Read Tangkhul Naga JOB 16 Bible Online

JOB 16 - Tangkhul Naga bible

JOB 16

¹Chieina Jobna ngahānkai:

²Ina hikathā kachungkha shāhaira; nathum hiya khikha masā khavai hāngkaphanepa misera.

³Arema tuina katang ngavārala? Chi maningakha nali khina malung thuingasakta ngahankakākhala?

⁴Na iwui pamli leisāsi kaja, ila nana khamatui thāda matuishapra; ina kui khayitta nawuitungli tui kachungkha hangtāhairara.

⁵Ikhamor eina nali pang ngasakshapa, kala imorchaiwui hāngkaphanep china nawui sikafa vānngasakra.

⁶Ina matuilala iwui sikafa mavānlakmana, kala ina chi khānglala khi ngavengsangra?

⁷Kachangkhatta Varena ili chotchāng ngasakhaira, iwui ngasotnao shimān ngasakserhaira.

⁸Ana iphasā nganir ngasakser kahai hina ili shākhi mida lei; kala kaokhangai kakao hina ili shākhi mida lei, imai hinala chitheida lei.

⁹Ana ili awui malungkhavāt eina serkazamda ili ningkachai; ana ahāla tarichithei, yangkashena ili mik taringda yanga.

¹⁰Mibingna ili khamor makārora; athumna khayāmashilakla amaili kapheya, ili mamayāmada athum saikora akha sāhaira.

¹¹Varena shitkasang makhalei athumwui pāngli ili horsangmihaira, kala makaphābingwui pāngli horsangmi haira.

¹²I tāphup eina leisai, kha ana ili serthamkhaimihaowa; ikahungli yonkhuilaga ili akha̱-akhā sāmihaira, kala ana ili rinnganao khavai sai,

¹³awui malā kakāpbingna ili kuimareiya. Ana iwui amakei tophātmihaida mathāhaimana, kala ana iwui athi ngaleitungli heitha̱ya.

¹⁴Ana latluida ili sākazama, raikhoka thāda ili yongrora.

¹⁵Ina iwui ahuitungli bora khoprora, kala iwui yāng chifali heitai.

¹⁶Kachapna imai hunghaira, kala imikkor hungping eina worhaira;

¹⁷ipāngli khayon maleilala kala iwui seihā kasāla tharlala.

¹⁸O ngalei, iwui ashee mafarormialu, kala iwui kachapkhon khangasām mavaiaranu.

¹⁹ Arui eina tangda, yanglu, iwui shākhi kazingli lei, kala iwui nganingkhame a chi atungshong lei.

²⁰Iwui ngasotnaona ili ngashimshi; kala imikna Varewui mangāli chāra̱ tai,

²¹kaja mi akhana khongnainaowui vang phayatkhami thāda mi akhana awui khamashung chi Varewui mangāli phayatmira.

²²Atam kasha̱khawui thili ina malatungluiki kaji apong chili vāura.