Read Tangkhul Naga JOB 32 Bible Online

JOB 32 - Tangkhul Naga bible

JOB 32

¹Chithāda ashi kathum china Jobli ngahankakā ngasāmhaowa, khikhalajila akhalattawui miktāli a khangarongana.

²Chieina Ramwui shimkhur, Buzli khalei Barachelwui naomayara Elihuna malungvāthaowa. Ana Jobli malungvāta kaja Varena mashunga majila awui mashunli nganinghaowa;

³ana Jobwui ngasotnao kathumlila malungvāta kaja Job yonhaira da phongshokhailaga ali ngahānkā khavaiva maleithuwa.

⁴Elihuna Jobli ngazek khavai ngarai, kaja athumna ali rarmei.

⁵Kala athum kathumna ngahānkā khavai makhalei chi kathei tharan Elihu malungvāthaowa.

⁶Barachelwui nao Elihuna ngahānkai: “I zingkum einava nganuifaya, nathum khararnaomanga; chiwui vang eina iwui kaphaning nathumwui mangāli mahāngkhalengna.

⁷Ina kahangva, ‘Atamna matuimiranu, zingkumna thangkhamei tamchitheiranu.’

⁸Kha Sashap-pangshapawui khaksui mi akhawuili kazang manglā china ali theishingkhui khangasakna.

⁹Khararnaomang thangkhamei maningmana, kasarnaomang mashun chi kathei maningmana.

¹⁰Chieina ina kahāngna, ‘Ili nganāmilu; ilila iwui kaphaning kahāngshok ngasakmilu.’

¹¹“Yanglu, nathumna khi hāngnikhala da ngaraiya, nathumna khi hangra̱khala da apong phālaga, nathumwui thangmei tui chi ina nganāpama.

¹²Ina nathumwui tui nāshumda nganai, kala yanglu, Jobli khipānakha mangaphatrarmana; lah awui tuili nathum mangahānkārarmana.

¹³Ning ngasharlu, ‘Ithum thangkhamei samphanghaira; mina maningla Varena ali ngahānkara’ da hāngpaishina.

¹⁴Ana awui tui ili marinmana, kala ina nathumwui tuimatui eina ali mangahānkāmara.

¹⁵“Athum khakshingakhaira, mangahānkāthura; tuikhurkhala hāngkhavai maleithura.

¹⁶Athumna makhamatuiwui vang, ina ngaraifarala, kaja athumna chili nganinglaga mangahānkamana?

¹⁷Ila iwui ngahānkāra; iwui kaphaningla phongshokra.

¹⁸Ila hāngkhavai pemda lei, Kaja iwuili khalei manglana ili kasatmida lei.

¹⁹Yanglu, iwui ning hi asham makhavai drakhāra̱ kathāna; kadhara drakhāra̱ sangkhavai khao thāda ngawokkhaiki jihaira.

²⁰Ning taphik haikhavai hāngphalungrali; ikhamor makāda ngahānkāra̱li.

²¹Khipālikha mijang masāmara, lah khipālikha masot mamimara.

²²Kaja iya kathāda sotmasaorakhala da matheimana, ina chi saakha iwui Kasā Akhavāna ili thaklak eina khuithuihaora.