Read Tangkhul Naga JOB 23 Bible Online

JOB 23 - Tangkhul Naga bible

JOB 23

¹Chieina Jobna ngahānkai;

²Ajala iwui makhamayā khāshihai, iwui ringkhangātungli awui kharita pāng parza̱da lei.

³Iyavo, ali samphang khavai pam ina theisi kaje, awui pamkhavaili vāpaisi kaje!

⁴Iwui tuingaphun awui mangāli khuivāra, kala iwui hāngkapapai ikhamor eina hāngserra.

⁵Ana ngahānkāki kaji tui chi ina tamkhuira, kala ana ili hāngki kaji chi theishingkhuira.

⁶Awui hakkhamahā pangshap chi eina ili ngaphatrala? Maningmana; ana ili nganāmira.

⁷Chili mashungrik kahai mina ali ngasoda ngazek ngarokra, kala iwui bichar sāmena mashimānda ili mashun mida chihora.

⁸Yanglu, ina mangāshong vālala, a maleisāmana; khanukshong unglala ali matheikhuirarmana;

⁹Uishong ina ali phai, kha kathei masamphangmana; yāshong ngareiunga, kha ali matheirarmana.

¹⁰Kha ina kazat shongfa chi ana thei, ana ili chāng yanghaiakha I sinā thāda shokra.

¹¹Ipheina awui pheichon yuntita; ina awui thishurda mangareithuimana.

¹²Amorchaiwui ningkhami chiwui eina ina mapākthuiranga; akhamor eina kashok tui chi ina iwui kathuka ningli phārihaida lei.

¹³Kha ava mangacheikapaiana, khipāna ali ngachei ngasakshapra? Awui ningkachāng chi ana sai.

¹⁴Kaja iwui vang ngarānmi kahai chi ana kupsangmira, kala chikathā kachungkha awui ningli lei.

¹⁵Chiwui vang eina awui mangāli I ngacheeshuna; Ina khamachuk tharan, I ali ngacheelaka.

¹⁶Kachiwui vangkhala kaja Varena ili malung tātungngasaka; Sāshap-pangshapana ili ngachee ngasaka;

¹⁷kaja ili tangkhamang china khaluirorhai, kala imaili tangmangting kahai china farormihai.