathwui Zopharna ngahānkai;

²Tui hiyakha hi mangahānkāphalungmarala? Kala tui kachungkha kahāng mili mashun mirala?

³Nawui matuiphāphā kaji china mili kasaikha pamngasakralā, kala nana mana̱kashi tharan, khipānakha nali mai mashi ngasakmarala?

⁴Kaja iwui tamkachithei mashunga, kala Varewui miktāli I katharana da nana hānga.

⁵Kha iyavo, Varena akhamor makāda nali hāngkapaini kaje,

⁶kala thumkahai thangkhamei chi nali hāngchitheisi kaje! Kaja ava mataimeikhārda theithangmei. Chieina theilu kaja nawui khayonwui vang samphangrānli Varena suitāda yangmi.

⁷Varewui kathuka otbing chi nana phākhuishapla? Pangshapawui akatanga nana phākhuishaprala?

⁸Chiya kazingramli juimei—nana khi sārarra? Kathewui ramli thukmei— nana khi theirarra?

⁹Chiwui asān-aret okathuili sāngmei, kala shamadruli mashāmei.

¹⁰Ana rāda narhaiakha, kala bichar sākhavai hoakha, ali khipāna khāmshapra?

¹¹Kaja makānkhanā mili ana thei, ana khayonkhamāng kathei tharan, ana mamachukmarala?

¹²Kha ram gadhāna mi ngasāda pharāthang, mangkhama̱ china theithangmeihaora.

¹³“Nawui wuklung tharakha, napāng awuishong katingvāra.

¹⁴Napāngli khayonkhamāng leiakha, katāva̱li horhaida, makaphā nawui shimli malei ngasakalu.

¹⁵Chithāda sāda chukkhara̱ maleila namai ngareikāpaira; naning tāphuphaida mangacheemara.

¹⁶Nawui ringshāt malaihaora, longthui kahai tara̱ thāda nana phaningungnaora.

¹⁷Kala nawui mirin ngashunungli mathingmeihaora, kala chiwui tangkhamang ngathorshong thāhaora.

¹⁸Kachihān leihaoda naning nganungra, nali yangmihaida tāphup eina ngasāmkhuira.

¹⁹Nana pizangda khipānakha mangachee ngasakmara, kachungkhana nali ngahānngaira.

²⁰Kha makaphābingwui mik kalikha matangmara, athumwui yāmshok khavai apong shimānserhaora, kala athumwui kachihān chi athumwui khanaowa khaksuina.”