Read Tangkhul Naga JOB 20 Bible Online

JOB 20 - Tangkhul Naga bible

JOB 20

¹Chieina Naamathwui Zopharna ngahānkai:

²Chiwui vang iwui chukamajana ngahānkāmida lei, iwui malungkakatungwui vang

³Iwui hāngkhamachinli khamashat ina shāhaira, kala iwui theishingkakhuiwui eina ili manglāna ngahānkāmi.

⁴Okathuili mikumo kasāwui eina thuida, achālakhawui eina nana hi matheirangla,

⁵kaja makhayā miwui khāngkachikat kasha̱khawui vangna, kala mashitkasangawui khamathān hunkhawui vang mānga kaji?

⁶Awui kachui kazingram kāshunglala, awui kui muiyā kāzoklala;

⁷a khalattawui pai thāda ala katang mavaila shimānhaora; ali theikasābingna a kali leili? da hāngra.

⁸Ana mang thāda yongthuihaora, kala masamphangluimara; mha, ngayāshong mahākhami thada ali kashamhaora.

⁹Ali katheia chinala ali matheiluimara; awui pamkhavainala ali mayangluimara.

¹⁰Anaongarāna kachāmabingwui lumkakā phāra, kala akhalattawui pāngna awui lan hanmiluira.

¹¹Awui ara̱kui saikora yaronlakhawui pangshapna pemtinghai, kha ali ngasoda chifalungli thihaora.

¹²Makhayā ot chi akhamorli shimlala, ana chi awui malezingli thumhailala;

¹³kala ana chi sānhaida horhaingailala; kala akhamorlungli ngahomlala,

¹⁴awui zāt wukli mayui katā eina chi awui alungli khalei phara̱wui kakhā hu ngasāhaowa.

¹⁵Ana kashāng-kharei mayuisanglala, maloshokluiya; awui wukwui eina Varena khuishokmihaowa.

¹⁶Ana phara̱wui hu zimmangra; hu kaphunga phara̱ malena ali mara̱thatra.

¹⁷Khuira̱ eina makhan khalong, kongrei kongrā khalong chi ana matheimara.

¹⁸Ana vāsang kahai heiun chi hanmiluira kala chi mamayuisangmara, kala ana leihkhalonwui tongkakhui eina ana ringkaphā masamphangmara.

¹⁹Kaja ana kachāmabingli rekharekta horhaowa; ana masākakā shim ana ngapaikhui.

²⁰“Khikhalajila awui kākharām chi katang mavaithuda, ana ningkachāng ot akhala makazipkhuimara.

²¹Ana zāsang kahaiwui thili khikha mataimana, chiwui vang eina awui kashāng chi masangleimara.

²²Ana mavātlakthura kaji atamli kalāshāt rāra; kachotkachāng saikorawui pangshap awuitungli rāra.

²³Ana thoting eina wuk chipemkhui khavai Varewui sākashi malungkathui awui kashakazā sāda awuitungli rotāra.

²⁴Ana mari zeighai ngahāwui eina yāmzatra, kala pithraiwui malāna ali kāpngarui utra.

²⁵Ngakhunkhuida aphasāwui eina khuishokra, kahānna malāton athiwui eina sutshoka; awuitungli khangacheena pemhaowa.

²⁶Tangmangting kahai chi awui lanwui vang kaziphaira; makhamita meina ali chuitāra, awui shimli taikahai chila chuitā ngasakhaora.

²⁷Kazingramna awui khayonkhamāng phongmira; kala okathuina ali mamayāmara.

²⁸Awui shimkhurli kazipsang kahai chi khuithuihaora, Varewui malungkakang zimiksholi awui lan saikora longthuihaora.

²⁹Hi makhayā miwui yar Varewui eina kharāna, awui vang Varena yartā kahai shimluina.