Read Tangkhul Naga JOB 2 Bible Online

JOB 2 - Tangkhul Naga bible

JOB 2

¹Latluida thang zimikshokha Varewui naomayarabingna PROHOwui mangāli akazipsera, kala Satanla athumli ngasovāda PROHOwui mangāli anganinga.

²Kala PROHOna Satanli ngahāna, “Na kachiwui eina kharākhala?” Chieina Satanna PROHOli ngahānkāda hānga, “Okathuili zatung zatkhavāwui eina kala chiwui alungli zatshang zattā kasāwui eina kharāna.”

³Kala PROHOna Satanli hānga, “Na iwui rao Jobli machukyanghairala, kaja okathuili shāt makakā kala mashungrik kahai, Vareli ngacheeda makaphāwui eina ngareikathuia mi katha maleimana? Nana ali maram maleila shimān khavai, ili hānglala aruila ana ningsa ngaziplak eina nganingtitta lei.”

⁴Chieina Satanna PROHOli ngahānkai, “Ahuiwui vang ahui! Mi akhana awui mirinwui vang khalalei saikora chihoshapra.

⁵Kha ara nawui pāng khāngda awui ara̱-arā kala aphili sāza̱lu, chieina ana nali maingātlak eina khonshira.”

⁶Kala PROHOna Satanli hānga, “Yanglu, a nawui pangshapli leihaira; awui manglāva makhuipaimara.”

⁷Chieina Satanna PROHOwui eina thuihaowa, kala Jobli pheimayā eina thuilaga kuitungyāng kāshungda moksā shokngasaka.

⁸Kala ana hamkai akha khuilaga asasak eina hotkazamda hotlāli ngaleopama.

⁹Chieina apreiva̱na ali hānga, “Arui eina tangda ningsāngaziplak eina nganingtitfala? Vareli khonshilaga thihaolu.”

¹⁰Kha ana apreiva̱li hānga, “Nala mangkhama̱ sha̱nao akha thāda matuili. Ithumna Varewui eina khamathāva samphanglaga makaphāva masamphangsila?” Saikora hilila Jobna amorchai eina morei masāmana.

¹¹Chitharan Jobwuitungli makaphā kachotkachāng kharā saikora hi shālaga awui ngasotnao kathum rai, athumna kachichāpamwui eina rai, Temanwui Eliphaz, Shuhiwui Bildad kala Naamahwui Zophar. Athumna awui kachot phungngarumda ning ringpha khavai ngasopamsa da atam akha kakkhui.

¹²Kala athumna katāva̱ eina ali kathei tharan; ali mamachutrarthuwa; kala athumna akhon panglāk eina shokta chapsasuihai; kala athumna khangavai kachon serkhākta chifa kazingramshong horkāda athumwui kuitungli chairora.

¹³Kala athumna ngashun shini, ngayā shini da ngaleili pamlaga ali ngasopama, kala khipānakha ali tuikhurkha mahāngmana; kaja athumna awui kachot chi hakmahālak theikhui.