Read Tangkhul Naga JOB 28 Bible Online

JOB 28 - Tangkhul Naga bible

JOB 28

¹Kachangkhat eina lupāsā shokkhavai pam lei, kala sinā langkhavai pam lei.

²Mari hi ngaleiwui eina samphanga, kala pithrai maringalungwui eina mengkhui.

³Tangkhamang kathukli khalei mariyur, achikun matili phākhuida tangkhamang chi mina tangngasakhaowa.

⁴Mi pamda khaleiwui eina lāchāda athumna tampākli leikhur phuta; athumli ram kazatbingna malaihaowa, miwui eina katāva̱li hokthanghaida ngayitung ngayitva sai.

⁵Ngaleitungwui eina kashakazā shoka; kha ngaleizingshong mei thāda chuiya.

⁶Chiwui lungguibing chi sapphirewui apamna, kala sināwui akha̱la lei.

⁷Apong chi sā kashaiya vānaona matheimana; kala khalāngwui mikna matheiranga.

⁸Sakashe sāyurna chili mazatlakranga; kazingkha̱la chili makānlakranga.

⁹Mina meizailungli sāza̱da, kaphung aphei zangshungda phuta.

¹⁰Lunghārli ana shongfa sākhui, kala amankasaka ot amikna theisera.

¹¹Kongbing ana phinhaida mangayishokmana, kala ngathum kahai ot chi ana kahorli khuishoka.

¹²Kha thangkhamei kali samphangra? Kala theishingkakhuiwui apam kali leili?

¹³Mina chiwui apong matheimana, kala chi kharingbingwui lamli masamphangmana.

¹⁴Kathukana hānga, chi iwuili maleimana, kala shamadruna hānga, chi iwuili mazangmana,

¹⁵Sinā eina malopaimana, lupāsā eina aman sāda mangatampaimana.

¹⁶Ophirwui sinā eina mangachākpaimana; aman kasaka onyx kala sapphire einala.

¹⁷Sinā eina mingshennala mangaraichārarmana; chili lāngda kasaka sināwui chara̱-chasān einala mangatha̱paimana.

¹⁸Kahana coral lah mathingri kahai einala mapāntampaimana; thangkhameiwui aman pearlli mataimei.

¹⁹Ethiopiawui topaz eina chāng tamkapai maleimana, chili lāngda sinā kashenga einala aman mangachākpaimana.

²⁰Chithakha thangkhamei kachi eina rākhala? Kala theishingkakhuiwui pam kali leikhala?

²¹Chi kharinga saikorawui mik eina thummihaira, kala yongkazata vānaobingwui eina thumhaida lei.

²²Abaddon eina Kathina hānga, hiwui pongli kakharop ithumwui khanā eina shāhaira.

²³Hiwui apong Varena thei; kala chiwui apamla ana thei.

²⁴Kaja ana okathuiwui katanga eina tangda theivai; kala kazingli khalei saikora theisera.

²⁵Masili ana kharitkhami kala tara̱li ngarakkhami tharan;

²⁶ana kazing rokhavai kala kazing ngashumda rikhān ngashei khavai kakaso tharan;

²⁷ana chi theida hānga; ana sākakhuina, kala ana phākashokna.

²⁸ Kala ana mi chili hānga, “Yanglu, PROHOli khangachee hi thangkhameina; kala makaphā horkahai hi theishingkakhuina.”