Read Tangkhul Naga JOB 13 Bible Online

JOB 13 - Tangkhul Naga bible

JOB 13

¹Yanglu, imikna saikora hi theiserhaira, ikhanānā shāda theishingkhuihaira.

²Nathumna kathei tākam eina ila thei; I nathumli mangazanmeimana.

³Kha ina Pangshapali ngazekra, kala ina iwui tuingaphun hi Vareli ngaphatngai.

⁴Nathuma, kakapik tui eina teimachara, nathum aremawui khanongmānga.

⁵Iyavo, nathum kasaikha pamsersi kaja, chi nathumwui thangmei ngasāra!

⁶Ara iwui theikakhui nganālu, kala ikhamorna kapo hi nganāmilu.

⁷Nathumna Varewui vang nguida matuirala? kala awui vang kapikta hāngrala?

⁸Nathum awui mijang zangda tuingaphun hi awui vang phayatmirala?

⁹Nathumli ana phāshokhaiakha phārala? Lha mi akhana akhali mikhanam thāda nathumnala ali minamshaprala?

¹⁰Nathumna ngathumda mijang saakha, ana mashoila nathumli kaharra.

¹¹Awui khangamkharei china nathumli mangachee ngasakmarala, kala awui khangachee khangachā nathumwuitungli matāmarala?

¹²Nathumwui chānjam hotlāwui chānjam kathāna; nathumwui pheisin leikhonwui pheisin kathāna.

¹³Kasaikha pamda ili matuingasaklu, kala ili rāki kaji chi rāranu.

¹⁴I khalatta iphasāli ihāna makeira, kala imanglā ipāngli haira.

¹⁵Yanglu, ana ili sāthathaora; I kachihān maleithura; chithālala awui mangāli iwui mashun hāngphatra.

¹⁶Vareli makathei mina awui mangāli mavāmara, kaji hi iwui huikhamina.

¹⁷Iwui tui hi ningsanglak eina nganālu, kala iwui hāngkashok hi nathumwui khanāli zangranu.

¹⁸Yanglu, iwui tuingaphun ina ngarānhaira; Ili mashung ngasakra da ina thei.

¹⁹Ili ngayātki kaji mi khipa leili? Chithākha I kasaikha pamda kathi phamei.

²⁰Ili ot khanimang mayāmilu; chithākha ina nawui eina mayāmngathumara:

²¹napāng iwui eina katāvali makhuithuimihaialu; kala nali khangang china ili mangachee ngasakmialu.

²²Chiwui thili ili holu, chieina ina ngahānkāra; maningakha ili matuingasaklu laga nana ngahānkāmilu.

²³Iwui khayonkhamāng kala morei kayākha leihaokhala? Iwui salāng kahai kala morei kachitheimilu.

²⁴Khisāda namai ngathumhaida, ili nawui yangkashena da shānkhuikhala?

²⁵Phankazata thingnāli nana machitrala, kala thengkahai māfali shurzatrala?

²⁶Kaja nana iwuitungli kakhā otmāng kapimihaira, kala I yaronlakhawui khayonkhamāng chi iwui ngasā ngasakta lei.

²⁷ Ipheili nana zurthing sanga, kala iwui shongfa kachida nana yangkaziya: ipheimajali akhān akha khānsangmi.

²⁸Mikumo kashuiya ot thāda, kashankachon makungna shaikahai thāda shimānhaowa.