Read Tangkhul Naga JOB 24 Bible Online

JOB 24 - Tangkhul Naga bible

JOB 24

¹Sāshap-pangshapana khisāda bichar kasāwui atam makahaikhala, kala ali katheibingna awui zimiksho khisāda matheithukhala?

²Mibingna thari phura; athumna yao ashangva̱ ngapaikhui kala chi hompama.

³Marānaobingwui gadhā athumna kashammihai, ra̱meinaowui mukkā tuingashit sākhavai khuimihai.

⁴Kachāmabingli shongfawui eina heishoka; okathuiwui kachāma saikorana athum khalatta yāmngathuma.

⁵Yanglu, ram gadhāna siwukli kazat thāda athumna ot sāzata, athumwui naongarāwui kashakazā sākhavai lamhāngli phāzata.

⁶Athumna luili seizāt phāzata, kala makaphābingwui drakhā yāmguili atham phāzata.

⁷Athumna kachon mafasangla khamasai eina ngayā pongda piya, kasik atamlila kachon mangavaimana.

⁸Kaphungwui zingrotra̱na athum ya̱sophai, kala ngayin khavai maleithuda lunghārli ngayinkhui.

⁹(Avāva̱ makhalei nao chili mathikwui eina ngapaikhui, kala leiman chiwui vang kachāmawui nao chi khuithuimihai.)

¹⁰Athumna kachon mangavaila mahonghat eina zata; kala kathai eina māvām vamzata;

¹¹Makhayābingwui olive yāmguili athumna thao shireiya; athumna atheira̱ shunglala ra̱changa.

¹²Keinung ayarli thikida khaleibingna ringngai, kala khamā kaza̱bingwui manglāna khangachon poi; chithālala Varena athumwui seihā kasā mashāmimana.

¹³Kahorli ngakaikashi mi kaikha lei, athum chiwui shongpong matheimana, kala chiwui shongfali mazatmana.

¹⁴Shaokathata china tangkhamangli ngakarthuiya, kachāma khavātabingli sāthat khavai; ngayāshong khale akha ngasāhaowa.

¹⁵Phokaphā miwui mik chinala māmāchā kahai atam ngaraida hānga, mik akhanala ili matheimara; kala azak mathei khavai maili kachon kuiruna.

¹⁶Tangkhamangli athumna miwui shimli leiutkai; ngashunshonga shimli pamda athumna kahor matheimana.

¹⁷Kaja athum saikorawui vang tangmangting kahai hi ngathorna, kaja tangmangting kahaiwui khangachee hi athumwui khavāknaona.

¹⁸Nathumna hānga, athumli thaklāk eina tara̱tungli khuivāhaowa; athumwui yar lam chili khonshihaowa; athumwui drakhā yāmguili surkhami khipākha mavāmana.

¹⁹Kazing kakāng eina kasāna phāmra̱ thengngasaka; chithāda Kathewui ramna morei kasābingli khuithuihaowa.

²⁰Keinungwui kayāngkhareina athumli malaihaowa; athumwui ming maphaningungluimana; chithāda makaphā makhayā chi thingkatek thāda tekngasaka.

²¹“Athumna nao kashum kala nao makhalei sha̱naobingli uipamda, ra̱meinaoli kapha khikha masāmimana.

²²Kha kapanga athumli Varewui pangshap eina okpeingasaka; mirinwui ningkachot atamli athumna ngakarthui.

²³Ana athumli ningtāphuphai ngasaka, kala ana athumli katommiya; kala awui mikna athumwui kazazatpamli yangmi.

²⁴Athumli kasha̱kha maiyā ngasaka, hunkhawui thili shimānhaowa; thingnā-ra̱hā thāda ngahuiya kala thenghaowa; māmazan thāda athumli hātkhuihaowa.

²⁵Chimathasi kaje, I kapikhaira da khipāna hāngshapra; kala ina kahāng hili khikha maningmana da chitheishaprala?”