Read Tangkhul Naga JOB 18 Bible Online

JOB 18 - Tangkhul Naga bible

JOB 18

¹Chieina Shuhwui Bildadna ngahānkai:

²Karankha hāngkhavai tui phāzatra? Phaningkachunglu, chiwui thili ithumna hāngra.

³Kachiwui vang ithumli sha̱kei thāda shānkhuihaokhala? Khisāda nawui mikyanli mangkhama̱ ngasāhao?

⁴Nakhalatta malungvāt eina serkakazamna, nawui lungvātwui vang eina okathui hi horhaosila? lah lunghārla leikasā pamwui eina khuithuihaorala?

⁵ Mha, makaphā miwui kahor chi sāshimithaowa, awui meiwonna mahormana.

⁶Awui shimlungli kahor chi tangmangtinghai, kala awuitungli khalei thaomei sāshimithaira.

⁷Awui kapanga pheikār sha̱sang ngasaka, kala akhalattawui khangarāna konglui ngasaka.

⁸Kaja akhalattawui pheina ali khailanli hersanga, kala ana sāchomwuitungli zatvāda,

⁹khalenna pheimaja̱la yonkhuida, khalenna ali mantithaira.

¹⁰Ngaleilungli awui vang khara̱ akha thumhai; shongfalila awui vang khalen sanghai.

¹¹Ngachee khangasakbing china apam kachida ali ngachee ngasaka, kala awui thi kharomzata.

¹²Awui yāng vānhaira kala aphei ngaphok khavai unshimui ngarānhaira.

¹³Awui ahui aka̱na shaingakanhaira, kathiwui naochizai chinala pheipāng shaimi.

¹⁴Ana shitsangkasā shim chiwui eina serkazamda, khangacheewui awungali thānvai.

¹⁵Awui shimli awui ot makhaningbing lei, awui pamkhavaipamli khamaling meithā chaiserhaira.

¹⁶Azingshong awui angayung thengphoka, kala atungshong aphāng ja̱phoka.

¹⁷Awui ningphun ngaleitungwui eina shimānphoka, kala shongfali awui ming maleiluimara.

¹⁸Kahorwui eina tangkhamangli hersangda, ali apuk-apagwui eina kashamhaowa.

¹⁹Yur ngachaili awui naothei, maningakha ara̱-azā mavaimana, ana pamkhavai chili awui shimkhur kharing akhala maleimana.

²⁰Awui atam chili zingtunshongwui mina matakhakhai, zingshoshongwui mila khangachee-khangachāna nganglakhaowa.

²¹Kachangkhat eina makaphabingwui shimpān chi hithai, kala Vareli makatheiya a chiwui apam chi hithālaka.