Read Tangkhul Naga JOB 21 Bible Online

JOB 21 - Tangkhul Naga bible

JOB 21

¹Chieina Jobna ngahānkai:

²Iwui tui ningsangda nganālu, kala hina nawui ningkhalem khavai sālu.

³Ina hānglakha kasaikha pammilu, kala ina hāngkhui kahaiwui thili mana̱shinaolu.

⁴Ina maringkaphā phongkashok mili rinhaol? Khisāda I makhāngsānmarakhala?

⁵Ili yanglaga matakhakhailu, kala nakhamor napāng eina kafalu.

⁶Ina hi khamajuk tharan, I malungringa; kala iphasā katonga kathira.

⁷Kachiwui vang makaphābingna asārlam eina tangda okthui, kala pangshap leilakhao?

⁸Athumwui naongarā athum leilakha sakāserhaowa, kala athumwui ara̱-azā, rarkakā eina tangda thei.

⁹Athumwui shimkhur ning tāphuphai, kala Varewui lijei athumwuitungli maparmana.

¹⁰Athumwui mukvāna khangalāt chi mashoingayaomana, athumwui seiva̱na anao pharāda anaoli mahorhailakmana.

¹¹Athumna athumwui angangnaobingli yao ashangva̱ thāda chihoi, kala athumwui naongarāna pheichak sai.

¹²Athumna tambourine kala tingteilā singda laa sai, kala sipa̱khon nganāda ringphai.

¹³Athumna shāngshun eina okthui, kala chingri eina Kathewui ramli vāhaowa.

¹⁴Athumna Vareli hānga, ithumwui eina thuihaolu! Ithumna nawui theithangkhameiwui shongfa chi maningchāngmana.

¹⁵Sāshapvāshapa chi khida ithumna ali otram ngatha̱rakhala? Kala ithumna ali seihā sāda khi kānkhanā samphangra?

¹⁶Yanglu, athumwui mataikasang chi athumwui pāngli maleimala? Makhayāwui hāngkachithei chi iwui eina katāvali lei.

¹⁷Makhayāwui thaomei kayākhashida sāshimitkhala? Athumli unshimui kayākha shida rākhala? Varena awui malungkhavāt eina kachot mangayarmiserhaira?

¹⁸Athum chi masiwui mangāli lanji kathā, kala ahik siphanna phanthui kahai kathāla?

¹⁹Awui khayonkhamāng anaongarāwui vang Varena kaziphaida lei da nathumna hānga. Sāman chi akhalatta samphangranu, chieina athumna theikhuira.

²⁰Kashimān chi athumwui mik eina theiranu, kala pangshapawui malung kakang mangsangranu.

²¹Athumwui okthot mapeila alungli katat kahai tharan, athumwui shimkhurwui vang phaningmi khavai khi leikhala?

²²Juimeikap kajibinglila Varena bichar sai kaji theilaga ali khipāna awor tamchitheirakhala?

²³Kaikhana ringphālak eina kala tāphup eina okthuida reisanglak eina thi,

²⁴awui phasā thaotunhai, kala ara̱kuiwui angatingla ya̱shohai.

²⁵Khangatei kaikhana ningwui kakhālungli shaikaphā kaho mamazaplakla thi.

²⁶Athum ngaraichāda ngaleili chifaya, kala kachaina athumli rommithai.

²⁷Yanglu, nawui kaphaning kala ili nguingasakida kasā nawui khangarān ina thei.

²⁸Kaja “Wungnaowui shim kali lei? Makhayā miwui apam kachili lei?” da nana ngahāna.

²⁹Shongfali kazatabingli na mangahānyangrangla, kala athumna hāngkaphat chi na makhamayā maningmalā

³⁰kaja makhayābingli unshimui atamli huikhui, kala malungkathui atamli kankhui kaji?

³¹Khipāna khalattawui acham awui mangāli phongmishapra, kala ana sākahai chi khipāna runshapra?

³²Ali chikhurli khuikhavā tharan mibingna awui chikhur mayonpama.

³³Tampākwui leitangbing chi awui vang shima; mi saikorana athi shurvai, awui mangāli khavābing chi mashānrarmana.

³⁴Chithākha nathumna ili khikha makhaninga khamasai eina khi ningnganung ngasakra? Nawui ngahankakā chi makhamashung maningla khikha maleimana.