Read Tangkhul Naga JOB 15 Bible Online

JOB 15 - Tangkhul Naga bible

JOB 15

¹Chieina Temanwui Eliphazna ngahānkai:

²Thangkhama mina aremawui awor tui matuiralā, kala zingshoshongwui masi eina awuk chipemrala?

³Khikha makānkhana tui eina, chi maningakha phākhavai makhalei chanhān eina ngaphatrala?

⁴Kha nana Vareli khangachee chihohaira, kala Varewui mangāli seihā kasā hapkhanoda lei.

⁵Kaja nawui moreina nakhamorli tamchithei, kala phākakhaningwui male nana kapangkhui.

⁶Nakhalattawui khamorna nali yonngasaka, ina maningmana; nakhalattawui morchaina nali makhamayā hāngkashokna.

⁷Pharārimeikap kaje mi chi nala? Lha phungrābingli nali sārila?

⁸Varewui kazipli na anganāhairala? Kala theithangkhamei chi nakhalatta shaphaira jila?

⁹Ithumna makathei nana kathei khi lei? Ithumna matheishingkakhui chili nana khi theikakhui lei?

¹⁰Sam charshi kahai kala khararnaobing, navāli rarkhameibing ithumwui ngachaili zangdalei.

¹¹Varena ningkhalem khavai kasā kala nali ngahuiri eina kahāng chi, nawui vang teonāhaola?

¹²Nawui wuklungna nali khisāda khuithuihaokhala? kala khisāda namik kataring,

¹³namanglāna Vareli mamayāmada, chikathā tui nakhamorwui eina shokngasakhao?

¹⁴ Kathara mi khipā leikhala? Maningakha sha̱naona kapharā khangaronga khipā lei?

¹⁵Yanglu, Varena awui katharabingli ning manganungmana, kala kazingram awui mangāli matharmana;

¹⁶chithākha khayonkhamāng tara̱ thāda khamanga ningkakachaiya kala khamakhaowa mi chi kayākha suitāmeira!

¹⁷Ina hāngchitheiga, nganāmilu; kala ina theikahai chi hāngmiga.

¹⁸(thangkhamabingna hāngmi kahai, kala athumwui avāva̱ ngarānala makhangathum,

¹⁹athummāngli mikahai lam chi kha̱mi khipānakha athumwui ngachaili marāmakānmana).

²⁰Makaphā mina awui mirin peida kachot lungli ngaleopama, lukhamashan makatha miwui vang zingkum peichaoda kazipmi kahai alungli.

²¹Khanākhurli khangacheekhonmāng shai, kashāng tharan awuitungli shimān khangasaka rāra.

²²Tangkhamangwui eina latshokluira da ana mashitsangmana, ali raighaina ngaraida khaleina.

²³Kashakazā kachili leikhala? da ana phāshang phātai, tangkhamanga zimiksho awui pāngli leihaira da thei,

²⁴kakhanang kala ringkashina ali khangachee pemngasaka, awungana raiwui vang ngarān kahai thāda athumna ali singyuiya.

²⁵Kaja Vareli ana ngakaishida apāng katinga, kala Pangshapali kasira,

²⁶chāngvei kashā phunglaga, ngakaishilāk eina yongrora;

²⁷khikhalajila ava kathaona mai workhamda, kala aphurthao akashānli ngananda,

²⁸ngachakyāng kahai keinungbingli arema ngasāhaoki kaji mi akhala mapamki kaji shimbingli pama;

²⁹a mashāngmara, awui lanla maleichingmara, chili lāngda okathuili awui angayung maleiluimara;

³⁰ana tangkhamangwui eina mayāmshokrarmara; meiwonna awui aphāng thengngasakra, kala awui awon masina phanthuihaora.

³¹khalatta minam khavai ana khamasaili mashitsangaranu; kaja khamasai kaho chi awui sāman ngasāra.

³²Awui atam maungranglakha hi shokhaora, kala aphāngbing chi mamatekluimara.

³³Drakhārongwui eina athei makhamin khanuk katā thāda, ali khanuktāhaora, kala oliverong thāda awui awon chi pa̱tāhaora.

³⁴Kaja shitkasang makhaleibingli khavāk kasā naokashumna, kala pheizāwui eina sākahai shimbing chi meina shimān ngasakra.

³⁵Athumna zakkashi otmāng machuka, kala makaphā ot pharāshok ngasaka, kala athumwui ning mikhanam sākhavai ngarāna.