Read Tangkhul Naga JOB 27 Bible Online

JOB 27 - Tangkhul Naga bible

JOB 27

¹Kala ngazek khangarokwui pong chili Jobna hānglui:

²“Varena katheina, ana iwui mashun khuithuimihaowa. kala Sāshap-pangshapna imanglāli khanang ngasaklala;

³ina khaksui kateokha leilakha eina tangda, kala Varewui manglāna ili khak suingasaklakha eina tangda;

⁴imorchaina kakapik tui mamatuimara, kala imalena mikhanam tui mahāngmara.

⁵Na mashunga da ina kachilikha mahānglakmara; I mathiranglakha eina tangda iwui ningsākhangazip machiholakmara.

⁶Ina iwui khamashung khangarongli singtita, kala machihomara; imanglāna thangkhanidawui vang mahāngmachinlakmana.

⁷Iwui yangkashe chi makhayā mi kathā ngasāranu, kala ili mamayāmada khangasunga chi makhamashunga ngasāranu.

⁸Kaja Varena ali katat kahai tharan, awui manglā Varena khuithui kahai tharan, vare makhaleiyawui kachihān khikhala?

⁹Kasak kharā tharan, awui khangakao Varena shāmirala?

¹⁰Sāshap-pangshapali ana mathānrala? Ana Vareli ngakaochingrala?

¹¹Ina Varewui otsak apongli nathumli tamchitheira; Sāshap-pangshapawuili khalalei ina mathumlakmara.

¹²Yanglu, nathum saikora khalattana hi theihaira; chithākha khisāda nathum arema ngasāserhao?

¹³Varewuili hi makaphā miwui yarna, kala rekakharekabingna Sāshap-pangshapawui eina shimluikat samkaphangna.

¹⁴Awui naongarā mataisanglala, chiya raighaiwui vangna; kala awui naotunbingna zāvaishap maleisāmana.

¹⁵Ali thili kathibingli mimaona chithita, kala athumwui ra̱meiva̱bingna machapngachāmana.

¹⁶Ana lupāsā chifa thāda kaziphailala, kala kashankachon leikhon thāda khorhailala;

¹⁷ana kaziphaisālapai, kha khamashungabingna ngavaira, kala khayon makhaleibingna lupāsā chi ngayarhaora.

¹⁸Ana sākakā shim chi karkaopān kathāna, raikānwui rāmnao kathāna,

¹⁹Ana kashānga ngasāda petli pilapai, kha chi mathāchingmara; amik thuikharak eina awui lan katonga maleisāthuwa.

²⁰Khangachee khangachana tara̱ kaphong thāda ali yuihaowa; ngayāshong surna ali khuithuihaowa.

²¹Zingshoshongwui masina ali khuithuihaida shimānhaowa; awui apamwui eina phanthuihaowa.

²²Lukhamashan maleila ali kahaitāhaowa; pangshap chiwui eina ana kui khāngda yāma.

²³China ali pāng kapherora kala apam chiwui eina ali kasirora.