Read Tangkhul Naga JOB 30 Bible Online

JOB 30 - Tangkhul Naga bible

JOB 30

¹Kha ara athumna ili ngareo nganaohaira; ili nganuikhameibing, athumwui avāva̱ ngarāli iwui yaoshangli ngakuikazata fa eina tangdalila mazatrum ngasak khangaibing chi.

²Yāng makakā athumwui pāng eina khi kānkhanā samphangrakhala?

³Thaichāmhaoda athumna ngaleikatheng manirkachupa;

⁴athumna thingnā-ra̱hā rāmshaiya, shimphut thingwui angayung eina athumna lumkhavai sai.

⁵Mibingwui eina athumli kashamhaowa; kala khaleli khavao thāda athumwuili vaowa.

⁶Athum palongkhur, ngaleikhur, lungkhurli somphalungrali.

⁷Athumna khararlungli ngavaowa, ka̱shāt zingli ngahei kaziruma.

⁸Ning makhalei, khayā makhangarin nao thāda, ngalei chiwui eina athumli kashamhaowa.

⁹Ara I athumwui laaphor sānganaohaira, athumwui chānjam sānganaohaira.

¹⁰Ili ningkachaida athumna iwui eina tāthuihaira; ili kathei eina machora̱ mashororkida katharin maleithura.

¹¹Khikhalajila Varena ili hamsang khavai iwui khara̱ sāchatmihaoda, athum ili theilaga malungkhavāt makhāmrarthuwa.

¹²Iwui yāshong yarui ashangva̱na ili kashama, kala ili shimān khavai shongfa phai.

¹³Iwui shongfa sāphinhaida kachotkachāng mataisang ngasaka; khipānakha athumli makhāmmimana.

¹⁴Kakai akhurwui eina longkhaung thāda athumna rai; khaningkachupta longthuihaowa.

¹⁵Khangacheena ili pemhaowa; iwui khayākakāli masikaphan thāda kharoma, kala ina mathuikakhui muiyā thāda kānthuiserhaira.

¹⁶Ara iwui ningli khalei imanglā yurhaira; kakhanang atamna ili singtithaira.

¹⁷Ngayāna ira̱kui chāngkharenga; kala ili khamakei kathā khangashei china mangasāmkhuimana.

¹⁸China iwui phahon yonkhuida; phahon thāda ikahungli hokthanga.

¹⁹Varena ili rāhuklungli horsanghaira, kala I chifa hotlākathā ngasāhaira.

²⁰Ina nali ngakaowa kha nana mangahānkāmimana; ina nganingkālala matheimimana.

²¹Na ili sāshilak kahai ngasāthuihaira; napāngwui pangshap china ili rekhareka.

²²Nana ili masitungli khāngkai, kala nana ili chili tongngasaka; kala siphan zingrot khangashumlungli ili phanung phanvā ngasaka.

²³Mha, nana ili chithitra, kala kharing saikorawui vang haikhami shim chili khuivāra.

²⁴Kha ngayānglaga khum kahaipamli khalei ana kalāshāt atamli ngachonmi khavai pāng maphayaishokmala?

²⁵Saklak eina okthuikasā awui vang ina machapmala? Kachāmawui vang ining machotmala?

²⁶Kha ina kaphā phākazat tharan makaphā rai; kala ina kahor honakha tangkhamang rai.

²⁷Ining ningrākhaowa, va̱ri mahailakthura; kakhanang kachot atamna ili rāngarokhaira.

²⁸Ina yumsi eina zata, kha zinghāmna maningmana, yarui kazipli ina thuinganingda ngachonmi khavai vaowa.

²⁹I ramfawui achinā ngasāthuihaira, kala ostrichbingwui khavāknao sāhaira;

³⁰Iwui ahui kānghaida ngahokshokhaira; ira̱kuina mei thāda chui.

³¹Iwui lyre sikafa sāthuihaira; iwui sipa̱khon kachapa athumwui khon sāthuihaira.