Read Tangkhul Naga JOB 31 Bible Online

JOB 31 - Tangkhul Naga bible

JOB 31

¹Imikli ina khangashit sāhaira, laga, ina kachingva̱ akhali kathāda yangpaira?

²Atungshong Varewui eina iwui yar, kala kajuili kapama Sāshap-pangshapawui eina iwui shimluikat khi leira?

³Makhangarongawuitungli kalāshāt matāmala; kala kalākashi khayonkhamāng kasābingwui maningmala?

⁴Ana iwui shongfa theida pheikār saikora mashānhaimala?

⁵Ina khangui otsakli zatta, ipheina mikhanamli shurakha;

⁶(Chiwui vang ili chālak kahai tamkhavai eina onranu, kala Varena iwui ningsākhangazip theiranu!)

⁷Iwui pheikārna shongfa chiwui eina thuihaiakha, kala iningna imikwui thi shurakha, ipangli achuk akha eina tangda kāsākha;

⁸ina yaora, kateina zāranu; kala iwui vang kakhar theishirai phurthathaoranu.

⁹Iwui ningna sha̱nao akhali ningchānghaida, khongnainaowui khāmongli ina rimsākha;

¹⁰ipreiva̱na kateiwui mā rungmiranu, kala kateina ali ngasopiranu.

¹¹Kaja chi masākapai yomna; hikathā morei kasāli bichar kasābingna tandi mira;

¹²kaja chi Abaddonwui mei kathāna, kala china iwui mataikasang angayung vāshungda chuitāra.

¹³Iwui rao sha̱nao, lah rao mayarnaona maringkaphā phongkashok tui khuirāda ina makhuisangmiakha;

¹⁴Varena thuikhanganing tharan ina khi sāra, kala khi ngahānkāra?

¹⁵Ili naopamli kasema china alila kasā maningmala? Kala ithumli naopamli ngaraichāda ana sāser kaji maningmala?

¹⁶Kachāmana ningkachāng ina singshānhaiakha, lah rameiva̱wui mik ngapeo ngasakakha,

¹⁷lah imang mortong salaga, avāva̱ makhaleibingli mamizaakha,

¹⁸(kaja a nganuilakhawui eina ina avāva̱ sāda ali nganaokhui, kala ava̱va̱wui naopamwui eina thuida ina ali thānmi);

¹⁹kachon mangavaimada thikahai, lah fapi khavai makhalei kachāma mi theiakha,

²⁰aphasāna ili masomiakha, kaja iwui yaohah kachon eina a khalum masamphangakha,

²¹ngaveipheili ili khangachona leili kajiwui vang avāva̱ makhaleiali ipāng kākha;

²²chikathāwui vang iyartuiwui ara̱kui chakshokhaoranu; kala ipāngthei chakshokhaoranu.

²³Kaja I Varewui eina unshimui rāki kajili ngacheeya, kala awui ngam chili mai mangasungrarmara.

²⁴Sināli ina ningshai khavai, lah sinā kachangli iwui kachihān ngasāhaiakha,

²⁵iwui lan kachungkha khaleiwui vang, lah ipāngna kachungkha samphanghaowada ina mathānsākha;

²⁶zimik kahor chi theilaga kachāngna mathingrik kazat chi yanglaga,

²⁷ngathumda iningna malungchāngda, kala khalatta pāngli maya̱khuiakha,

²⁸hila moreina da bichar kasābingna tandi mipai, kaja atungshongwui Vareli ina makhamayā ngasāhaora.

²⁹Ili yangkakharing miwui kashimānli ina mathānakha, lah ali kalākashi kharā tharan ringphaakha

³⁰(Awui mirin khonshimihaoluda poda ina ikhamorli morei masa ngasakmana);

³¹iwui kachonshimi kaleia china “awui sā shaida mathorang kaji mi khipā leikhala? da mahāngrangsaakha,

³²(kha̱mi khipākha ayarli mangasāmmana, ramkazatawui vang ina iwui khāmong shomihai);

³³iwui khayonkhamāng miwui eina thumhaida iwui morei imakāli thumhaiakha,

³⁴khikhalajila yaruili ngacheenā haoda, kala shimkhurwui kakaharli ngacheehaoda, chiwui vang ina kayāng mashoklengla shimlungli kasaikha pamhaiakha—

³⁵Iyavo, ili nganāmi khavai akha leisāsi kaja chong! (Hi iwui shoina! Sāshap-pangshapa china ili ngahānkāra!) Iyavo, iwui yangkashena ili kaphen akha leisi kaja chāng!

³⁶Kachangkhat ina chi iyartuili ngava̱ra; kuihon thāda ikuili ngahonra;

³⁷iwui kasā saikora apong ali hāngserra; wungnao akha thāda ali asamphangra.

³⁸“Kalikhada iwui luina ili mamayāmada, kala tinkhurbing china chaprumakha,

³⁹aman mamila ina chiwui heithei khuishaida akhavāli chithit haiakha,

⁴⁰māwui mahut ka̱shat kharranu, nāpaiwui mahut khawo kharranu.” Jobwui tui ngachang haira.