Read Tangkhul Naga JOB 34 Bible Online

JOB 34 - Tangkhul Naga bible

JOB 34

¹Chieina Elihuna hānga:

²Thangkhamabing, iwui tui nganālu, katheiabing nathum, ili nganāmilu;

³ kaja malena kashakazā mazapkhayang thāda, khanāna tui tamyanga.

⁴Khamashung chi ithum kapangkhuisa; kaphā chi khikhala da ithum khalatta theikhuisa.

⁵Kaja Jobna hānga, ‘I khayon maleimana, laga Varena iwui mashun khuithuihaira;

⁶iwui mashun leileilaga ili kakapikli shānsanga; iwui sākhalāng maleilaga iwui khamā maraikapai ngasāda lei,

⁷Job kathā mi, zeikakharuili tara̱ thāda khamanga,

⁸makaphā kasā mibingli khangayur, kala makhayābingli yaothuikharuma khipā leikhala?

⁹Kaja ana hānga, Vareli ringphā khangasakli mina tongkazā maleimana.

¹⁰Chiwui vang eina nganālu, theithangkhamabing! Varena makaphā masāmana, Sāshap-pangshapana khangui masāmana.

¹¹ Kaja kachichāwui otsak athishurda kachichāna samphangra, kala awui apong athishurda hi awuitungli tāra.

¹²Kachangkhat eina Varena zakkashi ot masālakmana, kala Sāshap-pangshapana mashunli mangui ngasakmara.

¹³Khipāna okathui hi ali chisin, kala apuk-apagva̱̱ katonga hi awui pāngli haimikhala?

¹⁴Awui manglā a khalattana khuiluihaosi kaje, khaksui hanthuihaosi kaje,

¹⁵asā khavai saikora shimānrumserhaora, mikumo chifa sāthuiluihaora.

¹⁶Nana theikhui kathei leiakha, hi shākhuilu, Ina kahāng nāshunglu.

¹⁷Mashunli ningkakachaiya china mungrala? Khamashunga kala sāshapa,

¹⁸awunga akhali ‘Makānkhanā’ kala khangamali ‘Makaphā mi’ da kahānga,

¹⁹wungnaoli mijang makazanga; kachāmali lāngda kashāngali khayākashe, chili nana yonngasakrala, kaja saikora hi awui pāng eina kasā maningmala?

²⁰Mik khayipkhawui alungli athum thihaowa; ngayāsailung sheikhanukta athum thuiserhaipai, kala pangshapabingli mipang makhaning eina khuithuihaowa.

²¹Kaja miwui kazatpam chi amikna thei, kala awui pheikār saikora ana theisera.

²²Makaphākasā mina athum khalatta ngathum khavai khangami kala tangmangting kahai maleimana.

²³Kaja Varewui bicharli vākhavai ana mi akhawui vang atam mangachākhaimana.

²⁴Pangshap khaleiali mangathinglakla katangtai, kala athumwui pam khangateili mi.

²⁵Hithāda athumwui ot kasā theiserda thangngayākhali athumli mashongacheimihaida athum akha̱ sāngasakhaowa.

²⁶Athumwui makaphāwui vang miwui mangāli tandi mi,

²⁷khikhalajila awui thi mashurthuda, kala awui kakaso manganāthuda;

²⁸kachāmawui kachap ali shavāngasaka; kala ringkashibingwui ringkhangā ana shai—

²⁹Ana kasaikha khalei tharan, khipāna ali khayon phenra? Amai ngathum kahai tharan, mi akharanu, yurranu, khipāna theirarrakhala?—

³⁰kaja vare makathei mina mamungpaimara, mibingli khalen masangphalung mara.

³¹“Kaja kachikathāna Vareli, ‘Ili hāngmachin kahaina, khayon masāluimara;

³²ina makathei chi tamchitheimilu; ina morei sāhaiakha masāluilakmara, da hānghairala?

³³Laga nana chi makhamayāwui vang, nali bichar sākhavai ana poluirala? Na khalatta kapangkhuilu; ina masāmimara; chieina nawui kathei chi hānglu.

³⁴Theithangkhamabingna ili hāngra, kala ili nganāda khalei thangkhama mina hāngra:

³⁵‘Jobna theikakhui maleila hānga, awui tuili kathuk tui mazanglakmana.’

³⁶Makaphā miwui thāda khamatuiwui vang, Jobli katang eina tangda chotngasaksi kaja chong!

³⁷Kaja ana morei tungli ngakaikashi ngarora: ithumwui alungli ana pāng kapheya, kala Vareli makhamayā tui mataisang ngasaka.”