Read Tangkhul Naga JOB 19 Bible Online

JOB 19 - Tangkhul Naga bible

JOB 19

¹Chieina Jobna ngahānkai:

²Karankha nathumna ili rekharekra, kala tui eina hāngkharotra?

³Tharāshida nathumna ili hāngmachinhaira; ili lāngkhangasak nathum makhayakmala?

⁴Khikateikhada ina langhaisālala, khalāng chi iwuili leira.

⁵Kalikhada iwuitungli nathumna maiyā khangaiwui vang, kala iwui sitkhamahuiwui vang ili khayon phenda khangaphatakha,

⁶hi theilu kaja Varena ili yonkhangasakna, kala ili awui khalen sangphin kahaina.

⁷Yanglu, ina ‘khangashao!’ da vaoshoka kha ili mangahānkāmimana; ina pangda vaowa, kha chili mashun bichar sākhami maleimimana.

⁸Ana iwui shongpong ngaveikhamhaida makanpaithuwa, kala iwui apong tangmang ngasakhaowa.

⁹Ana iwui tekhamatei iwui eina raimihaira, kala ikuiwui eina kuihon khuithuihaira.

¹⁰Ili uiui yāyā ana sākazamhaida I kuphaira; kala iwui kachihān thingrong thāda ana phurthathaira.

¹¹Awui malungkhavāt iwuitungli tāshungda awui yangkashe akha thāda shānkhui.

¹²Awui raimi khokkha sāda rai; kala shongfa ngarānphina, kala iwui kachonshim kuimareida rairum rāsai.

¹³Ichina ngarā iwui eina ana katāvali haimihai, kala iwui zakmai theikhamasui chi midhar thāngasakhaowa.

¹⁴Iwui athei-asābingna kala ngahānkhangai ngasotnaobingna ili nothāhaira;

¹⁵Iwui shimli shimzun sākasābingna ili malaihaira; rao sha̱naobingla ili kha̱mi akha thada khui; athumwui miktāli iya ram khangateinao thāhaowa.

¹⁶Ina iwui raoli holala mangahuimana; ikhamorna ngakaolala mangachonmana.

¹⁷Ipreiva̱na ili chinhao, ishāva̱wui naomayarabingnala ningkachaihaowa.

¹⁸Naoshinaobingnala ili ningkachaiya, Ina ngakarkathui tharan athumna ili makhamayā tui matui.

¹⁹Iwui khangavapa ngasotnaobingna ili yangkharingserhaira; kala ina leikashibing china mamayāthura.

²⁰Iwui ara̱-arā aphi eina ahuili ngasunhaira, ahāwui ahuim ang leimaya.

²¹Ili khalumashanmilu, ili khalumashan milu, O iwui ngasotnaobing, kaja Varewui pāngna iwuitungli rasāza̱haira!

²²Varena kasā thāda nathumna khisāda ili kakharomkhala? Iphasāli nathumna ningyāng maungkharar khiwui vang khala?

²³Iyavo, iwui tui kapikhuisi kaja! Iyavo, lairik akhali makapisangkapai!

²⁴Iyavo, lunghārtungli mariwui kala mishiwui kolom eina mashimānla manamsangkapai!

²⁵Kaja ina thei, ili ngatangkhame ringdalei, kala naomeithuida ana okathuili nganingra;

²⁶iwui ahui chithada kazātna shaikahaiwui thili, iwui asā eina ina Vareli theira.

²⁷Ali ina iwui ngalemli theilakra, khangateina maningla imikna theilakra. Iwui yāng kānhaira!

²⁸Kalikhada nathumna ‘Ali ithumna kathāda kharomra!’ kala, ‘Otshot hiwui angayung awuili lei’ jiakha;

²⁹raighai chili ngacheelu; kaja malungkakangna raighai chiwui shongrān khuirai, chieina nathumna mashun bichar leili da theikhuira.