Read Tangkhul Naga JOB 14 Bible Online

JOB 14 - Tangkhul Naga bible

JOB 14

¹Sha̱naona kapharā mi hi hunkhawui vang mānga, kala kakhanangna pemtinghai.

²Ana awon thāda rai kala ngahuihaowa; ana akalā thāda yongzata kala maleiluithuwa.

³Hikatha akhali yanggazida, nawuili bichar sākhavai khuikharāla?

⁴Makatharwui eina khipāna kathara ot khuishokshapra? Akhala maleimana.

⁵Awui atam retmihaoda, chāngshān nawui pāngli lei, ana makānshokpai khavai nana sāphinmihaira,

⁶awui eina ngareithuihaolu, makhamalu ngalang kaphei mi thāda, awui atam chi ringphakhuiranu.

⁷Thingrongwui vānga chihān khavai lei, kalikhada katatshathailala shonshoklui shitra, kala anao china mathiluimara.

⁸Angayungna ngaleilungli rarhaisālapai, kala angunrumna ngaleilungli thilapai;

⁹kha tara̱wui nganamna shonluira, kala akhar thingrong thāda kharshokra.

¹⁰Kha mina thida chizanhaowa; awui khanao khaksui suilaga a kali leilui?

¹¹Ngayiwui tara̱ katheng thāda, kala kongrāna ngahaphaida thengkahai thāda,

¹²mikumonala thihaiakha mangakarthuiluimana; kazingram mashimānranglakha eina tangda ana mathuimara, a kapiwui eina mamathotkhuiluipai mara.

¹³Iyavo, nana ili Kathewui ramli thummihaisasi kaje chāng, nawui malungkhavāt mavānranglakha eina tangda thumihaisi kaje chāng, nana iwui vang atam akha retmihailaga ili phaningungmisi kaje chāng!

¹⁴Mi akhana thihailaga a ringluirala? Iwui atam maungranglakha eina tangda, iwui otram ngatha̱ki kaji atam peida ngaraiphalungrali.

¹⁵Nana hora, kala ina nali ngahānkāra; napāngna sākahaibing chiwui vang nana honpamra.

¹⁶Chithasi kaje nana iwui pheikār shānkhuira, iwui moreili nana mayangchingmara;

¹⁷iwui makaphā kasāsā khaolungli mahor namshānhaora, kala iwui khayonkhamāng nana farormihaora.

¹⁸“Kha kaphungna mintāda kaithuiya, kala lunghārla leikasāpamwui eina khuithuihaowa;

¹⁹tara̱na lungguili malekthuihaowa, ngaleiwui leithao palongra̱na kheithuiya, chithāda miwui kachihān nana sākhaimi.

²⁰Nana ali yuichinga, kala ana kānthuihaowa; nana awui ningngai ngacheimida chishothaowa.

²¹Naomayara ngarāna khayākashi chithei khavai rai, kha ava chi matheimana; athumli maishi ngasaka, kha chi ana matheimana.

²²Khalattawui kachotmāng thei, kala akhalattawui vangmāng sifaya.”