Read Tangkhul Naga JOB 36 Bible Online

JOB 36 - Tangkhul Naga bible

JOB 36

¹Elihuna hānglui:

²“Khānglaga ili kasha̱kha nganāmilu, Ina hāngmiga, kaja Varewui mathun eina khikakha hāngkhavai khaleifaya.

³Iwui aworkathem katonga katāwui eina phākhuira, kala ili Kasaali khamashung khangarong mira.

⁴Kaja iwui tui hi khangui maninglakmana, awor themlāk kahaiya akha nali ngayurpamda lei.

⁵“Yanglu, Vare hi sāshap-pangshapana, ana khipālikha machinmana; theishingkakhuiwui pangshap leilaka.

⁶Makhayāli ana maring ngasakmana, kha kakhanang athumli mashun mi.

⁷Khamashungwui eina awui mik mangareithuimana, kha awungabingli ngasoda wungpamkhongli katang mavaila athumli chipamlaga khayā kāngasaka.

⁸Kala athumli mari khanghuili khalapta, kakhanangwui khara̱li manhaikha,

⁹athumna lāngsolak eina kasā, athumwui sākhalāng, kala athumwui otsak chi ana phongchitheimi.

¹⁰Hāngkhamachin shākhui ngasaka, kala moreiwui eina mai ngareiung khavai ningmi.

¹¹Athumna kahāng nganāda ali otram ngatha̱akha, athumna mirin peida khavāt maleilakla peida okthuiya.

¹²Kha athumna manganāsangakha, raighai eina shimāna, kala theithangkhamei maleila thiya.

¹³“Vare makathei mina malungkhavātli akachang sai, athumli ana kakhalap tharan, ngachonmi khavai mangakaomana.

¹⁴Athum yaronshap eina thi, kala athumwui mirin khayākhamalā eina ngachanghaowa.

¹⁵Kakhanangbingli kachotwui eina kankhui, kala chotchān eina khanā mathing ngasaka,

¹⁶Kakhanang ringkashiwui eina khamashā apamli ana nali khuishoka, kala nawui tableli kashakazā rungkhami chi khamathāmāngna pemtinghai.

¹⁷“Kha nava makhayaali bichar pemtinghai; bichar eina mashunna nali singhaira.

¹⁸Ning ngasharlu, maningakha malung khavatna nali mana̱kashili ngakhunsangra; kala ngatangmanna kachung china nali mangareithuihai ngasakaranu.

¹⁹Nawui kachapna kachotkachāngwui eina, lah nawui yāng pangshap saikorana nali ngachonmishaprala?

²⁰Yurbingli athumwui pam eina katathaoki kaji ngayā chili mangaraipamalu.

²¹Ningngasharlu, moreili mazangalu, hiwui vang kachotkachāngli langkhamei nana kapangkhuihaira.

²²Yanglu, Vareli awui pangshapli khāngchikata, a kathā chishutme khipā leida?

²³Awui vang awui apong khipāna phāmi, lah na yonhaira da khipāna hāngshap?

²⁴Awui otsakli masot mikhavai phaningunglu, chiwui vang mina laa sāhaira.

²⁵Mi saikorana chili yangsera; katāva̱wui einala yangrai.

²⁶Yanglu, Vare hi reimatai kachangkhata, ithumna ali matheimana; awui zingkum maphākhuirarmana.

²⁷Kaja tara̱ zingpā ana kazipkhui, kala leichui zingrotlungli sikhui

²⁸chi kazingna rotāmi, miwuitungli mavātla tāmi.

²⁹Muiyā ngapān khangasak kala awui pamli kazing khangashum khipāna theikhuishapta?

³⁰Yanglu, awui kuikhamareili rikhān ngashei ngasaka, kala shamadru kathuk zangshung ngasaka.

³¹Kaja hibing hi eina ana yurbingli bichar sai; ana kashakazā mavātla mi.

³²Awui pāng eina rikhānli farorhai, kala kharinpam chili za̱ngasaka,

³³Chiwui katāk china awui apong phongchithei, ana malungvātta moreili mamayāmana.