Read Tangkhul Naga JOB 33 Bible Online

JOB 33 - Tangkhul Naga bible

JOB 33

¹Kha ara, iwui tui nganaulu, O Job, kala iwui tui saikora nganākhuilu.

²Yanglu, ikhamor makāda, imale eina khamatuina.

³Iwui tuina iwuklungwui mashungrik kahai kachitheina; kala imorchaina kathei chi ningkathar tui khamatuina.

⁴Varewui manglāna ili sai, Sāshap-pangshapawui khaksuina ili ringngasaka.

⁵Nana shapakha ili ngahānkālu; iwui mangāli tui chi khare khanao sāda haikhuilu; machukkhuilu;

⁶Yanglu, ila nawui thāda Vareli yangda lei; ilila leikhonnao eina sākakhuina.

⁷Yanglu, ili khangacheena nali machipaaranu; iwui otsak hina nawuivang kharita mangasāranu.

⁸Mhah, imiktāli nana hānghaira, kala nawui khamatuikhon ina shāhaira.

⁹Nana, ‘I thara, morei maleimana, I tharzāhai, khayonkhamāng iwuili maleimana.

¹⁰Yanglu, ana ili phenkhavai apong phai, ili awui yangkashena da shānkhui;

¹¹ ipheili ana zurthing sanga, kala iwui kazazatli ana yanga’ da hānga.

¹²Yanglu, hili na mamashungmana, nali ina ngahānkāra. Varena mili reimei.

¹³Ana iwui tui akhala mangahānkāmara da nana kathāda ali phaningpaira?

¹⁴Kaja Varena apong akha eina hāngriya, laga apong khangatei akha einala hānga, chithālala mina mamachukmana.

¹⁵ Ngayāshong mina petli piphup kahai tharan mangli, kala rākhamahāli,

¹⁶ana mibingwui khanā mathing ngasakta, hāngmachinda ngachee ngasaka,

¹⁷mina awui otsakwui eina ngateithui khavai, kala miwui eina langkaso khuithuihai khavai;

¹⁸Chomwui eina amanglā thummi, raighaina amanglā mashimān khavaina.

¹⁹Mili hāngmachinda pettungli pingasaka, ara̱kui ngasheishon ngasheithai ngasaka;

²⁰chiwui vang mirinli zāt mazāngaimana, zākaphāla khamor mashimmana.

²¹Asā thenghaida matheirarmana, matheikasā ara̱-arā theisera.

²²Awui manglāna Chomli kala awui mirin kathi khuikharabingli vānganaiya.

²³Thingkhawui ngachaili tuisak sāme, miwui mashun hina da chitheikhame, kazingrao akha awui vang leisasi kaje;

²⁴kala ana ali lumashanmida hānga, Kathichom lungli zanghaoki kajiwui eina ali kankhuilu, Ina ngatangman akha samphanghaira;

²⁵awui aphi yaronlakhawui thāda ungranu; kala yaronlakhawui pangshap thāda ungluiranu da hāngsi kaje,

²⁶chieina mina Vareli seihā sāda ali khuisangmi, awui khaleipamli mathānthup eina ana rai. Awui huikhami tui mili hāngchitheiluiya,

²⁷kala miwui mangāli laa sāda ana hānga, khamashungli yonngasakta ina morei sāhaira, kala chiwui eina ili yangmihaowa.

²⁸Chomli zangki kajiwui eina ana imanglā ngatangkhui, kala iwui rinna kahor chi theira.

²⁹Yanglu, saikora hi Varena kasāsera, mi akhali khanishi, kathumshi shokhaira,

³⁰kharingawui kahor chi theikhavai, Chomwui eina awui manglā chi khuiungmiluiya,

³¹O Job, nganātitkhuimilu, ili nganālu, kasaikha pamlu, ina hāngga.

³²Nana hāngkhavai leiakha ili ngahānkālu, hānglu, kaja ina nali mashungmingai.

³³Maningakha, nganālu, kasaikha pamlu, ina nali thangmei tamchitheira.