Read Tangkhul Naga JOB 29 Bible Online

JOB 29 - Tangkhul Naga bible

JOB 29

¹Jobna latluida hānglui.

²Iyavo, khare kachāng, Varena ili yangkhami chithāda leisasi kaje chāng;

³awui thaomei na ikuili hormida; tangkhamang lungli awui kahorli zatvākapai thāda;

⁴Varena ili ngasotnao sāmida iwui shimli yangmilakha; iwui mirin maholak eina leilakha;

⁵Sāshap-pangshapana ili ngasomida inao ngarā ili ngayurpamlakha;

⁶iwui pheichonbing seina̱ eina pheoda, kala ngalungna iwui vang thao woklakha chi!

⁷Ina keinungwui ngavei kanvāda, yāngreili pamkhavai ngarānda leilakha;

⁸yaronnaobingna ili theida hanthuihaowa, kala kasarnaobingla nganingkai;

⁹wungnaobingna mamatuilengmada, apāng eina khamor kafahai;

¹⁰khangambingwui khonla vihaowa, kala athumwui male khamorlungli katimsanga.

¹¹Khanā eina kashābingna, ili kalākhamahai hoi, mikna kathei tharan mayai;

¹²khikhalajila kachāmana khangakao tharan ina kanshokmi, kala avāva̱ makhaleiali ngachon khavai makhalei tharan, Ina ngachonmi.

¹³Thihaoki kaji miwui sokhami ili tāshungmi, kala ra̱meiva̱wui ningli khamathānwui vang ina laa sāngasaka.

¹⁴Ina khamashung khangarong chi sangda china kashankachon thāda ngavaimi; iwui mashun wungnao kachon eina kuitei thai.

¹⁵Ina mik khangapeobingwui mik sāmi, phei katekbingwui phei sāmi.

¹⁶Kachāmabingwui vang ina avāva̱ ngasāmi, kala ina makatheiya a chiwui vang maram phākhuimi.

¹⁷Makhamashung miwui hu khalei ahā chi, ina sātekmida ana sheikaphung sāshai chi akhamor eina hortā ngasaka.

¹⁸Chieina ina hithāda, iwui mirinwui zimiksho situiyākha mataisangda, iwui athipli thisangra;

¹⁹iwui angayung tara̱ khaleipam ngayao vāda, aphāng kachiva̱ ngayā pongda ikra̱ zimda,

²⁰iwui malā dharlak eina ipangli leichingra, kala iwui tekhamatei khayā nganaozaohaichingra da phaningsai.

²¹Mibingna ili nganāsanga, iwui hāngkachitheili chingri eina nganākhui.

²²Ina hāngkahaiwui thili athumna mamatuiluimana, kaja iwui tui athumna khuisanga.

²³Zingrot honkapam thāda athumna iwui tui honpama; kala mayo kachāng tara̱ ningkachāng thāda, athum khamor makāpama:

²⁴Athumna mashitsangkharar tharan, ina mana̱rimhaida; iwui ningngai khamathā chi athumna horkahai masāmana.

²⁵Athumwui shongfa ina phāmi, kala akhavā thāda pama, kala ina awunga akhana awui raimiwui lungli somkapam thāda, kala chapkhangachā mili ning lumkhangasak thāda sai.