Read Tangkhul Naga JOB 3 Bible Online

JOB 3 - Tangkhul Naga bible

JOB 3

¹ Hiwui thili Jobna matuiphokta awui kapharā zimiksholi khonshi.

²Kala Jobna hānga:

³ Ili kapharā zimiksho, kala ‘naomayara akha vaihaira’ da kahāng ngayā shimanhaoranu.

⁴Zimiksho chi tangkhamang ngasaranu! atungshongwui Varenala chi maphāzataranu, kahornala mahormiaranu.

⁵Kazingkashi kala tangkhamangna khuihaoranu, Muiyāna chiwuitungli ngapānphinranu; ngashunwui tangkhamangna ngachee ngasakranu.

⁶Chithang ngayā chi tangmangting kahaina tangmangphinhaida, zingkumwui khamathan zimikshobing chili mangarumaranu, kachāngwui chāngshānlila mazangaranu.

⁷Mha, chithang ngayā kashuma ngayā ngasāranu; khamathānkhon mashāranu.

⁸Leviathanli kasingabing laivā kathembingna zimiksho chili khonshiranu.

⁹Chithang zingthanlamwui sirābingla tangkhamang ngasāranu; kahor phālala akhanida maleisāranu, chithang zingthanlamwui kahor kashokla matheiranu;

¹⁰khikhalajila chithang ishāva̱wui naopam khāmong mashungmihaithuwa, imikwui einala malungkharing mathummihaithuwa.

¹¹Pharākhaleoda khisāda I mathithu, naopamwui eina shokta khisāda makānthuihaisāthu?

¹²Khisāda ili pharātā ngasakhaokhala? Lha khisāda I na̱ mangsākhala?

¹³Chithahairasāsi kaja I pisanghaida kasaikha pamhairara; I pihaira̱ra, kala I ngasāmkhuida leira,

¹⁴okathuiwui awungabing kala machinmebing, ja̱ta kahai keinungbing sakāluishit kajibingli ngasoda,

¹⁵lah sinā vaida athumwui shim lupāsā pemda kahai wungnaobingli ngasolaga ngasāmkhuida leira.

¹⁶Lha kahor matheilak kaje kachāng mapeila tākahai, kapharā makathei angangnaobing thāda ili khisāda masāmihaithukhala?

¹⁷Chiliva makaphā makhayābingna masheikhautmana, kala chiliva kakhanangbing ngasāmkhui.

¹⁸Chiliva narkahaibingla leiyāsorhai; khamayonawui kakathang akhonla mashāmana.

¹⁹Chili kateola khareila leisera, kala raonaola akhavāwui eina ningkhān samphanga.

²⁰“Khiwui vang eina chotchānglak eina khalei mili kahor mikhala, kala ningkachota mili okthui ngasak khala,

²¹ thingailala, makathe, ngathum kahai lanli thukmeida chuikazanga;

²²chikhur vāshungthang khamathān kala ringkaphaali?

²³Shongfa thummi kahaiya, kala Varena ngaveikham kahaia mi chili khisāda kahor misākhala?

²⁴Kaja iwui ningrei khāsut kahaina kashakazā sai, kala iwui khangahui tara̱ thāda heishoka.

²⁵Kaja ina ngangmeikap kaji ot chi ili rāshung haira, kala ina khangachee chi ili rāza̱haira.

²⁶I pamphup mahaimana, va̱ri kahaila maning; I ngasāmkakhui maleimana; kha kakhanang kaho chi rai.”